Poem Punjabi ਸਤਿਨਾਮ ਕਰਤਾਰ

[Dalvinder Singh Grewal]

ਖੁੱਲੇ ਅੰਬਰ ਕੀਤੀ ਸੈਰ।
ਮੱਲੋ ਮੱਲੀ ਉਠਦੇ ਪੈਰ।
ਰੱਬਾ ਏਵੇਂ ਚਲਦਾ ਰੱਖੀਂ
ਚੰਗੀ ਸਿਹਤ ਦੀ ਮੰਗਾਂ ਖੈਰ।

 

[Dalvinder Singh Grewal]

ਫੁੱਲਾਂ ਨਾਲ ਸੰਜੋਇਆ ਰੁੱਖ
ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ

ਫੁੱਲਾਂ ਨਾਲ ਸੰਜੋਇਆ ਰੁੱਖ । ਭਾਗਾਂ ਵਾਲੇ ਹੋਇਆ ਰੁਖ।

ਖੁਸ਼ ਹੋ ਵੰਡੇ ਖੁਸ਼ਬੂ ਸਾਰੇ। ਤਾਂਹੀ ਇਸ ਨੂੰ ਹਰ ਕੋਈ ਪਿਆਰੇ।

ਧੁਰ ਤੋਂ ਹੀ ਵਰੋਸਾਇਆ ਹੋਇਆ। ਰੱਬ ਨੇ ਸਮਝ ਬਣਾਇਆ ਹੋਇਆ।

ਖੁਸ਼ੀਆਂ ਨਾਲ ਪਰੋਇਆ ਰੁੱਖ। ਫੁੱਲਾਂ ਨਾਲ ਸੰਜੋਇਆ ਰੁੱਖ।

ਹਰ ਪਾਸੇ ਰੁੱਖਾਂ ਦਾ ਮੇਲਾ। ਫੁੱਲਾਂ ਵਾਲਾ ਵੱਖ ਅਕੇਲਾ।

ਇਹ ਰੁੱਖ ਹੈ ਸ਼ਾਹਾਂ ਦਾ ਸ਼ਾਹ। ਖੁਸ਼ਬੂ ਵੰਡਦਾ ਬੇਪਰਵਾਹ।

ਵੰਡਦਾ ਦਾਨੀ ਹੋਇਆ ਰੁਖ। ਫੁੱਲਾਂ ਨਾਲ ਸੰਜੋਇਆ ਰੁੱਖ।

 

[Dalvinder Singh Grewal]

ਨਾਮ ਜਪਣ ਦੀ ਪਾ ਮਨ ਮਤ ਦਾਤਾ
ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ

ਸਦਾ ਸਤ ਦਾਤਾ ਮੇਰੇ, ਪ੍ਰਾਣ ਪਤ ਦਾਤਾ ।
ਨਾਮ ਜਪਣ ਦੀ ਪਾ, ਮਨ ਮਤ ਦਾਤਾ ।
ਉਠਦੇ ਬਹਿੰਦੇ ਖਾਂਦੇ ਪੀਂਦੇ,
ਨਾਮ ਸਹਾਰੇ ਰਹੀਏ ਜੀਂਦੇ,
ਨਾਮ ਚ ਤਨ, ਮਨ, ਮਿਝ, ਰਤ, ਦਾਤਾ ।
ਸਦਾ ਸਤ ਦਾਤਾ, ਮੇਰੇ ਪ੍ਰਾਣ ਪਤ ਦਾਤਾ ।
ਕਰਕੇ ਦੇਖੀ ਦੁਨੀਆਦਾਰੀ,
ਚੈਨ ਦੀ ਥਾਂ ਤੇ ਮਿਲੀ ਖੁਆਰੀ,
ਨਾਮ ਖੁਮਾਰੀ ਕੀਕੂੰ ਮਿਲਦੀ,
ਪੰਜ ਵਿਕਾਰਾਂ ਦੀ ਲਤ ਦਾਤਾ ।
ਸਦਾ ਸਤ ਦਾਤਾ, ਮੇਰੇ ਪ੍ਰਾਣ ਪਤ ਦਾਤਾ ।
ਪੰਜ ਵਿਕਾਰੋਂ, ਮੋਹ ਮਾਇਆ ਪਾਰੋਂ,
ਆਣ ਬਚਾ ਇਸ ਜੀਵਨ ਹਾਰੋਂ।
ਕਰਿ ਕਿਰਪਾ, ਦੇ ਨਾਮ ਦਾ ਅੰਮ੍ਰਿਤ,
ਤੇਰੇ ਨਾ ਤੇ ਇਹ ਖਤ ਦਾਤਾ ।
ਸਦਾ ਸਤ ਦਾਤਾ ਮੇਰੇ ਪ੍ਰਾਣਪਤ ਦਾਤਾ ।
ਨਾਮ ਜਪਣ ਦੀ ਪਾ ਮਨ ਮਤ ਦਾਤਾ।

 

[swarn bains]

ਕਰਿ ਕਿਰਪਾ, ਦੇ ਨਾਮ ਦਾ ਅੰਮ੍ਰਿਤ,
ਤੇਰੇ ਨਾ ਤੇ ਇਹ ਖਤ ਦਾਤਾ ।
ਸਦਾ ਸਤ ਦਾਤਾ ਮੇਰੇ ਪ੍ਰਾਣਪਤ ਦਾਤਾ ।
ਨਾਮ ਜਪਣ ਦੀ ਪਾ ਮਨ ਮਤ ਦਾਤਾ।
well done brother

 

[Dalvinder Singh Grewal]

ਆਸਰਾ ਤੇਰੇ ਨਾਮ ਦਾ

ਡਾਕਟਰ ਦਲਵਿੰਦਰ ਸਿੰਘ ਗ੍ਰੇਵਾਲ

ਆਸਰਾ ਤੇਰੇ ਨਾਮ ਦਾ ਪਰਮਾਤਮਾ, ਓਟ ਤੇਰੀ ਦੇ ਸਹਾਰੇ ਜੀ ਰਿਹਾਂ।

ਤੇਰੇ ਬਿਨ ਸੰਗ ਹੋਰ ਕਿਹੜਾ ਉਮਰ ਭਰ, ਬਦਲਦੇ ਸਾਥੀ ਨਵੇਲੇ ਹੀ ਰਿਹਾਂ ॥

ਮਾਂ ਪਿਓ ਦਾ ਸਾਥ ਮੁਢਲਾ ਆਸਰਾ, ਫਿਰ ਭਰਾ ਭੈਣਾਂ ਦਾ ਹੋਇਆ ਆਸਰਾ

ਦੋਸਤਾਂ ਸੰਗ ਦੋਸਤੀ ਵੀ ਪੈ ਗਈ, ਫਿਰ ਮਿਲੀ ਵਹੁਟੀ ਸੰਗ ਚੰਗਾ ਗੁਜ਼ਰਿਆ।

ਬੱਚਿਆਂ ਦਾ ਆਸਰਾ ਸੀ ਸਾਲ ਕੁਝ, ਪੁੱਛਦਾ ਨਾ ਹੁਣ ਕੋਈ ਸੁਪਨੇ ਸੀ ਰਿਹਾਂ।

ਆਸਰਾ ਤੇਰੇ ਨਾਮ ਦਾ ਪਰਮਾਤਮਾ, ਓਟ ਤੇਰੀ ਦੇ ਸਹਾਰੇ ਜੀ ਰਿਹਾਂ।

ਸਮਝ ਹੁਣ ਆਈ ਕਿ ਹਰਦਮ ਸਾਥ ਤੂੰ, ਨਾਲ ਤੇਰੇ ਜੁੜਨ ਬਿਨ ਚਾਰਾ ਨਹੀਂ।

ਸ਼ੁਕਰ ਕਰਦਾ ਹਾਂ ਜਦੋਂ ਕੁਝ ਸੰਵਰਦਾ, ਤਦ ਕਰਾਂ ਅਰਦਾਸ ਜਦ ਪਿਆਰਾ ਨਹੀਂ ।

ਨਾਮ ਦੀ ਜਦ ਦੀ ਖੁਮਾਰੀ ਚੜ੍ਹ ਗਈ, ਨਿਸ਼ਚਿੰਤ ਹੋ ਮੈ ਨਾਮ ਅੰਮ੍ਰਿਤ ਪੀ ਰਿਹਾਂ।

ਆਸਰਾ ਤੇਰੇ ਨਾਮ ਦਾ ਪਰਮਾਤਮਾ, ਓਟ ਤੇਰੀ ਦੇ ਸਹਾਰੇ ਜੀ ਰਿਹਾਂ।

ਜੋ ਜਨਮ ਤੋਂ ਜੁੜ ਗਏ ਨੇ ਨਾਮ ਸੰਗ, ਹੋਰ ਚੰਗੇ ਲੇਖ ਕਿਸ ਦੇ ਹੋਣਗੇ ।

ਨਾਮ ਤੋਂ ਵਾਂਝੇ ਨੇ ਰਹਿੰਦੇ ਭਟਕਦੇ, ਜੀਣ ਤੋਂ ਲੈ ਕੇ ਮਰਨ ਤੱਕ ਰੋਣਗੇ।

ਨਾਮ ਸੰਗ ਜੁੜ ਕੇ ਲਖੀਣਾ ਹੋ ਗਿਆਂ, ਜਗਤ ਵਿੱਚ ਰਹਿੰਦੇ ਹੀ ਸੁਰਗੀਂ ਥੀ ਰਿਹਾਂ।

ਅਸਰਾ ਤੇਰੇ ਨਾਮ ਦਾ ਪਰਮਾਤਮਾ, ਓਟ ਤੇਰੀ ਦੇ ਸਹਾਰੇ ਜੀ ਰਹੇ ਹਾਂ।

 

[Dalvinder Singh Grewal]

ਹਰ ਥਾਂ ਤੇ ਜੋ ਹਾਜ਼ਰ ਦਿਸਦਾ
ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ

ਰੱਬ ਦਾ ਹੋਣਾ ਜਾਂ ਨਾਂ ਹੋਣਾ, ਇਹ ਤਾਂ ਕੋਈ ਸਵਾਲ ਨਹੀਂ ।
ਜੋ ਹਰ ਥਾਂ ਤੇ ਹਾਜ਼ਰ ਦਿਸਦਾ, ਕੌਣ ਕਹੂ, ਮੇਰੇ ਨਾਲ ਨਹੀਂ ।
ਜੰਗਲ ਬੇਲੇ ਪਰਬਤ ਥਲ ਵਿੱਚ, ਮੈਂ ਨਾ ਉਸਨੂੰ ਲੱਭਦਾ ਹਾਂ,
ਅੰਦਰ ਬਾਹਰ ਹਰ ਥਾਂ ਹਾਜ਼ਰ, ਮੈਨੂੰ ਉਸ ਦੀ ਭਾਲ ਨਹੀਂ ।
ਜੋ ਹੈ, ਉਸਨੂੰ ਮੰਨਾ ਕਿਉਂ ਨਾਂ, ਉਸਦੀ ਹੋਂਦ ਚੁਫੇਰੇ ਹੈ,
ਇੱਕੋ ਸੱਚਾ ਉਹ ਹੀ ਆਖਰ, ਬਾਕੀ ਕਿਸਦਾ ਕਾਲ ਨਹੀਂ ?
ਸੱਚ ਨੂੰ ਮੰਨਣ ਤੋਂ ਇਨਕਾਰੀ ਬੰਦਾ, ਟੱਕਰਾਂ ਥਾਂ ਥਾਂ ਮਾਰ ਰਿਹਾ,
ਆਪਣੇ ਅੰਦਰ ਵੇਖ ਲਵੇ ਤਾਂ ਝੱਲ ਹੋਣੀ ਫਿਰ ਝਾਲ ਨਹੀਂ ।
ਬਦਲਣਹਾਰੇ ਜੱਗ ਵਿਚ ਹਰ ਕੋਈ ਜੱਗ ਤੋਂ ਚਲਣਹਾਰਾ ਹੈ।
ਇਕ ਐਟਮ ਵੀ ਨਹੀਂ ਅਜਿਹਾ ਜਿਸ ਵਿੱਚ ਲਾਗੂ ਚਾਲ ਨਹੀਂ।
ਸੱਚੇ ਦਾ ਸੱਚ ਮੰਨ ਕੇ ਉਸਦੇ ਨਾਮ ‘ਚ ਜੁੜਿਆ ਰਹਿ ਸਜਣਾ,
ਉਸਤੋਂ ਟੁੱਟਿਆਂ ਕਟੀ ਪਤੰਗ ਜਿਉਂ, ਬਚਣਾ ਕਿਸੇ ਵੀ ਹਾਲ ਨਹੀਂ।

 

[Dalvinder Singh Grewal]

ਮਿਹਰਾਂ ਦਾ ਮੀਂਹ ਵਰਸਾ ਮੇਰੇ ਦਾਤਿਆ
ਡਾ: ਦਲਵਿਂਦਰ ਸਿੰਘ ਗ੍ਰੇਵਾਲ

ਤਿੰਨ ਵਜੇ ਦਿੰਨਾ ਏਂ ਜਗਾ ਮੇਰੇ ਦਾਤਿਆਾ।
ਚਰਨਾਂ ‘ਚ ਲੈਨਾਂ ਏਂ ਬਿਠਾ ਮੇਰੇ ਦਾਤਿਆ।
ਚੁਪ ਚਾਂ ਤੇ ਸ਼ਾਂਤ ਚਿਤ ਨਾਮ ਤੇਰਾ ਜਪਦਾ ,
ਹੋਰ ਕੁਝ ਜਾਵੇ ਨਾ ਕਿਹਾ, ਮੇਰੇ ਦਾਤਿਆ।
ਤੇਰੇ ਨਾਲ ਜੁੜਦਾ ਧਿਆਨ, ਤੇਰੀ ਕਿਰਪਾ,
ਸੁੱਧ ਬੁੱਧ ਰਹੀ ਨਾ ਪਤਾ ਮੇਰੇ ਦਾਤਿਆ।
ਹੋਇਆ ਮਖਮੂਰ ਮਨ ਦੁਨੀਆ ਤੋਂ ਦੂਰ ਹੈ,
ਚਿੱਤ ਤੇਰੇ ਨਾਲ ਜੁੜ ਗਿਆ, ਮੇਰੇ ਦਾਤਿਆ ।
ਸੁਰਤ ਟਿਕਾਣੇ ਅੱਜ ਟਿਕੀ ਹੋਈ ਦਾiਤਆ,
ਜੱਗ ਦੀ ਨ ਕੋਈ ਪਰਵਾਹ, ਮੇਰੇ ਦਾਤਿਆ।
ਜਗ ਨੂੰ ਭੁਲਾਉਣ ਨਾਲ ਆਪਣੇ ਲਗਾਉਣ ਦੀ ਤਾਂ,
ਤੇਰੇ ਅਦਭੁਤ ਇਹ ਕਲਾ ਹੈ ਮੇਰੀ ਦਾਤਿਆ ।
ਸਾਰਾ ਬ੍ਰਹਮੰਡ ਮੇਰੇ ਅੰਦਰ ਸਮਾਇਆ ਜਾਪੇ,
ਤੱਕੀ ਜਾਵਾਂ ਰਚਨਾ ਅਥਾਹ, ਮੇਰੇ ਦਾਤਿਆ।
ਇਨਾਂ ਕੁਝ ਹੋਵੇ ਨਾ ਬਿਆਨ ਹਾਂ ਮੈਂ ਚੁੱਪ ਚੁੱਪ,
ਆਖੀ ਜਾਵਾਂ ਇੱਕੋ ਵਾਹ ਵਾਹ, ਮੇਰੇ ਦਾਤਿਆ ।
ਮਹਿਮਾ ਕੀ ਬਖਾਣਾ, ਤੂੰ ਤਾਂ, ਗੁਣਾਂ ਦਾ ਖਜ਼ਾਨਾ ਏਂ,
ਗੁਣ ਮੇਰੇ ਚੇਤੇ ਵੀ ਦੇ ਪਾ ਮੇਰੇ ਦਾਤਿਆ ।
ਸਦਾ ਇਉਂ ਚਰਨਾਂ ਚ ਜੋੜੀ ਰੱਖੀਂ ਹਰ ਵੇਲੇ,
ਮਿਹਰਾਂ ਦਾ ਇਉਂ ਮੀਂਹ ਵਰਸਾ ਮੇਰੇ ਦਾਤਿਆ।

 

[Dalvinder Singh Grewal]

ਅਪਣਾ ਨਾਮੁ ਜਪਾਈ ਚੱਲ
ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ

ਅਪਣਾ ਨਾਮੁ ਜਪਾਈ ਚੱਲ ।
ਹੋਰ ਨ ਕੋਈ ਹੋਵੇ ਗੱਲ।
ਆਪਣੇ ਚਰਨੀ ਲਾਈ ਰੱਖ,
ਸੋਚਾਂ ਨੂੰ ਪਾ ਏਵੇਂ ਠੱਲ੍ਹ।
ਹੋਰ ਕਿਸੇ ਤੋਂ ਲੈਣਾ ਕੀ,
ਹੋਣਾਂ ਤੈਥੋਂ ਸਭ ਜਦ ਹੱਲ।
ਤੇਰੀਆਂ ਰਿਸ਼ਮਾਂ ਚਿੱਤ ਰੁਸ਼ਨਾਵਣ,
ਚਾਹੀਦੇ ਬਸ ਏਹੋ ਪਲ ।
ਕਿਰਪਾ ਕਰਕੇ ਜੋੜੀ ਰੱਖ
ਮਨ ਨਾ ਆਸੇ ਪਾਸੇ ਘੱਲ।
ਆਪਣਾ ਨਾਮ ਜਪਾਈ ਚੱਲ
ਹੋਰ ਨ ਕੋਈ ਸੁਝੇ ਗੱਲ ।
ਅਪਣੇ ਚਰਨੀ ਲਾਈ ਰੱਖ ,
ਸੋਚਾਂ ਨੂੰ ਪਾ ਇਵੇਂ ਠੱਲ।

 

[Dalvinder Singh Grewal]

ਤੇਰਾ ਨਾਮ

ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ


ਮੇਰੀ ਹਰ ਬਿਮਾਰੀ ਦਾ ਇਲਾਜ ਤੇਰਾ ਨਾਮ।

ਆਪੇ ਹੀ ਸੰਵਾਰੇ ਸਾਰੇ ਕਾਜ ਤੇਰਾ ਨਾਮ।

ਤੇਰੇ ਦਰ ਆ ਕੇ ਕੀਤੀ ਫਿਰ ਅਰਦਾਸ ।

ਰਖਦਾ ਹੀ ਆਇਆ ਮੇਰੀ ਲਾਜ ਤੇਰਾ ਨਾਮ

ਮੇਰੀ ਹਰ ਬਿਮਾਰੀ ਦਾ ਇਲਾਜ ਤੇਰਾ ਨਾਮ।

ਉਮਰ ਵਡੇਰੀ ਘਟੀ ਜਾਂਦਾ ਸਾਹ ਵੀ ਚੱਲੇ ਹਾਰ

ਖੁਦ ਨੂੰ ਸੰਭਾਲਣਾ ਵੀ ਵੱਸ ਤੋਂ ਹੈ ਬਾਹਰ

ਢਕਦਾ ਏ ਮੇਰੇ ਸਾਰੇ ਪਾਜ ਤੇਰਾ ਨਾਮ।

ਤੇਰੇ ਗੁਣ ਏਨੇ ਨਾ ਬਿਆਨ ਕੀਤੇ ਜਾਂਦੇ,

ਪਰ ਸਾਰੇ ਗੁਣ ਤੇਰੇ ਨਸਾਮ ਚ ਸਮਾਂਦੇ,

ਆਪੇ ਚ ਸਮੋਈ ਬੈਠਾ ਰਾਜ਼ ਤੇਰਾ ਨਾਮ।

ਮਾਣ ਤਾਣ ਮੁਕਿਆ ਨਾਂ ਤਨ ਵਿੱਚ ਜ਼ੋਰ,

ਤੇਰਾ ਹੀ ਹੈ ਆਸਰਾ ਸਹਾਰਾ ਨਾਂ ਏ ਹੋਰ।

ਮੈਨੂੰ ਇਕੋ ਲਗਦਾ ਏ ਤਾਜ ਤੇਰਾ ਨਾਮ

ਮੇਰੀ ਹਰ ਬਿਮਾਰੀ ਦਾ ਇਲਾਜ ਤੇਰਾ ਨਾਮ।

 

[Dalvinder Singh Grewal]

ਸੱਭ ਮੌਲਾ ਮੌਲਾ ਲੱਗਦਾ ਹੈ
ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ
ਜਦ ਤੱਕ ਮੈਂ ਉਸਦੀ ਸੋਚਾਂ ਨਾ, ਮਨ ਝੌਲਾ ਝੌਲਾ ਲਗਦਾ ਹੈ।
ਇਕ ਦੋ ਕਵਿਤਾਵਾਂ ਲਿਖ ਲਾਂ ਜਦ, ਦਿਲ ਹੌਲਾ ਹੌਲਾ ਲੱਗਦਾ ਹੈ।
ਮੇਰੀ ਕਲਮ ਚ ਆ ਜਦ ਬਹਿ ਜਾਂਦਾ, ਇਸ ਕਲਮ ਚੋਂ ਅੰਮ੍ਰਿਤ ਵਹਿ ਜਾਂਦਾ
ਹਰ ਪਾਸੇ ਫਿਤਰਤ ਕੁਦਰਤ ਦੀ, ਵਿੱਚ ਮੌਲਾ ਮੌਲਾ ਲਗਦਾ ਹੈ।
ਦੁਨੀਆਂ ਵਿੱਚ ਜੀਣਾ ਸੌਖਾ ਨਾਂ, ਨਾ ਸ਼ਾਂਤ ਚਿਤ, ਨਾ ਟੇਕ ਲਗੇ,
ਆਵਾਜ਼ਾਂ ਨੇ ਪੀੜਾ-ਦਰਦ ਦੀਆਂ, ਸਭ ਰੌਲਾ ਰੌਲਾ ਲੱਗਦਾ ਹੈ ।
ਜੋ ਹੋ ਗਏ ਰੱਬ ਦੇ, ਨਿੱਤਰ ਗਏ, ਨੂਰਾਨੀ ਰੂਹਾਂ ਝਲਕਦੀਆਂ,
ਜੋ ਰੱਬ ਸੰਗ ਜੁੜਿਆ, ਦੁਨੀਆਂ ਨੂੰ ਕਿਉਂ ਬਉਲਾ ਬਉਲਾ ਲੱਗਦਾ ਹੈ
ਜੇ ਸੱਚ ਦੀ ਤਹਿ ਤੱਕ ਜਾਣਾ ਹੈ, ਛੱਡ ਝੰਝਟ ਸਭ, ਜੁੜ ਜਾ ਇਕ ਨੂੰ,
ਜੁੜਿਆਂ ਨੂੰ ਸਭ ਜੱਗ ਇੱਕ ਦਿਸਦਾ, ਸੱਭ ਮੌਲਾ ਮੌਲਾ ਲਗਦਾ ਹੈ।

 

[Dalvinder Singh Grewal]

ਧੰਨ ਗੁਰ ਨਾਨਕ

ਡਾ ਦਲਵਿੰਦਰ ਸਿੰਘ ਗੇਵਾਲ

ਚਾਰੇ ਕੂੰਟੀਂ ਚੱਕਰ ਲਾਇਆ, ‘ਇੱਕੋ ਰੱਬ’, ਸੰਦੇਸ਼ ਸੁਣਾਇਆ ।

ਮੈਨੂੰ ਸਮਝ ਨਾ ਆਏ ਕੀਕੂੰ, ਗੁਰੂ ਨਾਨਕ ਨੇ ਜਗਤ ਹਿਲਾਇਆ।

ਜੰਗਲ, ਪਰਬਤ, ਮੈਦਾਨਾਂ ਦੀ, ਉਸਨੇ ਕੋਈ ਪਰਵਾਹ ਨਾ ਕੀਤੀ।

ਪੈਦਲ ਉਸਨੇ ਦੇਸ਼ ਵਿਦੇਸ਼ੀਂ, ਮੀਲ ਹਜ਼ਾਰਾਂ ਤਹਿ ਕਰ ਲੀਤੀ।

ਸੱਚ, ਹੱਕ, ਇੱਕ ਨਾਮ ਦਾ ਹੋਕਾ, ਦੇ ਕੇ ਸੁੱਤਾ ਜਗਤ ਜਗਾਇਆ।

ਚਾਰੇ ਕੂਟਾਂ ਚਕਰ ਲਾਇਆ, ਇਕ ਰੱਬ ਦਾ ਸੰਦੇਸ਼ ਸੁਣਾਇਆ।

ਲੈ ਬਾਲਾ ਮਰਦਾਨਾ ਸਾਥੀ, ਦੋ ਧਰਮਾਂ ਦਾ ਮੇਲ ਕਰਾਇਆ।

ਕੱਛ ਕਿਤਾਬ, ਹੱਥ ਸੋਟਾ ਲੈ ਕੇ, ਬੀਆਬਾਨ ਨੂੰ ਭਾਗ ਲਗਾਇਆ।

ਧੁਨ ਰਬਾਬ ਦੀ ਮਸਤੀ ਦੇ ਵਿੱਚ ਸ਼ਬਦ-ਸੰਗੀਤ ਦਾ ਮੀਂਹ ਵਰਸਾਇਆ।

ਕਸ਼ਮੀਰ ਤੋਂ ਸ੍ਰੀ ਲੰਕਾ ਤੀਕਰ, ਜੋ ਮਿਲਿਆ ਸੋ ਚਰਨੀ ਆਇਆ।

ਰਾਜਸਥਾਨੋਂ ਥਾਈਲੈਂਡ ਤੱਕ, ਲੱਖਾਂ ਨੂੰ ਏ ਸਿੱਖ ਬਣਾਇਆ ।

ਤਿੱਬਤ, ਚੀਨ ਤੇ ਪੂਰਬ ਏਸ਼ੀਆ ਫਿਰ ਅਫਰੀਕਾ ਚਰਨ ਟਿਕਾਇਆ।

ਸ਼ਬਦ ਸੰਗੀਤ ਧੁਨਾਂ ਦਾ ਅੰਮ੍ਰਿਤ ਜਿਸਦੇ ਵੀ ਕੰਨਾਂ ਵਿੱਚ ਪਾਇਆ ।

ਸਦਾ ਲਈ ਉਸਦਾ ਹੋ ਕੇ ਰਹਿ ਗਿਆ, ਸੱਚ ਸੁੱਚ ਦਾ ਪਾਠ ਪੜ੍ਹਾਇਆ ।

ਲੰਗਰ ਵੀਹ ਦਾ ਕਦੇ ਨਾ ਰੁਕਦਾ, ਹਰ ਭੁੱਖੇ ਨੂੰ ਖੂਬ ਰਜਾਇਆ।

ਨਾਰੀ-ਮਰਦ ਬਰਾਬਰ ਸਾਰੇ, ਊਚ ਨੀਚ ਦਾ ਭੇਦ ਮਿਟਾਇਆ।

ਤੋੜੀ ਕੜੀ ਗੁਲਾਮੀ ਦੀ ਤੇ ਫਰਜ਼ ਮਾਨਵੀ ਕੀ? ਸਮਝਾਇਆ।

ਚੋਰਾਂ-ਠੱਗਾਂ ਨੂੰ ਰਾਹ ਪਾਇਆ, ਲੁੱਟ ਖੋਹ ਛੱਡ ਮਿਹਨਤ ਲੜ ਲਾਇਆ।

ਕਿਰਤ ਕਰੋ ਤੇ ਨਾਮ ਜਪੋ ਕਹਿ, ਵੰਡ ਛੱਕਣ ਦਾ ਪਾਠ ਪੜ੍ਹਾਇਆ।

ਵੀਹ ਰੁਪਈਏ ਦਾ ਲੈ ਸੀਧਾ ਸਾਧਾਂ ਸੰਤਾਂ ਦੇ ਮੂੰਹ ਪਾਇਆ।

ਕੀ ਕੀ ਉਸਦੀ ਦੇਣ ਸੁਣਾਵਾਂ, ਸਿੱਖ ਧਰਮ ਜਦ ਦਾ ਚਲਵਾਇਆ।

ਕਈ ਕ੍ਰੋੜਾਂ ਸਿੱਖ ਬਣ ਗਏ, ਸਾਰੇ ਜੱਗ ਵਿੱਚ ਨਾਮ ਕਮਾਇਆ।

ਧੰਨ ਗੁਰ ਨਾਨਕ, ਧੰਨ ਗੁਰ ਨਾਨਕ, ਤੇਰਾ ਨਾਮ ਜਗਤ ਵਿੱਚ ਛਾਇਆ।

 

[Dalvinder Singh Grewal]

ਜੋ ਕੁਦਰਤ ਨੂੰ ਖੋਜਦਾ ਰੰਗ ਸਮਝੇ ਸੋਈ

ਡਾ ਦਲਵਿੰਦਰ ਸਿੰਘ ਗੇਵਾਲ

ਆਏ ਬੱਦਲ ਸਾਗਰੋਂ, ਕਰ ਸਫਰ ਲੰਮੇਰਾ ।

ਸੂਰਜ ਪਿੱਛੇ ਛਿਪ ਗਿਆ, ਛਾ ਗਿਆ ਹਨੇਰਾ।

ਕੁਝ ਵਧਦੇ ਰੋਕੇ ਪਰਬਤਾਂ ਵਾਹ ਟੱਕਰ ਲਾਈ

ਕੁਝ ਫਟ ਗਏ, ਕੁਝ ਵਰ੍ਹ ਪਏ, ਭਰ ਨਦੀਆਂ ਨਾਲੇ।

ਕੁਝ ਮੁੜੇ ਮੈਦਾਨਾਂ ਵੱਲ ਨੂੰ, ਭੂਰੇ ਤੇ ਕਾਲੇ ।

ਕਿਤੇ ਮੋਹਲੇ ਧਾਰ ਨੇ ਵਰਸਦੇ ਕਰ ਪਾਣੀ ਪਾਣੀ ।

ਹੜ੍ਹ ਥਾਂ ਥਾਂ ਆਇਆ, ਉਜੜੇ, ਪਈ ਜਾਨ ਬਚਾਣੀ।

ਕੁਝ ਛਿੜਕਾ ਛੰਬਾ ਕਰ ਗਏ, ਕੁਝ ਕਿਣਮਣ ਕਾਣੀ ।

ਕੁਝ ਕਾਲੇ ਭੂਰੇ ਰਹਿ ਗਏ ਚਿੱਟਿਆਂ ਦੇ ਹਾਣੀ।

ਵਾ ਠੰਢੀ ਵਗੀ ਤਾਂ ਤਪਸ ਤੋਂ ਸਾਹ ਸੌਖਾ ਆਇਆ ।

ਸੌਣ ਮਹੀਨਾ ਦਰਤ ਲਈ ਹੈ ਕਿਸਮਤ ਲਿਆਇਆ।

ਪਿਆਰ ਪ੍ਰਗਟਾਵਾ ਕਰਨ, ਲਗ ਰੁੱਖਾਂ ਗਲ ਵੇਲਾਂ।

ਖੁਸ਼ ਚਹਿਕਣ ਪੰਛੀ ਖੇਡਦੇ ਮਨ ਆਈਆਂ ਖੇਲ੍ਹਾਂ।

ਸੁੱਚਾ ਪਾਣੀ ਪੀ ਕੇ, ਧਰਤੀ ਧੰਨ ਹੋਈ।

ਜੋ ਕੁਦਰਤ ਨੂੰ ਖੋਜਦਾ ਰੰਗ ਸਮਝੇ ਸੋਈ।

 

[Dalvinder Singh Grewal]

ਜਦ ਬਦਨ ਮਿਹਨਤਾਂ ਕਰਦਾ ਹੈ
ਡਾ ਦਲਵਿੰਦਰ ਸਿੰਘ ਗੇਵਾਲ

ਜਦ ਬਦਨ ਮਿਹਨਤਾਂ ਕਰਦਾ ਹੈ।
ਤਨ ਤੇ ਤਦ ਮੁੜ੍ਹਕਾ ਭਰਦਾ ਹੈ ।
ਕਈ ਵਾਰ ਧਰਾਲਾਂ ਪੈਂਦੀਆਂ ਨੇ।
ਕੰਮ ਕੀਤਾ ਮਿਹਨਤਾਂ ਕਹਿੰਦੀਆਂ ਨੇ ।
ਸੁੱਖ ਲਈ ਦੁੱਖ ਬੰਦਾ ਜਰਦਾ ਹੈ ।
ਜਦ ਬਦਨ ਮਿਹਨਤਾਂ ਕਰਦਾ ਹੈ।
ਕੁਝ ਖੇਤਾਂ ਦੇ ਵਿੱਚ ਜੂਝ ਰਹੇ।
ਕੁਝ ਘਰ ਚੁੱਲੇ ਅੱਗ ਮੂਹਰੇ ਨੇ ।
ਕੰਮ ਕਰਨਾ ਸਜ਼ਾ ਹੈ ਬੰਦੇ ਨੂੰ
ਕੁਝ ਖੁਸ਼ ਨੇ ਤੇ ਕੁਝ ਝੂਰੇ ਨੇ ।
ਇਹ ਬਦਨ ਚਲਾਉਣਾ ਪੈਂਦਾ ਹੈ ।
ਜਿਸ ਲਈ ਕਮਾਉਣਾ ਪੈਂਦਾ ਹੈ।
ਕੰਮ ਕੀਤੇ ਬਿਨ ਨਾ ਸਰਦਾ ਹੈ
ਜਦ ਬਦਨ ਮਿਹਨਤਾਂ ਕਰਦਾ ਹੈ।
ਜੋ ਬਦਨ ਨਾ ਚੱਲੇ, ਖੜ੍ਹ ਜਾਂਦਾ
ਸਿਰ ਆਲਸ ਭੂਤ ਵੀ ਚੜ੍ਹ ਜਾਂਦਾ।
ਵਿਹਲੜ ਤਾਂ ਭੁੱਖਾ ਮਰਦਾ ਹੈ ।
ਜਦ ਬਦਨ ਮਿਹਨਤਾਂ ਕਰਦਾ ਹੈ ।
ਕਰ ਮਿਹਨਤ ਖਾਣਾ ਚੰਗਾ ਹੈ ।
ਮੁੜ੍ਹਕੇ ਚ ਨਹਾਣਾ ਚੰਗਾ ਹੈ ।
ਤੇਜ਼ਾਬ ਸਰੀਰੋਂ ਚੱਲਦਾ ਹੈ।
ਜਦ ਬਦਨ ਮਿਹਨਤਾਂ ਕਰਦਾ ਹੈ।
ਘਰ ਮਿਹਨਤ ਖਾ ਕੇ ਸੌਂਦੇ ਜੋ।
ਢੌਂਕੇ ਰੱਜ ਕੇ ਨੇ ਲਾਉਂਦੇ ਉਹ।
ਰੱਬ ਦੁਖ ਉਨ੍ਹਾਂ ਦੇ ਹਰਦਾ ਹੈ ।
ਜੋ ਬਦਨ ਮਿਹਨਤਾਂ ਕਰਦਾ ਹੈ।