ਮੰਜ਼ਿਲ
ਡਾ. ਡੀ. ਪੀ. ਸਿੰਘ
ਏਕੰਕਾਰੁ ਏਕੰਕਾਰੁ ਕਹੇ ਸੱਭ ਕੋਈ,
ਪਰ ਇਸ ਦਾ
ਭੇਦ ਅਲੌਕਿਕ,
ਬਹੁਤ ਸੁਭਾਗਾ ਵਿਰਲਾ ਪਾਵੇ।
ਧਰਮ ਖੰਡ ਦਾ ਗੁਰਮੁਖ ਵਾਸੀ,
ਗਿਆਨ ਮੰਡਲ ਦੀ ਸੋਝੀ ਪਾ,
ਸਰਮ ਖੰਡ ਪਰਪੱਕਤਾ ਪਾਵੇ।
ਤਦ ਹੀ ਉਹ
ਕਰਮ ਖੰਡ ਦੇ ਯੋਗ ਕਹਾਵੇ।
ਧਰਮ ਖੰਡ ਤੋਂ ਸੱਚ ਮੰਡਲ ਦਾ
ਲੰਮਾ ਪੈਂਡਾ
ਸੱਚੇ ਸੁੱਚੇ ਜੀਵਨ ਸੰਗ
ਪਲ ਪਲ ਅੰਦਰ ਸਿਮਟਦਾ ਜਾਵੇ।
ਨਦਰ-ਕਰਮ ਦੀ ਰਹਿਮਤ ਦੇ ਸੰਗ
ਤਦ, ਉਹ ਸਚਿਆਰਾ
ਸੱਚਖੰਡ ਵਾਸੀ
ਏਕੰਕਾਰੁ ਰੂਪ ਬਣ ਜਾਵੇ।
ਅੰਤਮ ਸੱਚ ਦਾ
ਰੂਪ ਧਾਰ
ਉਹ ਸਚਿਆਰ
ਸਫ਼ਲ ਜੀਵਨ ਦੀ ਮੰਜ਼ਿਲ ਪਾਵੇ।
*********
Last edited:
