Poem Punjabi ਸਤਿਨਾਮ ਕਰਤਾਰ

[Dalvinder Singh Grewal]

ਜਿਸ ਦਾ ਹੋਵੇ ਇਕੋ ਸਾਈਂ
ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ

ਜਿਸ ਦਾ ਹੋਵੇ ਇਕੋ ਸਾਈਂ।
ਸ਼ਰਧਾ ਜੇਕਰ ਪੂਰਨ ਹੋਵੇ ਜਾਂਦੀ ਨਹੀਂ ਅੰਝਾਈਂ ।
ਨਾਮ ਨਾਲ ਜੋ ਜੁੜਿਆ ਰਹਿੰਦਾ।
ਧਿਆਨ ਲਗਾਉਂਦਾ ਉਠਦਾ ਬਹਿੰਦਾ।
ਆਖਰ ਨਿਜ ਘਰ ਉਹ ਪਾ ਲੈਂਦਾ।
ਮਿਲਦਾ ਚਾਈਂ ਚਾਈਂ।
ਜਿਸਦਾ ਹੋਵੇ ਇਕੋ ਸਾਈਂ।
ਸ਼ਰਧਾ ਜੇਕਰ ਪੂਰਨ ਹੋਵੇ ਜਾਂਦੀ ਨਹੀਂ ਅੰਝਾਈਂ।
ਸਿਰਜਣਹਾਰਾ ਪਾਲਣਹਾਰਾ,
ਮਾਰਨ ਅਤੇ ਜਿਵਾਲਣਹਾਰਾ।
ਸਭ ਕੁਝ ਕਰਨ ਕਰਾਵਣਹਾਰਾ,
ਹੋਰ ਨ ਉਸ ਦੀ ਨਿਆਈ।
ਜਿਸ ਦਾ ਹੋਵੇ ਇਕੋ ਸਾਈਂ।
ਸ਼ਰਧਾ ਜੇਕਰ ਪੂਰਨ ਹੋਵੇ ਜਾਂਦੀ ਨਹੀਂ ਅੰਝਾਈਂ।
ਹੁਕਮ ਉਸੇ ਦਾ ਹਰ ਥਾਂ ਚੱਲੇ।
ਆਪ ਬੁਲਾਵੇ, ਆਪੇ ਘੱਲੇ।
ਹਰ ਇਕ ਦਾ ਹਿਰਦਾ ਉਹ ਮੱਲੇ।
ਯਾਦ ਕਰਨ ਸਾਰੇ ਉਸ ਤਾਈਂ
ਜਿਸ ਦਾ ਹੋਵੇ ਇੱਕੋ ਸਾਈਂ।
ਸ਼ਰਧਾ ਜੇਕਰ ਪੂਰਨ ਹੋਵੇ ਜਾਂਦੀ ਨਹੀਂ ਅੰਝਾਈਂ ।
ਗੁਰੂਆਂ ਜਿਸ ਨੂੰ ਉਸ ਰਾਹ ਪਾਇਆ।
ਗੁਰਮੁਖ ਉਸ ਨੂੰ ਰੱਬ ਬਣਾਇਆ।
ਭਲਾ ਸਭਸ ਦਾ ਉਸਨੇ ਚਾਹਿਆ,
ਉਹ ਹੁੰਦਾ ਗੁਰਆਂ ਦੀ ਛਾਈਂ
ਜਿਸਦਾ ਹੋਵੇ ਇਕੋ ਸਾਈਂ।
ਸ਼ਰਧਾ ਜੇਕਰ ਪੂਰਨ ਹੋਵੇ ਜਾਂਦੀ ਨਹੀਂ ਅੰਝਾਈਂ ।

 

[Dalvinder Singh Grewal]

ਜਿਉ ਪਾਣੀ ਤੇ ਬੁਲਬਲਾ ਤਿਉਂ ਸਭ ਜੀਵ ਨੇ ਜੀਂਦੇ।
ਪਵਨ ਘਨੇੜੇ ਨੱਚਦੇ,ਬਿਨ ਪਵਨ ਸਦ-ਨੀਂਦੇ।
ਨਾਮ ਨਿਸ਼ਾਨ ਸਭ ਖਾਕ ਹੋਣ, ਲੋਕੀ ਭੁੱਲ ਜਾਂਦੇ,
ਰੱਬ ਨਾਲ ਜੋ ਜੁੜਣ ਨਾਮ ਅੰਮ੍ਰਿਤ ਉਹ ਪੀਂਦੇ।

 

[Dalvinder Singh Grewal]

ਮਿਲਣ ਦੀ ਖਿੱਚ
ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ

ਵਕਤ ਤੇਰੇ ਨਾਮ ਦਾ ਸੋਚਾਂ ‘ਚ ਖੋ ਗਿਆ।
ਸਭ ਜਾਣਦਾਂ ਹੈਂ ਤੂੰ ਹੀ ਤੂੰ, ਮੈਨੂੰ ਕੀ ਹੋ ਗਿਆ।
ਤੈਨੂੰ ਮਿਲਣ ਦੀ ਖਿੱਚ ਸੀ ਮੱਠੀ ਕਿਉਂ ਪੈ ਗਈ?
ਨਾ ਇਸ ਜਹਾਂ ਦਾ ਰਹਿ ਗਿਆ ਦਰ ਤੇਰਾ ਵੀ ਢੋ ਗਿਆ।
ਲੱਖ ਕਰ ਰਿਹਾ ਹਾਂ ਕੋਸ਼ਿਸ਼ਾਂ ਮੰਜ਼ਿਲ ਰਾਹ ਤੁਰ ਪਵਾਂ।
ਤੇਰੀ ਇਕ ਨਦਰ ਦੀ ਘਾਟ ਤੇ ਵੇਲਾ ਖਲੋ ਗਿਆ।
ਕੀਕੁਰ ਮੈਂ ਤੇਰੀ ਮਿਹਰ ਦਾ ਭਾਗੀ ਬਣਾਂਗਾ ਦੱਸ,
ਆਉਂਦੀ ਆਵਾਜ਼ ਨਾ ਕੋਈ ਸੋਚਾਂ ਚ ਸੋ ਗਿਆ।
ਸੋਚਾਂ ਨੂੰ ਮਾਰਾਂ ਕਿਸ ਤਰ੍ਹਾਂ ਜੋੜਾਂ ਮਨ ਨਾਮ ਸੰਗ,
ਚਲਣਾ ਤਾਂ ਤੇਰੇ ਹੁਕਮ ਤੇ ਭੁੱਲਾਂ ਸਮਾਂ ਹੈ ਜੇ ਗਿਆ।
ਭਟਕਾ ਨਾਂ ਤੇਰੀ ਸੇਧ ਤੋਂ ਪਾਵਾਂ ਤੇ ਮਿਟ ਸਕਾਂ,
ਨਿਜ ਥਾਨ ਪਹੁੰਚਣ ਦੇ ਲਈ ਦੁਨੀਾਂ ਦਾ ਮੋਹ ਗਿਆ।

 

[Dalvinder Singh Grewal]

ਜ਼ੁਲਮ ਹਦ ਪਾਰ ਹੋ ਜਾਵੇ
ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ

ਜਦ ਗੰਦਗੀ ਬੇਸ਼ੁਮਾਰ ਹੋ ਜਾਵੇ।
ਹਵਾ ਤਪ ਕੇ ਗੁਬਾਰ ਹੋ ਜਾਵੇ ।
ਜਦ ਵੀ ਪੀੜਾਂ ਦੀ ਇੰਤਹਾ ਹੋਵੇ,
ਚੀਕਾਂ ਕੂਕਾਂ ਚ ਪੁਕਾਰ ਹੋ ਜਾਵੇ।
ਚੁੱਪ ਦਬਣੀ ਜੇ ਵੱਸੋਂ ਬਾਹਰ ਹੋ ਜਾਵੇ,
ਫਿਰ ਇਹ ਚੁੱਪ ਵੀ ਵੰਗਾਰ ਹੋ ਜਾਵੇ।
ਆਪਣਾ ਮਾਸ ਚੂੰਡਣ ਦੀ ਨਾ ਆਦਤ ਪਾ,
ਦੇਖੀ ਨਾ ਹਰ ਕੋਈ ਖੂੰਖਾਰ ਹੋ ਜਾਵੇ।
ਉਦੋਂ ਹੀ ਇਨਕਲਾਬ ਆਉਂਦਾ ਹੈ.
ਜ਼ੁਲਮ ਜਦ ਹਦ ਹਰ ਇਕ ਪਾਰ ਹੋ ਜਾਵੇ।

 

[Dalvinder Singh Grewal]

ਰੱਬਾ ਤੇਰੀ ਰਚਨਾ

ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ

ਰੱਬਾ ਤੇਰੀ ਰਚਨਾ ਤੋਂ ਜਾਵਾਂ ਵਾਰੇ ਵਾਰੇ।

ਜਿੱਧਰ ਵੀ ਵੇਖਾਂ ਸੋਹਣੇ ਦਿਸਦੇ ਨਜ਼ਾਰੇ।

ਵਗਣ ਹਵਾਵਾਂ ਨਾਲ ਝੂਲਦੇ ਨੇ ਰੁੱਖ।

ਠੰਢੀ ਠੰਢੀ ਪੌਣ ਦਿੰਦੀ ਮਿਠਾ ਮਿਠਾ ਸੁੱਖ।

ਦੇਖੋ ਕਿਵੇਂ ਭੌਰੇ ਨੂੰ ਬੁਲਾਉਂਦਾ ਸੂਹਾ ਫੁੱਲ ।

‘ਆ ਜਾ ਰਸ ਪੀ ਲੈ’ ਖੋਲ੍ਹ ਦਿੱਤੇ ਉਹਨੇ ਬੁਲ੍ਹ।

ਮਿਲਦੇ ਨੇ ਇਵੇਂ ਜਿਵੇਂ ਮਿਤਰ ਪਿਆਰੇ।

ਜਿੱਧਰ ਵੀ ਵੇਖਾਂ ਸੋਹਣੇ ਦਿਸਦ ਨਜ਼ਾਰੇ।

ਲੋਰ ਵਿਚ ਗਾਵੇ ਇਕ ਛੋਟੀ ਜਿਹੀ ਚਿੜੀ।

ਟਾਹਣੀ ਟਾਹਣੀ ਟੱਪੇ ਹੋਈ ਚਾਵਾਂ ਵਿੱਚ ਖਿੜੀ।

ਖੋਲ੍ਹੀ ਬੈਠੀ ਕੁਦਰਤ ਉਹਦੇ ਲਈ ਪਟਾਰੇ।

ਜਿੱਧਰ ਵੀ ਵੇਖਾਂ ਸੋਹਣੇ ਦਿਸਦੇ ਨਜ਼ਾਰੇ।

ਫੁੱਲ ਪੱਤੇ ਟੱਪਦੀ ਏ ਤਿਤਲੀ ਬਹੁ ਰੰਗੀ।

ਮਿਹਨਤ ਹੈ ਕੀਤੀ ਰਸ ਜੋੜ ਜੋੜ ਚੰਗੀ।

ਟਿੱਡੇ ਹੋਏ ਦੇਖੋ ਕਿੰਨੇ ਰੰਗਾਂ ‘ਚ ਸ਼ਿੰਗਾਰੇ।

ਜਿੱਧਰ ਵੀ ਵੇਖਾਂ ਸੋਹਣੇ ਨੇ ਦਿਸਦੇ ਨਜ਼ਾਰੇ॥

ਮੀਲੋ-ਮੀਲ ਕਣਕਾਂ ਨੇ ਪਾਏ ਵੇਸ ਹਰੇ।

ਖਾਲਿਆਂ ਚ ਪਾਣੀ ਵੀ ਕਲੋਲਾਂ ਵਾਹਵਾ ਕਰੇ।

ਖੇਤਾਂ ਵਿੱਚ ਗਾਉਂਦਾ ਜੱਟ ਨਾਮ ਦੇ ਸਹਾਰੇ।

ਰੱਬਾ ਤੇਰੀ ਰਚਨਾ ਤੋਂ ਜਾਵਾਂ ਵਾਰੇ ਵਾਰੇ।

 

[Dalvinder Singh Grewal]

ਸੁਰਜੀਤ ਸਿੰਘ ਪਾਤਰ

ਦੀ ਯਾਦ ਨੂੰ ਸਮਰਪਿਤ

ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ



ਸਾਹਿਤ ਸਿਰਜਣ ਹਾਰਾ ਪਾਤਰ।

ਸਭ ਦਾ ਹਰਮਨ ਪਿਆਰਾ ਪਾਤਰ।

ਛੱਡ ਗਿਆ ਸਾਨੂੰ ਜਦੋਂ ਅਚਾਨਕ,

ਝਟਕਾ ਦੇ ਗਿਆ ਭਾਰਾ ਪਾਤਰ।

ਗੀਤਾਂ ਦੇ ਬੋਲਾਂ ਦੇ ਰਾਹੀਂ,

ਪਾਉਂਦਾ ਸੀ ਝਲਕਾਰਾ ਪਾਤਰ।

ਜਿਉਂ ਜਾਂਦਾ ਰਾਹ ਨਵੇਂ ਬਣਾਂਦਾ,

ਪਾਂਧੀ ਬੜਾ ਨਿਆਰਾ ਪਾਤਰ

ਦਿਲ ਤੋਂ ਉਠੀਆਂ ਆਵਾਜ਼ਾਂ ਲਿਖ

ਦੇ ਗਿਆ ਸੱਚ ਭੰਡਾਰਾ ਪਾਤਰ।

ਮਿਠ ਬੋਲਾ ਤੇ ਸਹਜ ਸੁਭਾ ਦਾ,

ਸਬਦੋ ਸਬਦ ਹਲਾਰਾ ਪਾਤਰ।

ਹੁਣ ਅੰਬਰ ਵਿੱਚ ਲਿਸ਼ਕਣ ਲੱਗਾ,

ਬਣ ਕੇ ਸਾਹਿਤ ਸਿਤਾਰਾ ਪਾਤਰ

ਸਾਹਿਤ ਸਿਰਜਣ ਹਾਰਾ ਪਾਤਰ।

ਸਭ ਦਾ ਹਰ ਮਨ ਪਿਆਰਾ ਪਾਤਰ।

 

[Dalvinder Singh Grewal]

ਰੱਬ ਜੀਓ ਤੇਰਾ ਬਾਲ ਅੰਝਾਣਾ

ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ

ਰੱਬ ਜੀਓ ਤੇਰਾ ਬਾਲ ਅੰਝਾਣਾ।

ਕੀਕੂ ਵਿਚਰਾਂ ਕੀਕੂੰ ਜੁੜਨਾ, ਇਸਦੀ ਸਾਰ ਨਾ ਜਾਣਾ।

ਬੌਰਿਆ ਵਰਗੀਆਂ ਸੋਚਾਂ ਨੂੰ ਮੈਂ ਵਸ ਵਿੱਚ ਕੀਕੂੰ ਕਰਨਾ।

ਭਵਜਲ ਦੇ ਵਿੱਚ ਗੋਤੇ ਖਾਵਾਂ ਆਵੇ ਨਾਹੀ ਤਰਨਾ।

ਹੱਥ ਫੜਾ ਦੇ, ਪਾਰ ਲਗਾ ਦੇ, ਨਿੱਘ ਤੇਰਾ ਕਿੰਝ ਮਾਣਾ।

ਰੱਬ ਜੀਓ ਤੇਰਾ ਬਾਲ ਅੰਝਾਣਾ।

ਯਾਦ ਜੋ ਆਵੇਂ, ਟੇਕ ਬਣਾਵੇਂ, ਪਲ ਨਾ ਦੂਰ ਖੁੰਝਾਵਾਂ।

ਆਪ ਮਿਟਾ ਕੇ ਸਿਫਰ ਹੋ ਜਾਵਾਂ, ਸਿਫਰੋਂ ਤੈਨੂੰ ਪਾਵਾਂ।

ਇਕ ਲੱਗਿਆ ਤੇ ਦਸ ਬਣ ਜਾਵਾਂ ਹੋਵੇ ਮੇਲ ਸੁਹਾਣਾ।

ਰੱਬ ਜੀਓ ਤੇਰਾ ਬਾਲ ਅੰਝਾਣਾ।

 

[Dalvinder Singh Grewal]

ਜਦ ਸਾਨੂੰ ਕੁਝ ਸਮਝ ਨਾ ਆਵੇ
ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ

ਜਦ ਸਾਨੂੰ ਕੁਝ ਸਮਝ ਨਾ ਆਵੇ।
ਮਨ ਵਿੱਚ ਆ ਕੇ ਰਾਹ ਦਿਖਲਾਵੇ।
ਭਟਕਣ ਸਾਡੀ ਦੂਰ ਕਰਾਵੇ,
ਜੋ ਭਾਵੇ ਸੋਈ ਕਰਵਾਵੈ।
ਉਸਨੇ ਜੋ ਦਸਤੂਰ ਬਣਾਏ,
ਉਹਨਾਂ ਤੇ ਹੀ ਵਿਸ਼ਵ ਚਲਾਵੇ।
ਪੱਥਰ ਤੇ ਜਿਉ ਪੈਣ ਲਕੀਰਾਂ,
ਪੱਕਾ ਆਪਣਾ ਹੁਕਮ ਸੁਣਾਵੇ।
ਉਸ ਦੇ ਹੁਕਮੋਂ ਬਾਹਰ ਨ ਕੋਈ
ਮੰਨੈ ਹੁਕਮ ਸੋਈ ਫਲ ਪਾਵੇ

 

[Dalvinder Singh Grewal]

ਕੁੱਝ ਨਵਾਂ ਕਰਨ ਦੀ ਚਾਹ ਹੋਵੇ,

ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ

ਕੁੱਝ ਨਵਾਂ ਕਰਨ ਦੀ ਚਾਹ ਹੋਵੇ,

ਤਾਂ ਜੀਵਨ ਵਿੱਚ ਉਤਸਾਹ ਹੋਵੇ ।

ਕੁਝ ਔਖਾ ਦੇਖ ਕੇ ਬਹਿ ਜਾਣਾ,

ਸਿਰ ਚੜ੍ਹਿਆ ਭਾਰ ਨਾ ਲਾਹ ਹੋਵੇ।

ਜੋ ਅੱਗੇ ਵਧਦੇ ਹੀਆ ਕਰ,

ਉਹਨਾਂ ਦਾ ਵੱਖਰਾ ਰਾਹ ਹੋਵੇ ।

ਜੇ ਉੱਦਮ ਹੈ ਤਾਂ ਲਛਮੀ ਹੈ,

ਵਿਹਲੜ ਦੇ ਸਿਰ ‘ਚ ਸੁਆਹ ਹੋਵੇ।

ਜਿਸ ਠਾਣੀ ਬਾਜ਼ੀ ਜਿੱਤਣ ਦੀ,

ਮਰਨੇ ਦੀ ਕਦ ਪਰਵਾਹ ਹੋਵੇ।

ਕੁਝ ਕਰ ਦਿਖਲਾਉਣ ਦਾ ਜਜਬਾ ਜੇ,

ਕਿਉਂ ਨਾਢੂ ਦੀ ਪਰਵਾਹ ਹੋਵੇ।

ਜੋ ਨਵੇਂ ਅਜੂਬੇ ਘੜਦੇ ਨੇ,

ਹਰ ਤਰਫ ਉਹਨਾਂ ਦੀ ਵਾਹ ਹੋਵੇ।

 

[Dalvinder Singh Grewal]

ਹਰ ਥਾਂ ਤੇ ਜੋ ਹਾਜ਼ਰ ਦਿਸਦਾ

ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ

ਰੱਬ ਦਾ ਹੋਣਾ ਜਾਂ ਨਾਂ ਹੋਣਾ, ਇਹ ਤਾਂ ਕੋਈ ਸਵਾਲ ਨਹੀਂ ।

ਜੋ ਹਰ ਥਾਂ ਤੇ ਹਾਜ਼ਰ ਦਿਸਦਾ, ਕੌਣ ਕਹੂ, ਮੇਰੇ ਨਾਲ ਨਹੀਂ ।

ਜੰਗਲ ਬੇਲੇ ਪਰਬਤ ਥਲ ਵਿੱਚ, ਮੈਂ ਨਾ ਉਸਨੂੰ ਲੱਭਦਾ ਹਾਂ,

ਅੰਦਰ ਬਾਹਰ ਹਰ ਥਾਂ ਹਾਜ਼ਰ, ਮੈਨੂੰ ਉਸ ਦੀ ਭਾਲ ਨਹੀਂ ।

ਜੋ ਹੈ, ਉਸਨੂੰ ਮੰਨਾ ਕਿਉਂ ਨਾਂ, ਉਸਦੀ ਹੋਂਦ ਚੁਫੇਰੇ ਹੈ,

ਇੱਕੋ ਸੱਚਾ ਉਹ ਹੀ ਆਖਰ, ਬਾਕੀ ਕਿਸਦਾ ਕਾਲ ਨਹੀਂ ?

ਸੱਚ ਨੂੰ ਮੰਨਣ ਤੋਂ ਇਨਕਾਰੀ ਬੰਦਾ, ਟੱਕਰਾਂ ਥਾਂ ਥਾਂ ਮਾਰ ਰਿਹਾ,

ਆਪਣੇ ਅੰਦਰ ਵੇਖ ਲਵੇ ਤਾਂ ਝੱਲ ਹੋਣੀ ਫਿਰ ਝਾਲ ਨਹੀਂ ।

ਬਦਲਣਹਾਰੇ ਜੱਗ ਵਿਚ ਹਰ ਕੋਈ ਜੱਗ ਤੋਂ ਚਲਣਹਾਰਾ ਹੈ।

ਇਕ ਐਟਮ ਵੀ ਨਹੀਂ ਅਜਿਹਾ ਜਿਸ ਵਿੱਚ ਲਾਗੂ ਚਾਲ ਨਹੀਂ।

ਸੱਚੇ ਦਾ ਸੱਚ ਮੰਨ ਕੇ ਉਸਦੇ ਨਾਮ ‘ਚ ਜੁੜਿਆ ਰਹਿ ਸਜਣਾ,

ਉਸਤੋਂ ਟੁੱਟਿਆਂ ਕਟੀ ਪਤੰਗ ਜਿਉਂ, ਬਚਣਾ ਕਿਸੇ ਵੀ ਹਾਲ ਨਹੀਂ।

 

[Dalvinder Singh Grewal]

ਹੋਈ ਹੈ ਪੰਜਾਬ ਦੀ ਤਾਂ ਬੜੀ ਤਰੱਕੀ
ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ

ਹੋਈ ਹੈ ਪੰਜਾਬ ਦੀ ਤਾਂ ਬੜੀ ਤਰੱਕੀ।
ਜਿਸ ਦਿਨ ਬਿਜਲੀ ਆ ਗਈ ਦਿਨ ਗਿਣੀਏ ਲੱਕੀ ।
ਮੀਂਹ ਪੈਂਦਾ ਤਾਂ ਗਲੀਆਂ ਵਿੱਚ ਪਾਣੀ ਹੀ ਪਾਣੀ ।
ਨਸ਼ਿਆਂ ਦੇ ਵਿੱਚ ਰੁੜ੍ਹ ਰਹੀ ਹਰ ਰੋਜ਼ ਜਵਾਨੀ।
ਮਹਿੰਗ ਭਾਈ ਜਿਉਂ ਟੱਬਰਾਂ ਨੂੰ ਫਿਰਦੀ ਡੱਕੀ।
ਹੋਈ ਹੈ ਪੰਜਾਬ ਦੀ ਤਾਂ ਬੜੀ ਤਰੱਕੀ ।
ਬੰਬ ਫਟਣ ਵਿੱਚ ਥਾਣਿਆਂ ਆਤੰਕ ਹੈ ਛਾਇਆ।
ਚੱਲਣ ਗੋਲੀਆਂ ਖੁਲ੍ਹੇ ਆਮ ਕਤਲਾਂ ਦਾ ਸਾਇਆ ।
ਢੋਣ ਡਰੋਨਾਂ ਹੈਰੋਇਨ ਇਹ ਵੱਡਾ ਧੰਦਾ ।
ਲੀਡਰ ਸ਼ਾਮਿਲ ਨਸ਼ੇ ਵਿੱਚ ਨਾ ਛੋਟਾ ਬੰਦਾ।
ਕਰਨ ਸਮਗਲਿੰਗ ਖੁਲ੍ਹੇ ਆਮ ਇਹ ਖੱਟੀ ਪੱਕੀ ।
ਹੋਈ ਹੈ ਪੰਜਾਬ ਦੀ ਤਾਂ ਬੜੀ ਤਰੱਕੀ ।
ਸ਼ਰੇ ਆਮ ਹੁਣ ਹੋ ਰਿਹਾ ਹੈ ਰੇਤਾ ਚੋਰੀ ।
ਮਿਲੀ ਭੁਗਤ ਸੰਗ ਅਫਸਰਾਂ ਇਹ ਪਿਰਤ ਹੈ ਤੋਰੀ ।
ਬੁਰੀ ਹਾਲਤ ਹਰ ਆਮ ਦੀ ਤੇ ਖਾਸ ਦੀ ਤੱਕੀ ।
ਹੋਈ ਹੈ ਪੰਜਾਬ ਦੀ ਤਾਂ ਬੜੀ ਤਰੱਕੀ ।
ਦੇ ਕੇ ਨਾਮ ਵਿਕਾਸ ਦਾ ਵੱਢੀ ਤੇ ਠੱਗੀ
ਤਿੰਨ ਕਨੂੰੰਨੋਂ ਮਾਰ ਸੀ ਜੱਟਾਂ ਨੂੰ ਲੱਗੀ।
ਲੈਂਡ ਪੂਲਿੰਗ ਦੇ ਨਾਮ ਹੁਣ ਹੋਈ ਅੱਤ ਚੱਕੀ।
ਹੋਈ ਹੈ ਪੰਜਾਬ ਦੀ ਤਾਂ ਬੜੀ ਤਰੱਕੀ।
ਆਇਆ ਭੈੜਾ ਵਕਤ ਹੈ ਮੁੱਢੋਂ ਹੀ ਕਾਲਾ।
ਪੁੱਤਰ ਮਾਰਨ ਮਾਂ-ਪਿੳੇੁ, ਵਹੁਟੀ ਘਰ ਵਾਲਾ।
ਪਿਆਰ ਤਾਂ ਭੈਣਾਂ ਭਾਈਆਂ ਦਾ ਹੋਇਆ ਸ਼ਕੀ ।
ਹੋਈ ਹੈ ਪੰਜਾਬ ਦੀ ਤਾਂ ਬੜੀ ਤਰੱਕੀ।
ਵਿਕਦੇ ਜੱਜ ਕਚਹਿਰੀਏਂ, ਅਸਮਤ ਲੰਡੀਂ।
ਬਾਬੂ ਲੁੱਟਣ ਦਫਤਰੀਂ, ਆੜ੍ਹਤੀਏ ਮੰਡੀ
ਦਿੱਲੀ ਵਾਲੇ ਲੁੱਟਦੇ, ਪੰਜਾਬ ਚ ਬਹਿਕੇ।
ਅਫਸਰ ਅਪਣੇ ਲਾ ਲਏ, ਚੰਡੀਗੜ੍ਹ ਰਹਿਕੇ।
ਇਸ਼ਤਿਹਾਰਾਂ ਵਿੱਚ ਰੋੜ੍ਹਦੇ ਪੰਜਾਬ ਦਾ ਪੈਸਾ।
ਦਿੱਲੀ ਡੁੱਬੀ ਪਾਰਟੀ, ਏਥੇ ਹੋਊ ਵੈਸਾ।,
ਤੰਗ ਹੋਏ ਸਭ ਜਾਣਦੇ, ਇਹ ਹੋਰ ਨਾ ਸਹਿਣਾ।
ਬਦਲਾਂਗੇ ਖੁਦ ਵਕਤ ਇਹ ਸਭਨਾਂ ਦਾ ਕਹਿਣਾ।

 

[Dalvinder Singh Grewal]

ਆਸਰਾ ਤੇਰੇ ਨਾਮ ਦਾ

ਡਾਕਟਰ ਦਲਵਿੰਦਰ ਸਿੰਘ ਗ੍ਰੇਵਾਲ

ਆਸਰਾ ਤੇਰੇ ਨਾਮ ਦਾ ਪਰਮਾਤਮਾ, ਓਟ ਤੇਰੀ ਦੇ ਸਹਾਰੇ ਜੀ ਰਿਹਾਂ।

ਤੇਰੇ ਬਿਨ ਸੰਗ ਹੋਰ ਕਿਹੜਾ ਉਮਰ ਭਰ, ਬਦਲਦੇ ਸਾਥੀ ਨਵੇਲੇ ਹੀ ਰਿਹਾਂ ॥

ਮਾਂ ਪਿਓ ਦਾ ਸਾਥ ਮੁਢਲਾ ਆਸਰਾ, ਫਿਰ ਭਰਾ ਭੈਣਾਂ ਦਾ ਹੋਇਆ ਆਸਰਾ

ਦੋਸਤਾਂ ਸੰਗ ਦੋਸਤੀ ਵੀ ਪੈ ਗਈ, ਫਿਰ ਮਿਲੀ ਵਹੁਟੀ ਸੰਗ ਚੰਗਾ ਗੁਜ਼ਰਿਆ।

ਬੱਚਿਆਂ ਦਾ ਆਸਰਾ ਸੀ ਸਾਲ ਕੁਝ, ਪੁੱਛਦਾ ਨਾ ਹੁਣ ਕੋਈ ਸੁਪਨੇ ਸੀ ਰਿਹਾਂ।

ਆਸਰਾ ਤੇਰੇ ਨਾਮ ਦਾ ਪਰਮਾਤਮਾ, ਓਟ ਤੇਰੀ ਦੇ ਸਹਾਰੇ ਜੀ ਰਿਹਾਂ।

ਸਮਝ ਹੁਣ ਆਈ ਕਿ ਹਰਦਮ ਸਾਥ ਤੂੰ, ਨਾਲ ਤੇਰੇ ਜੁੜਨ ਬਿਨ ਚਾਰਾ ਨਹੀਂ।

ਸ਼ੁਕਰ ਕਰਦਾ ਹਾਂ ਜਦੋਂ ਕੁਝ ਸੰਵਰਦਾ, ਤਦ ਕਰਾਂ ਅਰਦਾਸ ਜਦ ਪਿਆਰਾ ਨਹੀਂ ।

ਨਾਮ ਦੀ ਜਦ ਦੀ ਖੁਮਾਰੀ ਚੜ੍ਹ ਗਈ, ਨਿਸ਼ਚਿੰਤ ਹੋ ਮੈ ਨਾਮ ਅੰਮ੍ਰਿਤ ਪੀ ਰਿਹਾਂ।

ਆਸਰਾ ਤੇਰੇ ਨਾਮ ਦਾ ਪਰਮਾਤਮਾ, ਓਟ ਤੇਰੀ ਦੇ ਸਹਾਰੇ ਜੀ ਰਿਹਾਂ।

ਜੋ ਜਨਮ ਤੋਂ ਜੁੜ ਗਏ ਨੇ ਨਾਮ ਸੰਗ, ਹੋਰ ਚੰਗੇ ਲੇਖ ਕਿਸ ਦੇ ਹੋਣਗੇ ।

ਨਾਮ ਤੋਂ ਵਾਂਝੇ ਨੇ ਰਹਿੰਦੇ ਭਟਕਦੇ, ਜੀਣ ਤੋਂ ਲੈ ਕੇ ਮਰਨ ਤੱਕ ਰੋਣਗੇ।

ਨਾਮ ਸੰਗ ਜੁੜ ਕੇ ਲਖੀਣਾ ਹੋ ਗਿਆਂ, ਜਗਤ ਵਿੱਚ ਰਹਿੰਦੇ ਹੀ ਸੁਰਗੀਂ ਥੀ ਰਿਹਾਂ।

ਅਸਰਾ ਤੇਰੇ ਨਾਮ ਦਾ ਪਰਮਾਤਮਾ, ਓਟ ਤੇਰੀ ਦੇ ਸਹਾਰੇ ਜੀ ਰਿਹਾਂ।

 

[Dalvinder Singh Grewal]

ਬੱਦਲਾਂ ਦੇ ਵਿੱਚ ਪਰਬਤ ਘਿਰਿਆ
ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ

ਬੱਦਲਾਂ ਦੇ ਵਿੱਚ ਪਰਬਤ ਘਿਰਿਆ।
ਅੰਬਰ ਛੂਹ ਲੋਚੇ ਸਿਰ ਫਿਰਿਆ।
ਉੱਚੇ ਉੱਚੇ ਰੁੱਖ ਉਗਾਏ,
ਹਾਰ ਵੇਲਾਂ ਦੇ ਗਲ ਵਿੱਚ ਪਾਏ,
ਪੰਛੀਆਂ ਮਿੱਠੇ ਗੀਤ ਸੁਣਾਏ,
ਫਿਰ ਵੀ ਇਸ ਨੂੰ ਸਬਰ ਨਾ ਆਏ।
ਰੱਬ ਨੇ ਮਾਲਾ ਮਾਲ ਇਹ ਕਰਿਆ।
ਬੱਦਲਾਂ ਦੇ ਵਿੱਚ ਪਰਬਤ iਘਰਿਆ
ਉੱਚੇ ਤੋਂ ਉੱਚਾ ਜੋ ਵਸਦਾ,
ਸਾਰੀ ਦੁਨੀਆਂ ਰਚਦਾ, ਤਕਦਾ।
ਰੁੱਖੀਂ ਲਾਵੇ ਮਿੱਠੇ ਮੇਵੇ ।
ਜਿਸ ਨੂੰ ਜੋ ਚਾਹੀਏ, ਸੋ ਦੇਵੇ॥
ਫਿਰ ਵੀ ਉਸ ਨੂੰ ਚਾਹੇ ਛੂਹਣਾ
ਸਮਝੇ ਨਾ ਔਕਾਤ ਨਿਗੂਣਾ।
ਪਰਬਤ ਤਾਂ ਇੱਕ ਕਿਣਕਾ ਕਿਰਿਆ।
ਬੱਦਲਾਂ ਦੇ ਵਿੱਚ ਪਰਬਤ ਘਿਰਿਆ।

 

[Dalvinder Singh Grewal]

ਗੁਰ ਦੀ ਛਤਰ ਛਾਇਆ ਵਿੱਚ ਜੀਵਾਂ
ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ

ਗੁਰ ਦੀ ਛਤਰ ਛਾਇਆ ਵਿੱਚ ਜੀਵਾਂ।

ਸਤਿਗੁਰ ਮੇਰਾ ਉਚਿਓਂ ਉਚਾ, ਮੈ ਨੀਵੇ ਤੋਂ ਨੀਵਾਂ।

ਉਸ ਦੀ ਕਿਰਪਾ ਸਦਕਾ ਮੇਰਾ, ਜੀਵਨ ਬੜਾ ਸੁਖਾਲਾ।

ਉਸ ਦੀ ਨਦਰ ਚ ਜੋ ਵੀ ਜੀਵੇ, ਉਹ ਹੈ ਕਰਮਾਂ ਵਾਲਾ।

ਉਸ ਦੀ ਦਿੱਤੀ ਹੋਈ ਚੂਲੀ ਅੰਮ੍ਰਿਤ ਕਰਕੇ ਪੀਵਾਂ ।

ਗੁਰ ਦੀ ਛਤਰ ਛਾਇਆ ਵਿੱਚ ਜੀਵਾਂ।

ਮੋਹ, ਮਾਇਆ ਵਿੱਚ ਫਾਥੇ ਹੋਏ ਕਰਮ ਕਰੇ ਕਈ ਮਾੜੇ।

ਕਾਮ, ਕ੍ਰੋਧ, ਅਹੰਕਾਰ, ਲੋਭ ਵਿੱਚ, ਪੈਦਾ ਕੀਤੇ ਸਾੜੇ।

ਵੈਰ ਵਿਰੋਧ ਮਿਟਾ ਕੇ ਸਾਰੇ ਰਿਸ਼ਤੇ ਪਿਆਰ ਸੰਗ ਸੀਵਾਂ।

ਗੁਰ ਦੀ ਛਤਰ ਛਾਇਆ ਵਿੱਚ ਜੀਵਾਂ।

ਸਿੱਖਿਆ ਗੁਰ ਤੇ ਪਾਈ ਜਿਸ ਨੇ ਮੇਰੀ ਸੇਧ ਬਣਾਈ।

ਸਭ ਨੂੰ ਮਿੱਤਰ ਸੱਜਣ ਮੰਨਿਆਂ, ਸਾਰੇ ਸਮਝੇ ਭਾਈ।

ਬਖਸ਼ਣਹਾਰਾ ਬਖਸ਼ੇ ਦਾਤਾ ਉਸ ਦੇ ਹੁਕਮ ਚ ਥੀਵਾਂ।

ਗੁਰ ਦੀ ਛਤਰ ਛਾਇਆ ਵਿੱਚ ਜੀਵਾਂ।

ਸ਼ੁਕਰ ਕਰਾਂ ਤੇ ਨਾਮ ਜਪਾਂ ਮੈ ਕਿਰਤ ਕਰਾਂ ਤਨ ਮਨ ਤੋਂ।

ਮਨ ਨਾ ਭਟਕੇ ਟੇਕ ਲਗੇ ਜਦ ਨਾਮ ਜਗੇ ਰਗ ਚੋਂ।

ਸਦਕੇ ਜਾਵਾਂ ਸਤਿਗੁਰ ਤੇਰੇ ਨਾਮ ਚ ਹਾਂ ਹੁਣ ਖੀਵਾਂ।

ਗੁਰ ਦੀ ਛਤਰ ਛਾਇਆ ਵਿੱਚ ਜੀਵਾਂ।

 

[swarn bains]

ਗੁਰ ਸਤਿਗੁਰ ਦੀ ਛਤਰ ਛਾਇਆ ਵਿਚ, ਇਹ ਸੰਸਾਰ ਪਿਆ ਜੀਵੇ
ਸਤਿਗੁਰ ਛਤਰ ਛਾਇਆ ਤੋਂ ਕੋਈ ਨੀ ਬਾਂਝਾ , ਉਚਾ ਭਾਵੇਂ ਨੀਵਾਂ ਥੀਵੇ

 

[Dalvinder Singh Grewal]

ਸਮਿਆਂ ਦੀ ਉਡਾਰੀ ਚਾਲੂ ਹੈ

ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ

ਸਮਿਆਂ ਦੀ ਉਡਾਰੀ ਚਾਲੂ ਹੈ, ਇਸ ਨੂੰ ਤਾਂ ਪਕੜਨਾ ਵਸ ਨਹੀਂ ।

ਭਾਰੀ ਯੁੱਧ ਦੁਨੀਆਦਾਰੀ ਦਾ, ਇਸ ਸੰਗ ਤਾਂ ਲੜਨਾ ਵਸ ਨਹੀਂ ।

ਜੋ ਸਮਿਆਂ ਦੇ ਸੰਗ ਚਲਦਾ ਹੈ, ਜੀਵਨ ਵਿੱਚ ਸੌਖਾ ਰਹਿੰਦਾ ਹੈ,

ਸਮਿਆਂ ਦੀ ਤਾਕਤ ਬਹੁਤ ਬੜੀ, ਇਸ ਅੱਗੇ ਡਟਣਾ ਵਸ ਨਹੀਂ ।

ਜਦ ਰੱਬ ਦੀਆਂ ਪੈਂਦੀਆਂ ਮਾਰਾਂ ਨੇ, ਕੋਈ ਆਉਂਦੀ ਨਾ ਆਵਾਜ਼ ਕਦੇ,

ਇਕ ਭਾਣਾ ਮੰਨਣ ਤੋਂ ਬਿਨ ਤਾਂ ਸਭ ਸਹਿਣਾ ਬੰਦੇ ਵੱਸ ਨਹੀਂ।

ਜੋ ਰਜ਼ਾ ਚ ਰਹਿਣਾ ਸਿੱਖ ਲੈਂਦੇ, ਜੀਵਨ ਨੂੰ ਸੁਖੱਲਾ ਕਰ ਲੈਂਦੇ,

ਜੋ ਰੱਬ ਨਾਲ ਅੜੀਆਂ ਕਰਦੇ ਨੇ, ਖੁਸ਼ ਉਨਾਂ੍ਹ ਦੇ ਰਹਿਣਾ ਵਸ ਨਹੀਂ।

ਦੜ ਵੱਟ ਜ਼ਮਾਨਾ ਕੱਟ ਮਿਤਰਾ, ਸਿਰ ਉਖਲੀ ਦੇ ਵਿੱਚ ਰੱਖੀ ਰੱਖ,

ਜੋ ਪੈਦੀ ਮਾਰ ਸੋ ਸiਹੰਦਾ ਜਾ, ਰੱਬ ਅੱਗੇ ਅੜਨਾ ਵਸ ਨਹੀਂ।

ਜੇ ਸੌਖਾ ਰਹਿਣਾ ਜਪ ਉਸ ਨੂੰ, ਹਰ ਵੇਲੇ ਉਸ ਦਾ ਧਿਆਨ ਧਰੀਂ,

ਜੋ ਉਸਨੂੰ ਭੁੱਲਿਆ ਤੜਪੇਗਾ, ਗਮ-ਚੱਕੀ ਚੜ੍ਹਨਾ ਵਸ ਨਹੀਂ।

 

[Dalvinder Singh Grewal]

ਸੱਭ ਮੌਲਾ ਮੌਲਾ ਲੱਗਦਾ ਹੈ

ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ

ਜਦ ਤੱਕ ਮੈਂ ਉਸਦੀ ਸੋਚਾਂ ਨਾ, ਮਨ ਝੌਲਾ ਝੌਲਾ ਲਗਦਾ ਹੈ।

ਇਕ ਦੋ ਕਵਿਤਾਵਾਂ ਲਿਖ ਲਾਂ ਜਦ, ਦਿਲ ਹੌਲਾ ਹੌਲਾ ਲੱਗਦਾ ਹੈ।

ਮੇਰੀ ਕਲਮ ਚ ਆ ਜਦ ਬਹਿ ਜਾਂਦਾ, ਇਸ ਕਲਮ ਚੋਂ ਅੰਮ੍ਰਿਤ ਵਹਿ ਜਾਂਦਾ

ਹਰ ਪਾਸੇ ਫਿਤਰਤ ਕੁਦਰਤ ਦੀ, ਵਿੱਚ ਮੌਲਾ ਮੌਲਾ ਲਗਦਾ ਹੈ।

ਦੁਨੀਆਂ ਵਿੱਚ ਜੀਣਾ ਸੌਖਾ ਨਾਂ, ਨਾ ਸ਼ਾਂਤ ਚਿਤ, ਨਾ ਟੇਕ ਲਗੇ,

ਆਵਾਜ਼ਾਂ ਨੇ ਪੀੜਾ-ਦਰਦ ਦੀਆਂ, ਸਭ ਰੌਲਾ ਰੌਲਾ ਲੱਗਦਾ ਹੈ ।

ਜੋ ਹੋ ਗਏ ਰੱਬ ਦੇ, ਨਿੱਤਰ ਗਏ, ਨੂਰਾਨੀ ਰੂਹਾਂ ਝਲਕਦੀਆਂ,

ਜੋ ਰੱਬ ਸੰਗ ਜੁੜਿਆ, ਦੁਨੀਆਂ ਨੂੰ ਕਿਉਂ ਬਉਲਾ ਬਉਲਾ ਲੱਗਦਾ ਹੈ

ਜੇ ਸੱਚ ਦੀ ਤਹਿ ਤੱਕ ਜਾਣਾ ਹੈ, ਛੱਡ ਝੰਝਟ ਸਭ, ਜੁੜ ਜਾ ਇਕ ਨੂੰ,

ਜੁੜਿਆਂ ਨੂੰ ਸਭ ਜੱਗ ਇੱਕ ਦਿਸਦਾ, ਸੱਭ ਮੌਲਾ ਮੌਲਾ ਲਗਦਾ ਹੈ।

 

[Dalvinder Singh Grewal]

ਕੁਝ ਤਾਂ ਸੋਚ ਪ੍ਰਾਣੀ।
ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ

ਜਿਸ ਦੇਹ ਦੇ ਮੋਹ ਜਾਲ ਚ ਫਸਿਆ, ਇਕ ਦਿਨ ਅਗਨ ਸਮਾਣੀ।
ਰੂਹ ਤੇਰੀ ਜੋ ਸਦਾ ਅਮਰ ਹੈ, ਸੋਚ ਉਹਦੀ ਚਿੱਤ ਧਰ ਲੈ।
ਕੌੜਾ ਬੋਲੇਂ, ਪਾਪ ਕਮਾਵੇਂ, ਕਾਮ ਕ੍ਰੋਧ ਵੱਸ ਕਰ ਲੈ।
ਤੇਰੇ ਮਾੜੇ ਕਰਮਾਂ ਨੇ ਤਾਂ ਤੈਨੂੰ ਨਰਕ ਵਿਖਾਣੀ।
ਕੁਝ ਤਾਂ ਸੋਚ ਪ੍ਰਾਣੀ।
ਦੋ ਦਿਨ ਮਿਲੇ ਜੀਵਨ ਲਈ ਤੈਨੂੰ, ਲਾਹਾ ਪਲ ਪਲ ਲੈ ਲੈ ।
ਸੁੱਚ ਕਿਰਤ ਕਰ, ਵੰਡ ਕੇ ਖਾਵੀਂ, ਨਾਮ ਚਿੱਤ ਵਿੱਚ ਪਾ ਲੈ।
ਪ੍ਰੇਮ ਪਿਆਰ ਸੰਗ ਹੱਸ ਬੋਲ ਕੇ, ਸਿੱਖ ਲੈ ਜਿੰਦ ਲੰਘਾਣੀ।
ਕੁੱਝ ਤਾਂ ਸੋਚ ਪ੍ਰਾਣੀ।
ਵੈਰ ਵਿਰੋਧ ਛੱਡ ਪਿਆਰ ਵਧਾ ਲੈ, ਸਾਰੇ ਉਸਦੇ ਜਾਏ।
ਸਭ ਨੂੰ ਪਿਆਰ ਕਰੀਂ ਉਸ ਤੋਂ ਵੱਧ, ਤੈਨੂੰ ਜੋ ਦਿਖਲਾਏ।
ਭਲਾ ਸਭਨਾਂ ਦਾ ਸੋਚ ਹਮੇਸ਼ਾ, ਬੁਰਾ ਕਦੇ ਨਾ ਜਾਣੀ।
ਕੁਝ ਤਾਂ ਸੋਚ ਪ੍ਰਾਣੀ।
ਸਭਨਾ ਜੀਆ ਕਾ ਇਕ ਦਾਤਾ ਵਿਸਰ ਕਦੇ ਨ ਜਾਣਾ।
ਜੋ ਕਰਦਾ ਸਭ ਉਹ ਹੀ ਕਰਦਾ ਝੂਠਾ ਨਾ ਕਰ ਮਾਣਾ।
ਕੀਕੂੰ ਚਲਣਾ, ਇਹ ਦੱਸਣ ਲਈ ਗੁਰੂਆਂ ਦੀ ਹੈ ਬਾਣੀ।
ਕੁਝ ਤਾਂ ਸੋਚ ਪ੍ਰਾਣੀ।
ਸ਼ਾਂਤ ਰਹੇਗਾ ਸੁਖ ਭੋਗੇਂਗਾ ਨਾਮ ਜਪੇਂ ਤਾਂ ਮੁਕਤੀ।
ਉਸਨੂੰ ਹਰ ਦਮ ਚਿਤ ਧਿਆਈਂ, ਸੱਚੀ ਉਸ ਦੀ ਭਗਤੀ।
ਖਾਣ ਪੀਣ ਤੇ ਰਹਿਣ ਨੂੰ ਦੇਵੇ, ਸ਼ੁਕਰ ਕਰੀਂ ਪੜ੍ਹ ਬਾਣੀ।
ਕੁਝ ਤਾਂ ਸੋਚ ਪ੍ਰਾਣੀ।

 

[Dalvinder Singh Grewal]

ਐਵੇਂ ਫਿਰੇ ਉਡਾਉਂਦਾ ਕਾਂ ।
ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ

ਐਵੇਂ ਫਿਰੇ ਉਡਾਉਂਦਾ ਕਾਂ ।
ਲੈਂਦਾ ਨਾ ਤੂੰ ਜਦ ਰੱਬ ਦਾ ਨਾਂ ।
ਉਮਰਾਂ ਵਸ ਤਨ ਤੋਂ ਖੋਇਆ।
ਹੁਣ ਬੈਠਾ ਏਂ ਪਿੱਜਲ ਹੋਇਆ।
ਯਾਦ ਕਰੀਂ ਵਿਛੜੇ ਦੀ ਹੁਣ ਤਾਂ,
ਐਵੇਂ ਫਿਰੇ ਉਡਾਉਂਦਾ ਕਾਂ ।
ਉਸ ਵੱਲ ਆਪਣੇ ਆਪ ਨੂੰ ਲਾ ਲੈ।
ਮਿਹਨਤ ਕਰ ਅੰਦਰ ਹੀ ਪਾ ਲੈ।
ਉਹ ਤਾਂ ਵਸਦਾ ਹੈ ਹਰ ਥਾਂ ।
ਅਪਣੇ ਮਨ ਨੂੰ ਸੱਚ ਸਮਝਾ ਲੈ।
ਉਸ ਵੱਲ ਅਪਣੀ ਸੋਚ ਲਗਾ ਲੈ।
ਅਸਲ ਟਿਕਾਣਾ ਉਸ ਦੀ ਛਾਂ।
ਐਵੇਂ ਫਿਰੇ ਉਡਾਉਂਦਾ ਕਾਂ ।
ਲੈਂਦਾ ਨਾ ਤੂੰ ਜਦ ਰੱਬ ਦਾ ਨਾਂ ।
ਐਵੇਂ ਫਿਰੇ ਉਡਾਉਂਦਾ ਕਾਂ ।
ਤੈਨੂੰ ਜੱਗ ਦੀ ਚੜ੍ਹੀ ਖੁਮਾਰੀ।
ਚਿੰਤਾ, ਧੋਖਾ, ਰੋਗ, ਬਿਮਾਰੀ।
ਕਾਮ ਕ੍ਰੋਧ ਦੀ ਪੈ ਗਈ ਪਾਂ।
ਐਵੇਂ ਫਿਰੇ ਉਡਾਉਂਦਾ ਕਾਂ ।
ਅੰਮ੍ਰਤਿ ਵੇਲਾ ਨਾਮ ਦਾ ਵੇਲਾ,
ਉਸਨੂੰ ਚਿੱਤ ਧਿਆਂਨ ਦਾ ਵੇਲਾ
ਸ਼ਾਂਤ ਪਈ ਤਾ ਸਭ ਚੁੱਪ ਚਾਂ।
ਐਵੇਂ ਫਿਰੇ ਉਡਾਉਂਦਾ ਕਾਂ ।
ਉਮਰਾਂ ਨੇ ਵਸ ਤਨ ਤੋਂ ਖੋਹਿਆ।
ਹੁਣ ਬੈਠਾ ਏ ਬੇਦਿਲ ਹੋਇਆ।
ਯਾਦ ਕਰੇਂ ਕੀ ਵਿਛੜੀ ਮਾਂ।
ਐਵੇਂ ਫਿਰੇ ਉਡਾਉਂਦਾ ਕਾਂ ।
ਉਸ ਵੱਲ ਧਿਆਂਨ ਅਜੇ ਵੀ ਲਾ ਲੈ ।
ਬਚਦੀ ਜ਼ਿੰਦਗੀ ਲੇਖੇ ਲਾ ਲੈ।
ਲੈਣਾ ਸੀ ਜਦ ਰੱਬ ਦਾ ਨਾਂ।
ਐਵੇਂ ਫਿਰੇ ਉਡਾਉਂਦਾ ਕਾਂ ।

 

[Dalvinder Singh Grewal]

ਬਾਬਾ ਨਾਨਕ ਤਾਰਨ ਆਇਆ
ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ

ਹਰ ਪਾਸੇ ਜਦ ਨ੍ਹੇਰਾ ਛਾਇਆ।
ਬਾਬੇ ਨਾਨਕ ਜੱਗ ਰੁਸ਼ਨਾਇਆ।
ਧਾੜਵੀਆਂ ਦਾ ਰਾਜ ਸੀ ਹਿੰਦ ਤੇ
ਜੂਲਾ ਗਲੇ ਗੁਲਾਮੀ ਪਾਇਆ।
ਜ਼ੁਲਮਾਂ ਦੀ ਸੀ ਹੱਦ ਨਾ ਕੋਈ,
ਲੁੱਟ ਲੈਂਦੇ ਉਹ ਸੱਭ ਕਮਾਇਆ।
ਇਜ਼ਤ ਅਸਮਤ ਸਭ ਲੁੱਟ ਲੀਤੀ,
ਭੁੱਖ ਦੁੱਖ ਹਰ ਘਰ, ਨੰਗ ਦਾ ਸਾਇਆ।
ਇਨਸਾਨਾਂ ਜਹੀ ਗੱਲ ਨਾ ਕਿਧਰੇ
ਸ਼ਰਮ ਧਰਮ ਨੂੰ ਗੁੱਠੇ ਲਾਇਆ।
ਬਾਬਾ ਨਾਨਕ ਤਾਰਨ ਆਇਆ


ਝੂਠ ਦਾ ਡੰਕਾ ਵੱਜ ਰਿਹਾ ਸੀ
ਮੂੰਹ ਇਨਸਾਫ ਵੀ ਕੱਜ ਰਿਹਾ ਸੀ
ਜੀਣ ਦਾ ਨਾ ਕੋਈ ਚੱਜ ਰਿਹਾ ਸੀ
ਉਸਨੇ ਜਗ ਨੂੰ ਰਾਹੇ ਪਾਇਆ
ਬਾਬਾ ਨਾਨਕ ਤਾਰਨ ਆਇਆ
ਲੁੱਟਣ ਪੰਡਿਤ ਅਤੇ ਮਲਾਣੇ
ਸੱਚ ਧਰਮ ਨੂੰ ਕੋਈ ਨਾ ਜਾਣੇ
ਚੂੰਡਣ ਜਨਤਾ ਰਾਜੇ ਰਾਣੇ
ਭਰਮਾਂ ਵਿੱਚ ਲੋਕਾਂ ਨੂੰ ਪਾਇਆ
ਜਦ ਕਿਧਰੋਂ ਕੋਈ ਆਸ ਕਿਰਨ ਨਾ
ਚਾਨਣ ਛਿੱਟ ਗੁਰ ਨਾਨਕ ਲਿਆਇਆ।
ਆਕੇ ਸਭ ਦਾ ਦਰਦ ਵੰਡਾਇਆ।
ਬਾਬਾ ਨਾਨਕ ਤਾਰਨ ਆਇਆ
ਆਕੇ ਸੱਚ ਦਾ ਪਾਠ ਪੜ੍ਹਾਇਆ।
ਕਿਰਤ ਕਰਦਿਆਂ ਨਾਮ ਜਪਾਇਆ।
ਪੰਗਤ ਵਿਚ ਬਹਿਣ ਸਿਖਾਇਆ
ਸਭਨਾਂ ਦਾ ਰੱਬ ਇੱਕ ਸਮਝਾਇਆ
ਰਾਜਾ ਰੰਕ ਦਾ ਭੇਦ ਮਿਟਾਇਆ
ਬਾਬਾ ਨਾਨਕ ਤਾਰਨ ਆਇਆ।