Poem Punjabi ਸਤਿਨਾਮ ਕਰਤਾਰ

[swarn bains]

ਦਿਲ ਵਿਚ ਵਸਦਾ


ਏਥੇ ਤੂੰ ਹੈ, ਉਥੇ ਤੂੰ ਹੈਂ ਜ਼ਮੀਂ ਤੂੰ ਜ਼ਮਾ ਤੂੰ ਹੈ,

ਕਾਏਨਾਤ ਭੀ ਤੂ ਹੈ, ਜਹਾਂ ਭੀ ਤੂੰ ਹੈ

ਮੇਰੇ ਦਿਲ ਵਿਚ ਤੂੰ ਵਸਦਾ, ਮੇਰਾ ਮੁਰਸ਼ਦ ਰਾਹ ਦੱਸਦਾ

ਮੈਂ ਸਜਦੇ ਕਰ ਕਰ ਹੰਭ ਗਿਆ, ਪਰ ਪਤਾ ਸਤਾ ਨੀ ਦੱਸਦਾ

ਬਾਵਨ ਜੁਗ ਹਨੇਰੇ ਬੈਠਾ, ਤੈਨੂੰ ਸੂਝ ਬੂਝ ਨ ਕਾਈ

ਅੰਦਰ ਛੁਪਿਆ ਗੁਰੂ ਸਾਧਿਆ, ਤੇਰੀ ਸੋਚ ਬਦਲਾਈ

ਪਹਿਲਾਂ ਸੋਚ ਨ ਸਕਿਆ, ਹੁਣ ਮਸਕੜੀਆਂ ਹਸਦਾ

ਹਰ ਜੀਵ ਮਨ ਵਿਚ ਸੋਚਦਾ, ਦੁਖ ਸੁਖ ਕਿਧਰੋਂ ਆਵਣ

ਮਨ ਦੀ ਬੇਚੈਨੀ ਤੜਫਾਵੇ, ਨਿੱਤ ਮਨ ਦੇ ਘੋੜੇ ਦੁੜਾਵਣ

ਅੱਜ ਇਥੇ ਕੱਲ੍ਹ ਬਣ ਪਰਦੇਸੀ, ਦਰ ਦਰ ਫਿਰਦਾ ਭੱਜਦਾ

ਦੁਖ ਸੁਖ ਤੇਰੇ ਮਨ ਦੀ ਸੋਚ, ਨਰਕ ਸੁਰਗ ਤੋਂ ਡਰਦਾ

ਦੁਨੀਆਂਦਾਰੀ ਇੰਞ ਬਣਾਈ, ਅੱਜ ਜੰਮਿਆਂ ਕੱਲ੍ਹ ਮਰਦਾ

ਨਰਕ ਸੁਰਗ ਸੋਚ ਚਿੱਤ ਦੀ, ਮਨ ਇੰਞ ਭਜਾਇਆ ਸਭ ਦਾ

ਜੱਗ ਸਾਜ ਤੂੰ ਛੁਪ ਕੇ ਬੈਠਾ, ਦੁਖ ਸੁਖ ਮੇਰੇ ਪੱਲੇ ਪਾਏ

ਮੈਂ ਅਪਣਾ ਮਨ ਸਾਂਭ ਨ ਸਕਿਆ, ਜੰਮਣ ਦੀ ਇਹਾ ਸਜਾਏ

ਜੰਮਣ ਨਾਲੋਂ ਮਰਨਾ ਚੰਗਾ, ਹਿਸਾਬ ਮੁੱਕ ਜਾਏ ਜੱਗ ਦਾ

ਜੋ ਮੈਂ ਕਰਦਾ ਤੂੰ ਜਾਣਦਾ, ਨਿੱਤ ਛੁਪ ਕੇ ਨਜ਼ਰੇ ਮਾਣੇ

ਇਨਸਾਨ ਬਣ ਕੇ ਵੇਖ ਜ਼ਰਾ, ਤੈਨੂੰ ਕੋਈ ਨਾ ਇੱਥੇ ਸਿਆਣੇ

ਤੇਰਾ ਹਿਸਾਬ ਕਰੇਗੀ ਦੁਨੀਆਂ, ਹਿਸਾਬ ਕਰੇਂ ਤੂੰ ਸਭ ਦਾ

ਮੇਰਾ ਮਨ ਬੇਤਾਬ ਹੈ, ਅੜਿਆ, ਮੇਰੇ ਮਨ ਚੋਂ ਬਾਹਰ ਆ

ਮੇਰੇ ਸ੍ਹਾਮਣੇ ਆ ਕੇ ਬਹਿ, ਅਸਾਂ ਮਿਲਣਾ ਗਲਵੱਕੜੀ ਪਾ

ਨੈਣ ਮਿਲਾ ਆਪਣਾ ਬਣਾ, ਮਿਲ ਸੰਗ ਛੁੱਟ ਜਾਏ ਜੱਗ ਦਾ

 

[Dalvinder Singh Grewal]

ਸੌਣ ਮਹੀਨਾ

ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ

ਸੌਣ ਮਹੀਨਾ ਜੀਵਨ ਬਖਸ਼ੇ, ਮੀਹ ਵਿੱਚ ਨੱਚਣ ਬਾਲ ਮਨੁੱਖ ।

ਆਪਸ ਦੇ ਵਿੱਚ ਗੱਡ-ਮੱਡ ਹੋਏ; ਵੇਲਾਂ, ਤਾਰਾਂ, ਝਾੜਾਂ, ਰੁੱਖ ।

ਕਿਣ ਮਿਣ ਕਾਣੀ, ਵਾਛੜ ਤੇ ਫਿਰ, ਮੀਂਹ ਜਦ ਪੈਂਦਾ ਮੁਹਲੇ-ਧਾਰ ।

ਨਦੀਆਂ ਨਾਲੇ ਭਰ ਭਰ ਡੁਲ੍ਹਦੇ, ਕਰਦਾ ਮਿਹਰਾਂ ਵਾਹ ਕਰਤਾਰ।

ਧਰਤੀ ਦੀ ਤੇਹ ਮਿਟ ਜਾਂਦੀ ਹੈ, ਜੀਵ-ਜੰਤ, ਰੁਖ ਵੀ ਸ਼ਰਸਾਰ।

ਵੇਸ ਨਵੇਲੇ ਵਿੱਚ ਖੁਦ ਆ ਕੇ, ਈਸ਼ਵਰ ਦੇਂਦਾ ਹੈ ਦੀਦਾਰ।

ਹਰਿਆਵਲ ਦਾ ਵਸਤਰ ਪਾਕੇ, ਕੁਦਰਤ ਵੰਡਦੀ ਸਭ ਨੂੰ ਸੁੱਖ ।

ਸੌਣ ਮਹੀਨਾ ਜੀਵਨ ਬਖਸ਼ੇ, ਮੀਹ ਵਿੱਚ ਨੱਚਣ ਬਾਲ, ਮਨੁੱਖ ।

ਆਪਸ ਦੇ ਵਿੱਚ ਗੱਡ ਮਡ ਹੋਏ ਵੇਲਾਂ, ਤਾਰਾਂ, ਝਾੜਾਂ, ਰੁੱਖ ।

ਹਾੜ ਦੀਆਂ ਤਪਸ਼ਾਂ ਮੁੱਕ ਗਈਆਂ ਸ਼ਾਂਤ ਹੋ ਗਏ ਤਪਦੇ ਮਨ ।

ਠੰਡ ਪਈ ਸੀਤਲ ਵਾਹ ਵਗਦੀ, ਕਾਲੇ ਹੋ ਗਏ ਗੋਰੇ ਵੰਨ।

ਬੱਦਲ ਗਰਜੇ, ਬਿਜਲੀ ਕੜਕੇ, ਕਿਰਸਾਨਾਂ ਲਈ ਚੜਿਆ ਚੰਨ।

ਈਸ਼ਵਰ ਦੇ ਗੁਣ ਗਾਵੇ ਹਰ ਪ੍ਰਾਣੀ, ਹੋਵੇ ਹਰ ਪਾਸੇ ਧੰਨ ਧੰਨ।

ਨਵ ਜੀਵਨ ਦੀ ਦਾਤ ਸੁਲੱਖਣੀ, ਮਾਣ ਰਹੀ ਧਰਤੀ ਦੀ ਕੁੱਖ।

ਸੌਣ ਮਹੀਨਾ ਜੀਵਨ ਬਖਸ਼ੇ, ਮੀਹ ਵਿੱਚ ਨੱਚਣ ਬਾਲ, ਮਨੁੱਖ।

ਆਪਸ ਦੇ ਵਿੱਚ ਗੱਡ-ਮੱਡ ਹੋਏ; ਵੇਲਾਂ, ਤਾਰਾਂ, ਝਾੜਾਂ, ਰੁੱਖ ।

 

[Dalvinder Singh Grewal]

ਰੱਬ ਦੇ ਨਾਲ ਗੱਲਾਂ

ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ

ਰੱਬ ਨਾਲ ਗੱਲ ਦੇ ਲਈ ਸ਼ਬਦਾਂ ਦੀ ਲੋੜ ਨਾ ।

ਸਾਰਾ ਕੁਝ ਜਾਣਦਾ ਉਹ, ਉਹ ਦਾ ਕੋਈ ਜੋੜ ਨਾ।

ਹਰ ਪਲ ਦੇਖਦਾ ਹੈ ਜਾਂਚਦਾ ਜੋ ਕੀਤਾ ਹੈ।

ਇਹ ਵੀ ਉਹਨੂੰ ਪਤਾ ਤੁਸੀਂ ਖਾਧਾ ਕੀ, ਕੀ ਪੀਤਾ ਹੈ।

ਕਿਹੜੇ ਪਾਸੇ ਲਾਉਣਾ ਉਸ ਕਿਹੜੇ ਪਾਸੇ ਮੋੜਨਾ।

ਰੱਬ ਨਾਲ ਗੱਲ ਦੇ ਲਈ ਸ਼ਬਦਾਂ ਦੀ ਲੋੜ ਨਾ।

ਉਸ ਦਾ ਨਿਜਾਮ ਬੜਾ ਸਿਲਸਿਲੇ ਚ ਬੱਧਾ ਹੈ ।

ਗੱਲ ਕੋਈ ਕਰਨੀ ਹੈ ਤਾਂ ਚਾਹੀਦਾ ਨਾ ਸੱਦਾ ਹੈ ।

ਜੋਰ ਨਹੀਂ ਲਾਉਂਦਾ ਹੋਵੇ ਤੋੜ ਨਾ ਮਰੋੜਨਾ।

ਰੱਬ ਨਾਲ ਗੱਲ ਦੇ ਲਈ ਸ਼ਬਦਾਂ ਦੀ ਲੋੜ ਨਾ।

ਜੱਗ ਛੱਡ ਰੱਬ ਨਾਲ ਜੁੜਨਾ ਜੇ ਚਾਹੁੰਦੇ ਹੋ ।

ਆਏਗਾ ਆਨੰਦ ਚਿਤ ਰੱਬ ਨਾਲ ਲਾਉਂਦੇ ਹੋ।

ਮਾਇਆ ਕੋਲੋਂ ਵੱਖ ਹੋ ਕੇ ਰੱਬ ਨਾਲ ਜੋੜਨਾ ।

ਰੱਬ ਦੇ ਨਾਲ ਗੱਲ ਦੇ ਲਈ ਸ਼ਬਦਾਂ ਦੀ ਲੋੜ ਨਾ

ਸੱਚਾ ਸੁੱਚਾ ਮਨ ਤਨ ਚਿਤ ਚ ਧਿਆਨ ਹੋਵੇ।

ਨਾਮ ਰਗ-ਰਗ ਵਿੱਚ, ਹਿਰਦੇ ਚ ਤਾਨ ਹੋਵੇ।

ਉਹਨੂੰ ਪਾਉਣ ਵਾਸਤੇ ਤਾਂ ਖੁਦੀ ਨੂੰ ਝੰਝੋੜਨਾ ।

ਰੱਬ ਨਾਲ ਗੱਲ ਦੇ ਲਈ ਸ਼ਬਦਾਂ ਦੀ ਲੋੜ ਨਾ।

 

[Dalvinder Singh Grewal]

ਤੂੰ ਤਾਂ ਬੜਾ ਹੀ ਵੱਡਾ ਦਾਤਾ

ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ

ਤੂੰ ਤਾਂ ਬੜਾ ਹੀ ਵੱਡਾ ਦਾਤਾ, ਮੈਂ ਹਾਂ ਬੜਾ ਹੀ ਛੋਟਾ।

ਤੂੰ ਤਾਂ ਸੱਚਾ ਸੁੱਚਾ ਧੁਰ ਤੋਂ, ਮੈਂ ਹਾਂ ਮੁੱਢੋਂ ਖੋਟਾ।

ਮੇਰਾ ਖਿਆਲ ਤੂੰ ਰੱਖਦਾ ਹਰਦਮ ਮੈਂ ਨਾ ਰੋਜ਼ ਧਿਆਵਾਂ।

ਦੇਈ ਜਾਵੇਂ, ਦੇਈ ਜਾਵੇਂ, ਮੈ ਨਾ ਸ਼ੁਕਰ ਮਨਾਵਾਂ ।

ਤੈਥੋਂ ਇਤਨਾ ਲੈ ਕੇ ਵੀ ਤਾਂ ਮੈਨੂੰ ਰਹਿੰਦਾ ਟੋਟਾ।

ਤੂੰ ਤਾਂ ਬੜਾ ਹੀ ਵੱਡਾ ਦਾਤਾ ਮੈਂ ਹਾਂ ਬੜਾ ਹੀ ਛੋਟਾ ।

ਤੂੰ ਤਾਂ ਹੈ ਬੇਅੰਤ ਵਾਹਿਗੁਰੂ ਅੰਤ ਕਿਵੇਂ ਮੈਂ ਜਾਣਾ।

ਦੇ ਕੇ ਭੁੱਲਦਾ ਰਹਿੰਦਾ ਹੈਨ ਪਰ ਪਾ ਕੇ ਕਰਾਂ ਮੈਂ ਮਾਣਾ।

ਬਿਨ ਹੰਕਾਰੋ ਦੇਵੇਂ ਪਰ ਮੈਂ ਅਹੰ ਚ ਪੋਟਾ ਪੋਟਾ।

ਤੂੰ ਤਾਂ ਬੜਾ ਹੀ ਵੱਡਾ ਦਾਤਾ ਮੈਂ ਹਾਂ ਬੜਾ ਹੀ ਛੋਟਾ।

ਤੂੰ ਤਾਂ ਵਿਸ਼ਵ ਨੂੰ ਪੂਰਾ ਜਾਣੇ, ਪਰ ਮੈ ਖੁਦ ਨ ਜਾਣਾ।

ਹੁਕਮ ਤੇਰੇ ਵਿਚ ਸਾਰੀ ਦੁਨੀਆ, ਮੈ ਨਾ ਮੰਨਾ ਭਾਣਾ।

ਤੂੰ ਵੰਡਦਾ ਹੈ ਖੁਲ੍ਹੇ ਹੱਥੀਂ, ਮੈਂ ਮੰਗਦਾ ਫੜ ਲੋਟਾ।

ਤੂੰ ਤਾਂ ਬੜਾ ਹੀ ਵੱਡਾ ਦਾਤਾ ਮੈਂ ਹਾਂ ਬੜਾ ਹੀ ਛੋਟਾ ।

ਤੇਰਾ ਨਾਮ ਜਪਾ ਮੈ ਦਮ ਦਮ ਸ਼ੁਕਰ ਵੀ ਕਰਦਾ ਜਾਵਾਂ ।

ਸੱਚਾ ਸੁੱਚਾ ਰਹਿ ਕੇ ਆਖਰ ਤੇਰੇ ਵਿੱਚ ਸਮਾਵਾਂ।

ਸਭ ਦਾ ਭਲਾ ਮਨਾਵਾਂ ਲਾਵਾਂ ਤੇਰੇ ਨਾਮ ਦਾ ਘੋਟਾ।

ਤੂੰ ਤੇ ਬੜਾ ਹੀ ਵੱਡਾ ਦਾਤਾ ਮੈਂ ਹਾਂ ਬੜਾ ਹੀ ਛੋਟਾ।

 

[swarn bains]

ਤੇਰਾ ਨਾਮ ਜਪਾ ਮੈ ਦਮ ਦਮ ਸ਼ੁਕਰ ਵੀ ਕਰਦਾ ਜਾਵਾਂ ।

ਸੱਚਾ ਸੁੱਚਾ ਰਹਿ ਕੇ ਆਖਰ ਤੇਰੇ ਵਿੱਚ ਸਮਾਵਾਂ।
very nice doctor jee

 

[Dalvinder Singh Grewal]

ਤੈਨੂੰ ਨਾ ਲੱਭ ਸਕਿਆ, ਰਬਾ ਮੇਰਿਆ।

ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ


ਮੰਦਰ ਮਸਜਿਦ ਖਪਿਆ ਰੱਬਾ ਮੇਰਿਆ।

ਤੈਨੂੰ ਨਾ ਲੱਭ ਸਕਿਆ, ਰਬਾ ਮੇਰਿਆ।

ਕੁਦਰਤ ਨਾਲ ਵੀ ਗੱਲਾਂ ਕਰਕੇ ਦੇਖ ਲਈਆਂ।

ਅੰਦਰ ਵੱਲ ਵੀ ਝਾਤਾਂ ਮਾਰ ਕੇ ਦੇਖ ਲਈਆਂ ।

ਸ਼ਾਮ ਸਵੇਰੇ ਜਪਿਆ, ਰੱਬਾ ਮੇਰਿਆ ।

ਤੈਨੂੰ ਨਾ ਲੱਭ ਸਕਿਆ, ਰੱਬਾ ਮੇਰਿਆ ।

ਲੋਕੀ ਕਹਿੰਦੇ ਸਾਰਾ ਜਗਤ ਚਲਾਉਂਦਾ ਹੈਂ।

ਸਭ ਊਹੋ ਨੇ ਕਰਦੇ ਜੋ ਤੂੰ ਚਾਹੁੰਦਾ ਹੈਂ।

ਕਿੱਥੇ ਹੈਂ ਤੂੰ ਲਕਿਆ, ਰੱਬਾ ਮੇਰਿਆ।

ਤੈਨੂੰ ਨਾ ਲੱਭ ਸਕਿਆ, ਰੱਬਾ ਮੇਰਿਆ।

ਭਰਮ ਭੁਲੇਖੇ ਦੁਨੀਆ ਦੇ ਵਿੱਚ ਪਾਏ ਨੇ।

ਲੋਕਾਂ ਤੋਂ ਤਾਂ ਪੱਥਰ ਵੀ ਪੁਜਵਾਏ ਨੇ।

ਰਾਜ਼ ਕਿਉਂ ਆਪਣਾ ਢਕਿਆ ਰੱਬਾ ਮੇਰਿਆ।

ਤੈਨੂੰ ਨਾ ਲੱਭ ਸਕਿਆ ਰੱਬਾ ਮੇਰਿਆ ।

ਧਿਆਨ ਲਗਾਵਾਂ ਫਿਰ ਵੀ ਤੈਨੂੰ ਪਾਵਾਂ ਨਾ।

ਅੱਲਾ, ਰਾਮ, ਵਾਹਿਗੁਰੂ ਤੇਰਾ ਨਾਵਾ ਨਾ।

ਜਾਪੈ ਪੀਠਾ ਪੱਕਿਆ, ਰਬਾ ਮੇਰਿਆ।

ਤੈਨੂੰ ਨਾ ਲੱਭ ਸਕਿਆ ਰਬਾ ਮੇਰਿਆ।

ਕਿਹੜੀਆਂ ਅੱਖਾਂ ਜਿਨਾਂ ਚ ਭਗਤਾਂ ਵੇਖ ਲਿਆ।

ਧੜਕਣ ਦੇ ਵਿੱਚ ਸੰਤਾ ਕੀਕੂੰ ਸਮਝ ਲਿਆ।

ਹਾਲੇ ਮੈ ਨ ਤੱਕਿਆ ਰੱਬਾ ਮੇਰਿਆ ।

ਤੈਨੂੰ ਨਾ ਲੱਭ ਸਕਿਆ ਰੱਬਾ ਮੇਰਿਆ।

ਆਜਾ ਝਲਕ ਦਿਖਾ ਜਾ ਭਰਮ ਮਿਟਾ ਰੱਬਾ।

ਕੀ, ਕਿੱਥੇ, ਕੀਕੂ ਤੂੰ ਇਹ ਸਮਝਾ ਰੱਬਾ ।

ਵਰੇ੍ਹ ਚੁਰਾਸੀ ਭਕਿਆ, ਰੱਬਾ ਮੇਰਿਆ।

ਤੈਨੂੰ ਨਾ ਲੱਭ ਸਕਿਆ, ਰੱਬਾ ਮੇਰਿਆ।

 

[Dalvinder Singh Grewal]

ਸਭ ਜਗ ਚੱਲੀ ਜਾਂਦਾ ਹੈ

ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ


ਸਿਸਟਮ ਦੇ ਵਿੱਚ ਬੱਧਾ ਹੋਇਆ, ਸਭ ਜਗ ਚੱਲੀ ਜਾਂਦਾ ਹੈ ।

ਚੰਗੇ ਮਾੜੇ ਆਪੋ ਆਪਣਾ ਜੀਵਨ ਕੱਟੀ ਜਾਂਦੇ ਨੇ

ਆਪੋ ਆਪਣਾ ਮਿਟ ਹੈ ਢੋਇਆ, ਸਭ ਚੰਗੀ ਜਾਂਦਾ ਹੈ।

ਸਾਰੀ ਉਮਰਾਂ ਸੰਤ ਕਈ ਤਾਂ ਤੇਰੇ ਧਿਆਨ ਚ ਰਹਿੰਦੇ ਨੇ,

ਨਾਮ ਬਿਨਾ ਕੁਝ ਜੀਵਨ ਖੋਇਆ, ਸਭ ਜਗ ਚੱਲੀ ਜਾਂਦਾ ਹੈ।

ਇਥੇ ਦੇ ਜੀਵਨ ਨੂੰ ਅਗਲੇ ਜੀਵਨ ਦੇ ਸੰਗ ਜੋੜਨ ਲਈ,

ਸੁਰਗ ਨਰਕ ਦਾ ਸੁਪਨ ਸੰਜੋਈ ਸਭ ਜਗ ਚੱਲੀ ਜਾਂਦਾ ਹੈ।

ਕੌਣ ਚਲਾਉਂਦਾ? ਕਿਵੇਂ ਚਲਾਉਂਦਾ? ਇਸਨੂੰ ਕਿਹੜਾ ਜਾਣ ਸਕੇ,

ਸਭ ਨੇ ਆਪਣਾ ਦੁੱਖ ਹੈ ਰੋਇਆ, ਸਭ ਜਗ ਚੱਲੀ ਜਾਂਦਾ ਹੈ।

ਅੱਲਾ, ਰਾਮ, ਵਾਹਿਗੁਰੂ ਤੇਰੇ ਨਾਮ ਬਥੇਰੇ ਰੱਖੇ ਨੇ,

ਦੱਸੋ ਕਿਹੜਾ ਜਿਸ ਰੱਬ ਛੋਹਿਆ? ਸੱਭ ਜੱਗ ਚੱਲੀ ਜਾਂਦਾ ਹੈ।

ਕਹਿੰਦੇ ਸੰਤ ਭਗਤ ਨੇ ਹੋਏ ਜਿਨਾ ਰੱਬ ਨੂੰ ਪਾਇਆ ਸੀ,

ਸਾਡਾ ਰੱਬ ਕਿਥੇ ਹੈ ਖੋਇਆ? ਸਭ ਜਗ ਚੱਲੀ ਜਾਂਦਾ ਹੈ ।

ਆ ਜਾ ਝਲਕ ਦਿਖਾ ਜਾ ਰੱਬਾ ਸਾਡਾ ਨਿਸ਼ਚਾ ਪੱਕਾ ਕਰ,

ਤੇਰੇ ਵਿੱਚ ਹੀ ਜਗਤ ਸਮੋਇਆ ਸਭ ਜਗਤ ਚਲੀ ਜਾਂਦਾ ਹੈ।

 

[swarn bains]

nice doctor sahib

 

[swarn bains]

very nice jee

ਤੇਰੀਆਂ ਖੇਡਾਂ ਤੂੰ ਹੀ ਜਾਣੇ ਸੋਕੇ ਤੇ ਬਰਸਾਤਾਂ।

ਕੀਕੂੰ ਤੇਰਾ ਸ਼ੁਕਰ ਮਨਾਈਏ ਸਾਂਭ ਲਈਏ ਸੁਗਾਤਾਂ।

 

[swarn bains]

ਮੇਰਾ ਸਜਦਾ

ਮੇਰਾ ਸਜਦਾ ਮੇਰੇ ਸਤਿਗੁਰ ਨੂੰ, ਬਿਨ ਗੁਰ ਰੱਬ ਨੀ ਲੱਭਦਾ

ਮੇਰਾ ਸਤਿਗੁਰ ਮੇਰਾ ਰੱਬ ਸਖੀ, ਗੁਰੂ ਭੇਦ ਖੋਲ੍ਹਦਾ ਰੱਬ ਦਾ

ਸਾਰੀ ਕੁਦਰਤ ਦਿਲ ਦੇ ਅੰਦਰ, ਦਿਲ ਵਿਚ ਵਸਦਾ ਰੱਬ

ਮੁਰਸ਼ਦ ਰੱਬ ਦਾ ਰਾਹ ਵਖਾਵੇ, ਐਵੇਂ ਫਿਰੇ ਭਟਕਦਾ ਜੱਗ

ਰੱਬ ਮੇਰਾ ਉਹ ਭਾਵਨਾ ਹੈ, ਜਿਸ ਨੇ ਸਾਜਿਆ ਸਾਰਾ ਜੱਗ

ਭਗਤਾਂ ਦਾ ਕਰੇ ਪਾਰ ਉਤਾਰਾ, ਜੱਗ ਵਿਚ ਕੋਈ ਨਹੀਂ ਅੱਜ

ਰੱਬ ਇਕ ਹਸਤੀ ਹੈ ਜੀਵ ਨਹੀਂ, ਰੱਬ ਜਨਮ ਨਹੀੰ ਲੈਂਦਾ

ਸਤਿਗੁਰੂ ਮਸੀਹਾ ਰੱਬ ਦਾ, ਉਹ ਰੱਬ ਰਾਹ ਵਖਾ ਦੇਂਦਾ

ਸਜਦਾ ਕਰਨਾ ਉਹਨੂੰ ਭਾਉਂਦਾ, ਜਿਹੜਾ ਸਾਹਮਣੇ ਦਿਸੇ

ਰੱਬ ਸਾਹਮਣੇ ਨਹੀਂ ਆਉਂਦਾ, ਫਰਜੀ ਲਿਖੀ ਜਾਣ ਸਭ ਕਿੱਸੇ

ਜਿਹੜਾ ਨਜਰ ਪਿਆ ਆਵੇ, ਕਰ ਮਿਨਤ ਮਨਾਉਣਾ ਸੌਖਾ

ਜਿਸ ਦਾ ਕੋਈ ਪਤਾ ਨਹੀਂ, ਉਹਨੂੰ ਮਨਾਉਣਾ ਬੜਾ ਈ ਔਖਾ

ਨੀਰ ਬਾਝ ਨਹੀਂ ਬਝਦਾ ਟੋਭਾ, ਟੋਭੇ ਬਾਝ ਰੁਕੇ ਨ ਨੀਰ

ਗੁਰੂ ਬਾਝ ਨਹੀਂ ਗਿਆਨ ਪ੍ਰਾਪਤ, ਗੁਰ ਹਰਿ ਪੀਰਨ ਪੀਰ

ਰੱਬ ਕਿਸੇ ਨਜ਼ਨ ਆਵੇ, ਕੇਵਲ ਮਨ ਵਿਚ ਪਰਗਟ ਹੋਵੇ

ਮਨ ਵਿਚ ਪਰਗਟ ਕਰਨ ਲਈ, ਮਨ ਦਰ ਦਰ ਦੁਖੜੇ ਰੋਵੇ

ਪਾਠ ਪੜ੍ਹਨ ਕਈ ਪੜ੍ਹਨ ਕਤੋਬਾਂ, ਰੱਬ ਦਾ ਰਾਹ ਵਿਚ ਲਿਖਿਆ

ਪੜ੍ਹ ਪੜ੍ਹ ਬਣ ਜਾਣ ਗਿਆਨੀ, ਬਾਝ ਗੁਰੂ ਪੱਲੇ ਪਵੇ ਨ ਸਿਖਿਆ

ਹਰਿ ਭੇਦ ਨਾ ਦੁਨੀਆਂ ਬੁਝੈ, ਉਨ੍ਹਾਂ ਰਾਹ ਨ ਰੱਬ ਦਾ ਸੁਝੈ

ਸਤਿਗੁਰ ਹੱਥ ਸਿਰ ਤੇ ਰੱਖੈ, ਮਨ ਮਨ ਕੂ ਪਰਚਾ ਲੁੱਝੈ

 

[Dalvinder Singh Grewal]

ਨਾਮ ਲੈਣ ਲਈ

ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ


ਸਾਢੇ ਤਿੰਨ ਵਜੇ ਉਹ ਜਗਾਉਂਦਾ, ਨਾਮ ਲੈਣ ਲਈ।

ਫਿਰ ਵੀ ਧਿਆਨ ਨਾ ਮੈਂ ਲਾਉਂਦਾ, ਨਾਮ ਲੈਣ ਲਈ।

ਦਿੱਤੀਆਂ ਜੋ ਦਾਤਾਂ ਫਾਇਦਾ ਪੂਰਾ ਨਾ ਉਠਾਉਂਦਾ ਹਾਂ,

ਚਾਹੇ ਉਹ ਜੋ ਮੈਂ ਨਾ ਉਹ ਪੁਗਾਉਂਦਾ ਨਾਮ ਲੈਣ ਲਈ ।

ਤੇਰੇ ਨਾਲ ਜੁੜਨਾ ਸੁਖਾਲਾ ਕੰਮ ਲੱਗਦਾ ਨਾ,

ਮਾਇਆ ਮੋਹ ਖੁਦ ਨਾ ਹਟਾਉਂਦਾ, ਨਾਮ ਲੈਣ ਲਈ।

ਸੱਚਾ-ਸੁੱਚਾ ਚਿੱਤ ਹੁੰਦਾ ਵਧੀਆ ਤੜਕ ਵੇਲੇ,

ਸੋਚਾਂ ਵਿੱਚ ਵੇਲਾ ਕਿਉਂ ਗਵਾਉਂਦਾ, ਨਾਮ ਲੈਣ ਲਈ।

ਮਿਹਰ ਹੋਵੇ ਵਾਹਿਗੁਰੂ ਦੀ ਚਿਤ ਉਸ ਵਿੱਚ ਰਹੇ,

ਕਦੇ ਵੀ ਨਾ ਉਸ ਨੂੰ ਭੁਲਾਉਂਦਾ ਨਾਮ ਲੈਣ ਲਈ।

ਉਸ ਨਾਲ ਜੁੜਿਆਂ ਹੀ ਮੁਕਤੀ ਪ੍ਰਾਪਤ ਹੋਊ,

ਕਾਮ, ਕ੍ਰੋਧ, ਲੋਭ, ਮੋਹ ਹਟਾਉਂਦਾ, ਨਾਮ ਲੈਣ ਲਈ।

ਨਿਜ ਥਾਂ ਪਛਾਣਾਂ ਖੁਦ ਆਪੇ ਨੂੰ ਮਿਟਾ ਲਵਾਂ,

ਉਹ ਹੀ ਕਰਾਂ ਉਹਨੂੰ ਜੋ ਵੀ ਭਾਉਂਦਾ, ਨਾਮ ਲੈਣ ਲਈ।

 

[Dalvinder Singh Grewal]

ਤੈਨੂੰ ਸਦਾ ਪੁਕਾਰਾਂ

ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ

ਤੈਨੂੰ ਸਦਾ ਪੁਕਾਰਾਂ ਰੱਬਾ ।

ਲਾਹ ਦੇ ਸੋਚ ਵਿਚਾਰਾਂ ਰੱਬਾ ।

ਚੰਚਲ ਮਨ ਨਾ ਨਾਮ ਤੇ ਟਿਕਦਾ,

ਮਨ ਨੂੰ ਕੀਕੂੰ ਮਾਰਾਂ ਰੱਬਾ।

“ਹੈ ਵੀ, ਜਾਂ ਨਾ” ਭਰਮ ਭੁਲੇਖਾ,

ਮਨ ਤੋਂ ਕਿਵੇਂ ਉਤਾਰਾ ਰੱਬਾ।

ਤੇਰੇ ਬਿਨ ਉਂਝ ਜੀਣਾ ਹੀਣਾ

ਰਖਿਆ ਘੇਰ ਵਿਕਾਰਾਂ ਰੱਬਾ।

ਜੱਗ ਖਲਜਗਣ ਤੋਂ ਪਾਸੇ ਹੋਕੇ,

ਤੈਥੋਂ ਆਪਾ ਵਾਰਾਂ ਰੱਬਾ ।

ਸੱਚਾ ਸੁੱਚਾ ਜੀਣਾ ਹੋਵੇ,

ਤੁਧ ਸੰਗ ਜੋੜਾਂ ਤਾਰਾਂ ਰੱਬਾ।

ਜੋ ਮਿਲਿਆ ਸੋ ਸਬਰ ਕਰ ਲਵਾਂ,

ਹਉਂ ਵਿਚ ਝੱਖ ਨਾ ਮਾਰਾਂ ਰੱਬਾ।

ਪਲ ਪਲ ਮਨ ਨੂੰ ਤੁਧ ਸੰਗ ਜੋੜਾਂ.

ਪਲ ਨਾ ਨਾਮ ਵਿਸਾਰਾਂ ਰੱਬਾ।

ਤੇਰੀ ਮਿਹਰ ਬਿਨ ਨਹੀਂ ਹੋਣਾ,

ਬਾਕੀ ਵਾਧੂ ਕਾਰਾਂ ਰੱਬਾ ।

ਕਿਰਪਾ ਤੇਰੀ ਕੀਕੂੰ ਪਾਵਾਂ ਰੱਬਾ।

ਆਪਣਾ ਆਪ ਸੁਧਾਰਾਂ ਰੱਬਾ।

ਤੇਰੀ ਘੁੱਗ ਦ੍ਰਿਸ਼ਟੀ ਹੋਵੇ,

ਖੁਦ ਨੂੰ ਪਾਰ ਉਤਾਰਾਂ ਰੱਬਾ।

 

[swarn bains]

ਦਿਨ ਰਾਤ

ਸੂਰਜ ਚੜ੍ਹ ਆਵੇ ਫਿਰ ਡੁੱਬ ਜਾਵੇ, ਫਿਰ ਰਾਤ ਆ ਜਾਂਦੀ

ਇਸੇ ਤਰ੍ਹਾਂ ਸਭ ਦੁਨੀਆਂ ਚਲਦੀ, ਜੰਮਦੀ ਤੇ ਮਰ ਜਾਂਦੀ



ਜੰਮਣ ਮਰਨਾ ਕਿਸਬ ਬਣਾਇਆ, ਇਹ ਦੁਨੀਆਂ ਦੀ ਬਾਜੀ

ਉਮਰ ਬਿਤਾ ਕੇ ਸਭ ਟੁਰ ਜਾਂਦੇ, ਏਸੇ ਵਿਚ ਰੱਬ ਰਾਜੀ

ਜੱਗ ਤੋਂ ਰੱਬ ਹੁਕਮ ਮਨਾਵੇ, ਕੀ ਮੈਂ ਤੁਹਾਡਾ ਰੱਬ ਨਹੀਂ

ਜੇ ਕੋਈ ਤੌਹੀਨ ਕਰੇਂਦਾ, ਉਹ ਛੁਪ ਕੇ ਸਕਦਾ ਭੱਜ ਨਹੀਂ

ਜੋ ਬੀਜੈ ਸੋਈ ਉਗ ਪੈਂਦਾ ਏ, ਉਹੋ ਈ ਖਾਣਾ ਪੈਂਦਾ

ਸੋਚ ਸਮਝ ਕੇ ਕਰਮ ਕਰ, ਤੈਨੂੰ ਬੈਂਸ ਨਿਮਾਣਾ ਕਹਿੰਦਾ

ਮਨ ਅਪਣਾ ਸਮਝਾ ਲੈ ਅੜਿਆ, ਬਣ ਕੇ ਤੂੰ ਸਿਆਣਾ

ਰੱਬ ਧਿਆ ਕੇ ਰੱਬ ਸੰਗ ਮਿਲ, ਵੇਲਾ ਮੁੜ ਨਹੀਂ ਆਉਣਾ

ਜੱਗ ਚਾਰ ਦਿਨਾਂ ਦਾ ਮੇਲਾ ਏ, ਦੁਨੀਆਂ ਮੁਸਾਫਿਰਖਾਨਾ

ਇਕ ਆਉਂਦਾ ਇਕ ਜਾਂਦਾ ਏ, ਪਰ ਸਮਝ ਨ ਸਕੇ ਜਮਾਨਾ

ਆਉਣਾ ਜਾਣਾ ਚਲਦਾ ਰਹਿੰਦਾ, ਇਕ ਆਉਂਦਾ ਇਕ ਜਾਂਦਾ

ਇਕ ਸੂਹੇ ਪਹਿਨ ਕੇ ਆਵੇ, ਇਕ ਚਿੱਟੀ ਚਾਦਰ ਲੈ ਟੁਰ ਜਾਂਦਾ

ਰਾਹ ਦੋਹਾਂ ਇਕੋ ਹੋਵੇ, ਇਕ ਜੱਗ ਤੇ ਆਵੇ ਇਕ ਵਾਪਸ ਜਾਵੇ

ਘੁੰਡ ਕੱਢ ਕੇ ਕੋਲੋਂ ਦੀ ਲੰਘ ਜਾਂਦੇ, ਕੋਈ ਨ ਨੈਣ ਮਿਲਾਵੇ

ਇਸ ਵਿਚ ਕੋਈ ਝੂਠ ਨਹੀਂ, ਜੱਗ ਤੋਂ ਡਰ ਕੇ ਬੈਂਸ ਲਿਖੇ

ਜੱਗ ਨੂੰ ਕੁਝ ਨ ਭਾਵੇ, ਜਾਹਿਦ ਨੇ ਲਿਖ ਦੇਣੇ ਕਿੱਸੇ

ਆ ਸਖੀ ਉਠ ਉਥੇ ਚਲੀਏ, ਜਿੱਥੇ ਕੋਈ ਨ ਹੋਵੇ

ਆ ਸਾਹਮਣੇ ਬਹਿ ਮੇਰੇ, ਬੈਂਸ ਧੋਣੇ ਅਪਣੇ ਧੋਵੇ

ਤੂੰ ਮੇਰੇ ਵਿਚ ਮੈਂ ਤੇਰੇ ਵਿਚ, ਗੁੱਸਾ ਗਿੱਲਾ ਕਾਹਦਾ

ਇਕ ਮਿਕ ਆਪਾਂ ਹੋ ਜਈਏ, ਕਰ ਮਿਲਣ ਦਾ ਵਾਧਾ

 

[swarn bains]

ਵਹੁਤ ਖੂਬ ਸੀ ਡਾਕਟਰ ਜੀ

 

[swarn bains]

ਭਗਤ

ਸਤਿ ਸੰਗਤ ਹਰਿ ਨਾਮ ਧਿਆਵੈ, ਭਗਤੀ ਰਸ ਪਾਵੈ ਕੋਏ

ਜੰਗਲ ਬੇਲੇ ਜਾ ਕੰਦ ਮੂਲ ਖਾ, ਬਿਨ ਗੁਰ ਭਗਤੀ ਨ ਹੋਏ

ਹਰਿ ਭਗਤੀ ਹਰਿ ਨਾਮ ਧਿਆਏ, ਸਤਿਗੁਰ ਮਨ ਮਾਹਿ ਸਮਾਏ

ਸਤਿਗੁਰ ਮੂਰਤ ਹਰਿ ਪ੍ਰਭ ਸੂਰਤ, ਮਨ ਮਹਿ ਵਸ ਜਾਏ

ਸਤਿਨਾਮ ਸਤਿਗੁਰੂ ਦੀਖਿਆ, ਭਗਤੀ ਦਾ ਰਸ ਪਾਏ ਕੋਏ

ਸੱਚ ਬੋਲ ਸੱਚ ਚਿੱਤ ਸਮਾਏ, ਸੇਵਕ ਵਸੈ ਸਤਿਗੁਰ ਸਰਣਾਏ

ਸਤਿਗੁਰ ਸਬਦ ਸਿੱਖ ਕੌ ਬਖਾਨੈ, ਮਨ ਮਹਿ ਸਿੱਖ ਦਰੜਾਏ

ਹਰਿ ਹਰਿ ਕਰਤ ਹਰੇ ਹਰਿ ਹੁਵੈ, ਹਰਿ ਜਨ ਹਰਿ ਭੇਦ ਨ ਕੋਏ

ਪਵਿਤਰ ਮਨ ਸਤਿਗੁਰੂ ਦਿਖਿਆ, ਸਤਿਗੁਰ ਸਬਦ ਸਮਝਾਵੈ

ਮਨ ਲਾਏ ਸਿੱਖ ਨਾਮ ਆਰਾਧੈ, ਸਬਦ ਗੁਰੂ ਮਨ ਚਿੱਤ ਸਮਾਵੈ

ਗੁਰ ਗੁਰ ਕਰਤ ਮਨ ਮਾਣ ਮਿਟਾਵੈ, ਇਤ ਨਿਰਮਲ ਮਨ ਹੇਏ

ਸਬਦ ਗੁਰੂ ਦੀ ਸਿੱਖਿਆ, ਜਨ ਗਣ ਕਿਸਮਤ ਵਿਚ ਲਿਖਿਆ

ਸਤਿਗੁਰੂ ਤਬ ਸਬਦ ਸਮਝਾਵੈ, ਜਨ ਮਨ ਮੰਗੈ ਗੁਰੂ ਭਿਖਿਆ

ਭਿਖਿਆ ਪਾਏ ਨਾਮ ਮਨ ਵਸਾਏ, ਸਤਿਗੁਰੂ ਮੈਲਾ ਮਨ ਧੋਏ

ਸਤਿਗੁਰ ਸਰਣ ਜਾ ਢਹਿ ਬੈਂਸ, ਚਿੱਤ ਜਾਣ ਗੁਰੂ ਕੌ ਰੱਬ

ਜੀਵ ਜੰਤ ਸਭ ਰੁੱਖ ਬਿਰਖ, ਹਰਿ ਨਾਮ ਧਿਆਵੈ ਸਭ ਜੱਗ

ਗੁਰ ਪਾਰਸ ਗੁਰ ਪਾਰਜਾਤ, ਗੁਰ ਬਿਨ ਮੁਕਤ ਨ ਪਾਵੈ ਕੋਏ

ਮਨ ਗੁਰੂ ਗੁਰ ਗਾਏ ਜਾ, ਗੁਰ ਮੂਰਤ ਚਿੱਤ ਵਸਾਏ ਜਾ

ਮਨ ਮਾਣ ਤਾਣ ਮਿਟ ਜਾਏ, ਹਰਿ ਹਰਿ ਨਾਮ ਧਿਆਏ ਜਾ

ਨੀਲੇ ਪਾ ਭਾਵੇਂ ਭਗਵੇਂ ਪਾ, ਗੁਰ ਬਿਨ ਗਿਆਨ ਨ ਹੋਏ

ਸਿਰ ਰਾਖ ਪਾ ਸਾਧੂ ਬਣ ਜਾ, ਮੱਖੀ ਮੱਛਰ ਨੇੜ ਨਾ ਆਵੈ

ਹੋਰ ਨਹੀਂ ਕੋਈ ਲੇਖਾ ਦੇਖਾ, ਪੜ੍ਹ ਪੜ੍ਹ ਗਿਆਨੀ ਪੰਡਤ ਕਹਾਵੈ

ਗੁਰੂ ਰੱਬ ਦਾ ਰਾਹ ਵਖਾਵੈ, ਹਰਿ ਮਨ ਮਹਿ ਪਰਗਟ ਹੋਏ

ਕੱਲ੍ਹ ਕਮਾਉਣਾ ਅੱਜ ਕਰ, ਜੋ ਅੱਜ ਕਮਾਉਣਾ ਅਬ

ਗੁਰ ਸੰਗਤ ਹਰਿ ਸੰਗਤ, ਗੁਰ ਸੰਗਤ ਨ ਲੋੜੈ ਜੱਗ

ਗੁਰੂ ਰੱਬ ਮਹਿ ਭੇਦ ਨਹੀਂ, ਗੁਰ ਹਰਿ ਨਾਮ ਧਿਆਏ ਕੋਏ

ਬੈਂਸ ਜਾਏ ਢਹਿ ਗੁਰ ਸਰਣਾ, ਗੁਰ ਸੰਗਤ ਮਨ ਸਿੱਧਾ ਕਰਣਾ

ਗੁਰੂ ਸਬਦ ਮਨ ਸਾਫ ਕਰਾਵੈ, ਜਿਉਂਦੇ ਜੀ ਸਿੱਖਨ ਕੂ ਮਰਨਾ

ਪਿਆਰ ਪਾ ਸਤਿਗੁਰੂ ਮਨਾ, ਮੁੜ ਆਉਣ ਜਾਣ ਨ ਹੋਏ

 

[Dalvinder Singh Grewal]

ਕਰ ਨਾ ਪਲ ਵੀ ਵੱਖ ਸਾਈਆਂ
ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ

ਜਿਉ ਚਾਹੇਂ ਤਿਉ ਰੱਖ ਸਾਈਆਂ।
ਪਰ ਕਰ ਨਾ ਪਲ ਵੀ ਵੱਖ ਸਾਈਆਂ।
ਤੇਰੇ ਬਾਝੋਂ ਜੀਣ ਬੇਕਾਰ,
ਮਾਰ ਰਹੇ ਜਿਉਂ ਝੱਖ ਸਾਈਆਂ।
ਹੁਕਮ ਤੇਰਾ ਹੀ ਚਾਰ ਚੁਫੇਰ,
ਤੇਰੀ ਸਭ ਤੇ ਅੱਖ ਸਾਈਆ ।
ਮੈਂ ਤਾਂ ਇੱਕ ਨਿਮਾਣਾ ਜੀਵ,
ਜਿਉਂ ਵਾਲਾਂ ਵਿੱਚ ਧੱਖ ਸਾਈਆਂ।
ਮੈਂ ਹਾਂ ਚਾਹੁਣ ਵਾਲਾ ਇਕ,
ਹੋਰ ਵੀ ਨੇ ਕਈ ਲੱਖ ਸਾਈਆਂ।
ਸੱਭ ਦੀ ਆਪੋ ਆਪਣੀ ਸੋਚ,
ਤੂੰ ਹੀ ਇੱਕ ਨਿਰਪੱਖ ਸਾਈਆਂ।
ਬੋਲਣ ਕਈ ਤੇਰੇ ਉਲਟ ਵੀ ਜਦ,
ਪੂਰਾਂ ਤੇਰਾ ਪੱਖ ਸਾਈਆਂ।
ਯਾਦ ਜਿਨ੍ਹਾਂ ਤੈਨੂੰ ਕੀਤਾ ਨਾ,
ਰੁਲਦੇ ਗਲੀਏਂ ਕੱਖ ਸਾਈਆਂ।
ਆਸ਼ਾ ਹੈ ਬਸ ਇਕ ਤੇਰੇ ਤੇ
ਬਿਨ ਨਾਮ ਤਾਂ ਖਾਣੀ ਭੱਖ ਸਾਈਆਂ।
ਗੁਣ ਗਾਵਾਂ ਕੀ ਕੀ ਤੇਰੇ ਮੈਂ
ਹਨ ਤੇਰੇ ਰੰਗ ਅਲੱਖ ਸਾਈਆ
ਤੇਰੇ ਦੀਦ ਦਾ ਸਦਾ ਪਿਆਸਾ ਹਾਂ,
ਦੇ ਦਰਸ ਹੋ ਕੇ ਪਰਤੱਖ ਸਾਈਆਂ।

 

[swarn bains]

ਖਾਲੀ ਹੱਥ

ਸਾਰੀ ਉਮਰ ਕਮਾਈ ਮਾਇਆ, ਨਿਕਲੀ ਜਾਨ ਸਾਹ ਨ ਆਇਆ

ਹੱਥ ਖਾਲੀ ਕੁਝ ਚੁੱਕ ਨ ਸਕਿਆ, ਪਿੱਛੇ ਛੱਡ ਚਲਿਆ ਮਾਇਆ

ਅਸਾਂ ਬੰਦੇ ਹਾਂ ਇਕ ਦਮੀ, ਮਰਨ ਦਾ ਭੈ ਡਰਾਈ ਜਾਵੇ

ਛੇਤੀ ਛੇਤੀ ਸਾਹ ਭਰੀਦਾ, ਅਗਲਾ ਸਾਹ ਆਵੇ ਨ ਆਵੇ

ਸਾਹ ਮੁਕਿਆ ਮੌਤ ਹੋ ਗਈ, ਕਿਸੇ ਨਾ ਪਰਚਾ ਪਾਇਆ

ਪਤਾ ਹੈ ਤੈਨੂੰ ਸੱਜਣਾ, ਇਥੋਂ ਖਾਲੀ ਹੱਥ ਜਾਣਾ ਪੈਂਦਾ

ਕਿਉਂ ਮੇਰੀ ਮੇਰੀ ਕਰਦਾ, ਤੈਨੂੰ ਬੈਂਸ ਨਿਮਾਣਾ ਕਹਿੰਦਾ

ਹੱਥ ਬੰਨ੍ਹ ਮੜ੍ਹੀ ਵਿਚ ਸਾੜਨ, ਤੈਨੂੰ ਸਮਝ ਨ ਆਇਆ

ਮਛਲੀ ਭੱਜ ਨਾ ਸਕਦੀ, ਜਦੋਂ ਪਾਇਆ ਜੀਵਰ ਜਾਲ

ਜਮਾਂ ਤੇਰਾ ਸਾਹ ਖਿਚਣਾ, ਜਦੋਂ ਜਾਲ ਵਛਾਇਆ ਕਾਲ

ਸੰਗੀ ਸਾਥੀ ਪਿੱਛੇ ਰਹਿ ਜਾਣੇ, ਕਿਸੇ ਨਾ ਸਾਥ ਨਿਭਾਇਆ

ਮੈਂ ਮਿਹਨਤ ਕਰਦਾ ਹੰਭ ਗਿਆ, ਤੱਕ ਜਮਾਨਾ ਲੰਘ ਗਿਆ

ਪਹਿਲਾਂ ਬੁਖਾਰ ਆਇਆ, ਫਿਰ ਦਮ ਘੁੱਟਦਾ ਹੰਭ ਗਿਆ

ਹਕੀਮਾਂ ਨੂੰ ਨਬਜ ਵਿਖਾਈ, ਪਰ ਕਿਸੇ ਸਮਝ ਨਾ ਆਇਆ

ਇਸ਼ਕ ਬਿਮਾਰੀ ਹਿਜਰ ਦੀ, ਸਦਾ ਮਾਹੀ ਦੀ ਯਾਦ ਸਤਾਵੇ

ਮੈਂ ਸਜਦਾ ਕਰਦਾ ਹਾਰ ਗਿਆ, ਪਰ ਮਾਹੀ ਨ ਨੈਣ ਮਿਲਾਵੇ

ਕਿਵੇਂ ਵਖਾਵਾਂ ਸੱਜਣਾ ਕੂ, ਮੇਰਾ ਜੀ ਬੜਾ ਘਬਰਾਇਆ

ਮਾਹੀ ਬਾਝੋਂ ਜੀ ਨੀ ਲਗਦਾ, ਮੇਰਾ ਮਾਹੀ ਬਹੁਤ ਪਿਆਰਾ

ਨੈਣ ਮਿਲਾ ਕੇ ਨੈਣ ਝੁਕਾ, ਸੁਹਣੇ ਮੁੱਖੜੇ ਦਾ ਲੈਣ ਦੇ ਨਜਾਰਾ

ਮਨ ਮਾਹੀ ਕੂ ਲੋਚਦਾ, ਅਸਾਂ ਚਿੱਤ ਚਰਨ ਸੰਗ ਲਾਇਆ

ਮਨ ਆਪਣਾ ਖੋਜ ਬੈਂਸ, ਤੇਰੇ ਮਨ ਵਿਚ ਰੱਬ ਵਸਦਾ

ਸਤਿਗੁਰ ਹਰਿ ਰਾਜ ਜਾਣਦਾ, ਰੱਬ ਮਿਲਣ ਦਾ ਰਾਹ ਦੱਸਦਾ

ਗੁਰ ਸਬਦ ਕਮਾ ਨਾਮ ਧਿਆ, ਗੁਰ ਮਨ ਮਹਿ ਪ੍ਰਭ ਪ੍ਰਗਟਾਇਆ

 

[Dalvinder Singh Grewal]

ਚੰਗਾ ਕੰਮ ਵੀ ਕਰ ਲਿਆ ਕਰ

ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ



ਚੰਗਾ ਕੰਮ ਵੀ ਕਰ ਲਿਆ ਕਰ।

ਰਾਮ ਨਾਮ ਚਿਤ ਧਰ ਲਿਆ ਕਰ ।

ਛੱਡ ਸੰਗ ਚੁਗਲੀ ਖੋਰਾਂ ਦਾ।

ਕਰੀਂ ਭਲਾ ਕੁਝ ਹੋਰਾਂ ਦਾ।

ਗੁੱਸਾ ਗਿੱਲਾ ਜਰ ਗਿਆ ਕਰ ।

ਚੰਗਾ ਕੰਮ ਵੀ ਕਰ ਲਿਆ ਕਰ।

ਨਸ਼ੇ ਵੇਚ ਨਾ ਮੁੰਡੇ ਮਾਰ।

ਮਾੜੇ ਤੇ ਨਾ ਕਰਨਾ ਵਾਰ।

ਪਾਪ ਕਰਨ ਤੋਂ ਡਰ ਲਿਆ ਕਰ।

ਚੰਗਾ ਕੰਮ ਵੀ ਕਰ ਲਿਆ ਕਰ।

ਝੂਠ ਤੋਂ ਬਚ ਸੱਚ-ਸੁੱਚਾ ਰਹਿ।

ਸੱਚੀ ਗੱਲ ਡਟ ਮੂੰਹ ਤੇ ਕਹਿ।

ਸ਼ੁਭ ਸੋਚ ਸੱਚ ਵਰ ਲਿਆ ਕਰ ।

ਚੰਗੇ ਕੰਮ ਵੀ ਕਰ ਲਿਆ ਕਰ।

ਨਾਰੀ ਦਾ ਸਨਮਾਨ ਕਰੀਂ।

ਦੂਜੇ ਮਾਲ ਤੇ ਅੱਖ ਨਾ ਧਰੀਂ।

ਹਉਮੈਂ ਅਪਣੀ ਸਰ ਲਿਆ ਕਰ

ਚੰਗੇ ਕੰਮ ਵੀ ਕਰ ਲਿਆ ਕਰ।

ਧਰਤੀ ਮਾਂ ਦੀ ਰੱਖਿਆ ਕਰ।

ਥਾਂ ਥਾਂ ਤੇ ਨਾਂ ਗੰਦਗੀ ਭਰ।

ਰੱਖ ਸਫਾਈ ਹਰ ਘਰ ਦਰ।

ਚੰਗੇ ਕੰਮ ਵੀ ਕਰ ਲਿਆ ਕਰ।

ਐਵੇਂ ਬਹੁਤੀ ਡੀਂਗ ਨਾ ਮਾਰ ।

ਪਰਿਆਂ ਵਿਚ ਨਾ ਝੱਲ ਖਲਾਰ ।

ਮਿਠਤ ਮਨ ਵਿੱਚ ਭਰ ਲਿਆ ਕਰ।

ਚੰਗੇ ਕੰਮ ਵੀ ਕਰ ਲਿਆ ਕਰ।

ਦੁਨੀਆ ਦੀਆਂ ਰਹੁ-ਰੀਤਾਂ ਜਾਣ।

ਭਲੇ ਬੁਰੇ ਦੀ ਕਰੀਂ ਪਛਾਣ ।

ਮੈਰ ਚ ਜੀਵਨ ਹਰਿਆ ਕਰ ।

ਚੰਗਾ ਕੰਮ ਵੀ ਕਰਿਆ ਕਰ।

ਚੰਗੇ ਕੰਮ ਤੇਰੇ ਜਾਣੇ ਨਾਲ ।

ਬੁiਰਆਂ ਕਰਨਾ ਮੰਦੜਾ ਹਾਲ।

ਰੱਬ ਦੇ ਕੋਲੋਂ ਡਰ ਲਿਆ ਕਰ ।

ਚੰਗਾ ਕੰਮ ਵੀ ਕਰ ਲਿਆ ਕਰ।

ਰਾਮ ਨਾਮ ਚਿਤ ਧਰ ਲਿਆ ਕਰ।

 

[Dalvinder Singh Grewal]

ਜਨਮ ਭੁਮੀ ਦੀ ਫੇਰੀ

ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ



ਸੁਪਨੇ ਦੇ ਵਿੱਚ ਪਹੁੰਚ ਗਿਆ ਮੈਂ ਆਪਣੇ ਜਨਮ ਸਥਾਨ ।

ਪਿੰਡ ਰਤਨ 89 ਜੇ ਬੀ ਲਾਇਲਪੁਰ ਪਾਕਿਸਤਾਨ ।

ਪੁੱਛ-ਪੁੱਛਾ ਕੇ ਆਪਣੇ ਘਰ ਦਾ ਤੱਕਿਆ ਜਦੋਂ ਦਲਾਨ।

ਮਿਲ ਗਿਆ ਮੈਨੂੰ ਖੋਇਆ ਹੋਇਆ ਮੇਰਾ ਜਿਵੇਂ ਜਹਾਨ।

ਵੱਡਾ ਸੀ ਦਰਵਾਜਾ ਜਿਸ ਨੂੰ ਹੌਲੀ ਹੌਲੀ ਖੋਲਾਂ।

“ਹੈ ਕੋਈ ਘਰ ਵਿੱਚ”ਅੰਦਰ ਹੋ ਕੇ, ਮੈਂ ਤਾਂ ਇਹ ਜਦ ਬੋਲਾਂ।

ਮਾਈ ਆਈ “ਕੌਣ ਹੈ ਭਾਈ”ਕਿਸ ਨੂੰ ਹੈ ਦੱਸ ਮਿਲਣਾ।

ਜਾਂ ਘਰ ਕਿਸੇ ਹੋਰ ਦਾ ਤੂੰ ਹੈ, ਮੇਰੇ ਤੋਂ ਹੈ ਪੁੱਛਣਾ

ਜਾਂ ਫਿਰ ਕਿਸੇ ਭੁਲੇਖੇ ਦੇ ਵਿੱਚ ਤੂੰ ਹੈ ਇਸ ਘਰ ਆਇਆ।

ਪਹਿਲਾਂ ਤਾਂ ਘਬਰਾਇਆ ਪਰ ਫਿਰ ਦਮ ਰੱਖ ਪੈਰ ਵਧਾਇਆ।

“ਪੈਰੀ ਪੈਨਾ, ਮਾਈ ਮੈਂ ਤਾਂ ਹਾਂ ਇਥੋਂ ਦਾ ਜਾਇਆ।

ਭਾਵੀ ਨੇ ਸੀ ਕਹਿਰ ਕਮਾਇਆ ਸਾਡਾ ਦੇਸ਼ ਵੰਡਾਇਆ।

ਜ਼ੁਲਮ ਕਮਾਇਆ ਡਾਢਾ ਘਰ ਤੋਂ ਸੀ ਅਸੀਂ ਬੇਘਰ ਹੋਏ।

ਸਭ ਕੁਝ ਇਥੋਂ ਛੱਡ- ਛਡਾ ਕੇ ਹੋ ਗਏ ਘਰੋਂ ਪਰਾਏ।

ਜੰਮੇ ਜਿਥੇ ਖੇਲੇ ਮਲੇ, ਯਾਦਾਂ ਏਥੇ ਬੜੀਆਂ ।

ਦੁੱਖਾਂ ਦੇ ਵਿੱਚ ਲੰਘੇ ਵੇਲੇ, ਮੁੜ ਖੁਸ਼ੀਆਂ ਨਾ ਜੁੜੀਆਂ”0।

ਵੇਖ ਕੇ ਸਿੱਖ ਸਰਦਾਰ ਪਾਸ ਦੇ ਹੋਏ ਲੋਕ ਇਕੱਠੇ ।

ਗੱਲਾਂ ਭਾਂਤ ਭਾਂਤ ਦੀਆਂ ਕਰਦੇ, ਪਾਉਣ ਯਾਦ ਨੂੰ ਪੱਠੇ।

ਆਇਆ ਇਕ ਬਜ਼ੁਰਗ ਮਰਾਸੀ, ਸੀ ਉਹ ਜਾਣਿਆ ਲਗਦਾ।

ਸਾਡੇ ਘਰ ਸੀ ਹਿੰਦੁਸਤਾਨ ਵਿੱਚ ਆਉਂਦਾ ਜਾਂਦਾ ਰਹਿੰਦਾ।

ਕਹਿੰਦਾ “ਪੁੱਤ ਅਨੋਖ ਸਿੰਘ ਦਾ ਦਾਦਾ ਕਿਸ਼ਨ ਸਿੰਘ ਇਸਦਾ ।

ਜੋ ਇਸ ਘਰ ਵਿੱਚ ਮੁੜ ਕੇ ਆਇਆ, ਹੋਰ ਨਹੀਂ ਕੋਈ ਦਿਸਦਾ।

ਲਾਗ ਲੈਣ ਸੀ ਜਾਂਦਾ ਜਿੱਥੇ, ਇਹ ਉਸ ਘਰ ਦਾ ਹੈ ਭਾਈ ।

ਇਸਦੀ ਸੂਰਤ ਮੇਰੇ ਮਨ ਵਿੱਚ ਪੂਰੀ ਹੈ ਹੁਣ ਆਈ”।

ਕੋਈ ਤਾਂ ਮਿਲ ਗਿਆ ਸੀ, ਜਿਸਨੇ ਮੇਰੀ ਪੈੜ ਪਛਾਣੀ।

ਸਭ ਨੂੰ ਆਖੇ “ਇਸ ਮੁੰਡੇ ਦਾ ਮੇਰਾ ਮੁੰਡਾ ਹਾਣੀ”

ਦੋਨੋਂ ਮਿਲ ਕੇ ਖੇਡਿਆ ਕਰਦੇ ਇਥੇ ਕੁੱਲੀ ਗੁੱਲੀ ਡੰਡਾ।

ਖੂਹੀ ਵਿੱਚੋਂ ਕੱਢ ਪਿਆਉਂਦਾ ਮੈਂ ਪਾਣੀ ਸੀ ਠੰਡਾ।

ਇਹਦਾ ਬਾਪੂ ਆਪਣੇ ਪਿੰਡ ਦਾ ਸਭ ਤੋਂ ਬਹੁਤਾ ਪੜਿ੍ਹਆ।

ਸ਼ਹਿਰ ਲਾਹੌਰ ਚ ਬੈਂਕ ਮੈਨੇਜਰ ਉੱਚੇ ਪਦ ਤੇ ਚੜਿ੍ਹਆ।

ਭਾਈ ਤਿੰਨ ਤੇ ਚੌਥਾ ਭਾਈ ਇੰਡੀਆ ਜਾ ਕੇ ਹੋਇਆ।

ਇਕ ਭੂਆ ਦਾ, ਇਕ ਚਾਚੇ ਦਾ ਪੁੱਤ ਉਜਾੜੇ ਮੋਇਆ।

ਖੇਤ ਇਨ੍ਹਾਂ ਦੇ ਵਿੱਚ ਨਿਆਈਂ, ਮੈਂ ਵੀ ਕਾਰ ਕਮਾਈ।

ਦੁਖਦੇ-ਸੁਖਦੇ ਇਸ ਪਰਿਵਾਰ ਨੇ ਸਾਡੀ ਪੀੜ ਵੰਡਾਈ।

ਹੁਣ ਵੀ ਜਦ ਮੈਂ ਇੰਡੀਆ ਜਾਨਾ ਲਾਗ ਬੜੀ ਮਿਲ ਜਾਂਦੀ।

ਆਉਣ ਜਾਣ ਦਾ ਖਰਚ ਨਿਕਲਦਾ, ਮਿਹਰ ਬੜੀ ਉਨ੍ਹਾਂ ਦੀ।

ਇਸਨੂੰ ਲਿਆ ਪਛਾਣ ਮੈ ਆਓ ਇਸਦਾ ਆਦਰ ਕਰੀਏ।

ਮਿਲ ਕੇ ਸਾਰਾ ਪਿੰਡ ਇਸਨੂੰ ਆਪਣੇ ਸਿਰ ਤੇ ਧਰੀਏ”।

ਉਸ ਬਜ਼ੁਰਗ ਨੂੰ ਭੱਜ ਕੇ ਮੈਂ ਸੀ ਧਾਅ ਗਲਵਕੜੀ ਪਾਈ।

ਲੋਕ ਇਕੱਠੇ ਹੋ ਗਏ ਦਿਲ ਤੋਂ ਕਰਦੇ ਖਾਤਰਦਾਰੀ ।

ਦੁੱਧ ਮਲਾਈ ਪਾ ਕੇ ਲਿਆਈ ਮਾਈ ਖੁਸ਼ੀ ਦੀ ਮਾਰੀ।

ਕਹਿੰਦੀ, “ਦੇਖ ਲੈ ਭਾਈ ਤੇਰਾ ਘਰ ਹੈ ਸਾਂਭ ਕੇ ਰੱਖਿਆ।

ਰੰਗ ਕਰਵਾਇਆ, ਇੱਟ ਨਾ ਬਦਲੀ, ਕੀਤਾ ਜੋ ਹੋ ਸਕਿਆ।

ਆਪਣੇ ਘਰ ਵਿੱਚ ਅੱਜ ਰਾਤ ਨੂੰ ਭਾਵੇਂ ਸੌਵੀਂ ਰੱਜ ਕੇ ।

ਖਾਣਾ ਪੀਣਾ ਘਰ ਅੱਜ ਸਾਡੇ, ਪੁਛੀਂ ਜੋ ਜੀ ਸਦਕੇ।

ਤਦ ਨੂੰ ਪੁੱਤ ਮਰਾਸੀ ਦਾ, ਜੋ ਮੇਰਾ ਸੀ ੳਹ ਹਾਣੀ।

ਆਉਂਦੇ ਧਾਅ ਗਲਵੱਕੜੀ ਪਾਈ ਸੁਣਕੇ ਮੇਰੀ ਕਹਾਣੀ।

ਉਹ ਕਹਿੰਦਾ “ਮੈਂ ਕਦੇ ਨਾ ਭੁੱਲਿਆ, ਆਪਣਾ ਸਾਥ ਪੁਰਾਣਾ।

ਤੇਰੀ ਬੇਬੇ ਹੱਥੋਂ ਖਾਧਾ ਕਈ ਵਾਰੀ ਸੀ ਖਾਣਾ”।

ਉਸਨੂੰ ਜੋ ਕੁੱਝ ਯਾਦ ਸੀ ਉਸ ਨੇ ਖੁਸ਼ ਹੋ ਕੇ ਦੁਹਰਾਇਆ।

ਏਨੇ ਨੂੰ ਮਾਈ ਨੇ ਦੁੱਧ ਦਾ ਹੱਥ ਗਿਲਾਸ ਫੜਾਇਆ।

ਮਾਈ ਤੋਂ ਦੁੱਧ ਪੀ ਕੇ, ਦੋਸਤ ਲੈ ਗਿਆ ਨਾਲ ਸਕੂਲੇ ।

ਵੱਡੇ ਪੜ੍ਹਦੇ ਦੇਖੇ ਬੱਚੇ, ਛੋਟੇ ਲੈਂਦੇ ਝੂਲੇ।

ਸੀ ਉਸਤਾਦ ਸਿਆਣਾ ਉਸ ਨੂੰ ਬੇਲੀ ਕਥਾ ਸੁਣਾਈ ।

ਸਭ ਬੱਚਿਆਂ ਨੂੰ ਉਸਨੇ ਮੇਰੀ ਜਾਣ ਪਛਾਣ ਕਰਾਈ।

“ਪੜ੍ਹਦੇ ਇੱਥੇ ਅਸੀਂ ਸੀ ਪਹਿਲਾਂ”, ਕਹਿੰਦਾ ਮੇਰਾ ਆੜੀ।

ਬੱਚਿਆਂ ਨੇ ਜੀ ਆਇਆ ਕਹਿ ਕੇ, ਖੂਬ ਵਜਾਈ ਤਾੜੀ ।

ਖਬਰ ਉੱਡ ਗਈ ਸਾਰੇ ਪਿੰਡ ਵਿੱਚ, ਸਿੱਖ ਭਾਰਤ ਤੋਂ ਆਇਆ।

ਏਸੇ ਪਿੰਡ ਦਾ ਜੰਮਪਲ ਜਿਸ ਨੂੰ ਪਿੰਡ ਹੈ ਖਿੱਚ ਲਿਆਇਆ।

ਪਿੰਡ ਦਾ ਮੋਹਰੀ ਬੰਦਾ ਆਇਆ ਲੈ ਕੇ ਢੋਲ ਢਮੱਕਾ।

ਸਾਂਝੀ ਬਾਪੂ ਦਾ ਸੀ ਹੁੰਦਾ ਕਈ ਸਾਲਾਂ ਤੋਂ ਪੱਕਾ।

ਕਹਿੰਦਾ ਸਾਡੇ ਧੰਨ ਭਾਗ ਜੋ ਮੁੜ ਆਪਣੇ ਪਿੰਡ ਆਇਆ।

ਫੇਸਬੁਕ ਤੇ ਲਿਖਤ ਤੇਰੀ ਨੂੰ ਅਸੀਂ ਹੈ ਰੋਜ਼ ਸਲਾਹਿਆ।

ਤੇਰਾ ‘ਰਤਨ’ ਤਖਲਸ ਸਾਡੇ ਪਿੰਡ ਦੀ ਸ਼ਾਨ ਵਧਾਉਂਦਾ ।

ਤਸਵੀਰਾਂ ਚੋਂ ਸਾਨੂੰ ਤੇਰਾ ਅਕਸ ਨਜ਼ਰ ਹੈ ਆਉਂਦਾ।

ਸੱਥ ਵਿੱਚ ਤੇਰੀਆਂ ਗੱਲਾਂ ਚੱਲਣ ਵੱਡੇ ਕਰਦੇ ਰਹਿੰਦੇ।

ਤੇਰੇ ਬਾਪੂ ਤੇ ਦਾਦੇ ਦੀਆਂ ਗੱਲਾਂ ਵੀ ਉਹ ਕਹਿੰਦੇ।

ਪਿੰਡ ਦਾ ਹੈਂ ਮਹਿਮਾਨ ਤੂੰ ਹੁਣ ਤਾਂ, ਘਰ ਘਰ ਤੇਰਾ ਖਾਣਾ।

ਘੱਟੋ ਘੱਟ ਮਹੀਨਾ ਰਹਿਣਾ, ਪਹਿਲਾਂ ਨਹੀਂਓਂ ਜਾਣਾ ।

ਏਨੇ ਵਿੱਚ ਮੇਰੀ ਨੀਂਦ ਖੁਲ੍ਹ ਗਈ ਉਹ ਹੀ ਪਲੰਘ ਪੁਰਾਣਾ।

ਜਿਸ ਨੇ ਏਥੇ ਰੋਕ ਕੇ ਰੱਖਿਆ ਹੋਰ ਕਿਤੇ ਵੀ ਜਾਣਾ ।

ਵਤਨ ਨੂੰ ਪਰਤਣ ਦਾ ਹੁਣ ਸੁਪਨਾ ਪੂਰਾ ਹੈ ਕਦ ਹੋਣਾ।

ਵਰ੍ਹੇ ਬਿਆਸੀ ਲੰਘੇ ਪਰ ਨਾ ਭੁੱਲਿਆ ਵਤਨ ਉਹ ਸੋਹਣਾ।

ਜੀਂਦਾ ਰਹੇ ਮੇਰਾ ‘ਰਤਨ’ ਪਿਆਰਾ, ਜਨਮ ਦਾ ਵਤਨ ਨਿਆਰਾ।

ਸੁਪਨੇ ਵਿੱਚ ਵੀ ਆਉਂਦਾ ਰਹਿੰਦਾ, ਦਿਲ ਤੇ ਜਾਨ ਤੋਂ ਪਿਆ0ਰਾ।

ਦੋ ਹਿੱਸਿਆਂ ਵਿੱਚ ਵੰਡਿਆ ਸਾਡਾ ਦੇਸ਼ ਹੈ ਮਤਲਬ-ਖੋਰਾਂ।

ਮੇਰੇ ਵਰਗੇ ਕਈ ਭਟਕਦੇ, ਵਤਨੋਂ ਟੁੱਟੀਆਂ ਡੋਰਾਂ।

ਸ਼ਾਲਾ ਅਪਣੇ ਵਤਨਾਂ ਤੋਂ ਨਾਂ ਅੱਡ ਕਿਸੇ ਨੂੰ ਕਰਨਾ।

ਸੁਪਨੇ ਵਿੱਚ ਵੀ ਆਉਂਦੀ ਰਹਿਣੀ ਜਨਮ ਭੂਮ ਤਾਂ ਵਰਨਾ।

 

[swarn bains]

what a memorial poem thank you