Poem Punjabi ਸਤਿਨਾਮ ਕਰਤਾਰ

[Dalvinder Singh Grewal]

ਤੂੰ ਜੀ ਹੈਂ ਰਚਿਆ ਦਾਤੇ ਦਾ
ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ

ਤੂੰ ਜੀ ਹੈਂ ਰਚਿਆ ਦਾਤੇ ਦਾ, ਤੂੰ ਕੁਦਰਤ ਦਾ ਇਕ ਗਹਿਣਾ ਹੈ ।
ਨਾ ਆਪਣੇ ਆਪ ਨੂੰ ਘੱਟ ਸਮਝ, ਸਿੱਖ ਵਾਂਗ ਨਦੀ ਦੇ ਵਹਿਣਾ ਹੈ।
ਨਾ ਨਾਲ ਲਿਆਇਆ ਕੁਝ ਵੀ ਸੀ, ਨਾ ਨਾਲ ਲਿਜਾਣਾ ਕੁਝ ਵੀ ਹੈ,
ਨਾ ਕਰਨਾ ਮਾਣ ਕਮਾਈਆਂ ਦਾ, ਉਹ ਕਰਨਾ ਪ੍ਰਭ ਜੋ ਕਹਿਣਾ ਹੈ ।
ਜੋ ਵੀ ਹੈ ਕਰਨਾ ਜੀ ਲਾ ਕੇ, ਮਦਦ ਕਰ ਸੰਗੀ ਸਾਥੀ ਦੀ,
ਨਾ ਡਰਿਆ ਕਰ, ਨਾ ਝੁਕਿਆ ਕਰ, ਕਿਉਂ ਰੋਹਬ ਕਿਸੇ ਦਾ ਸਹਿਣਾ ਹੈ ।
ਜੋ ਕਰਨਾ ਰੱਬ ਕਰਵਾਉਣਾ ਹੈ, ਕੋਈ ਉਸ ਦੇ ਹੁਕਮੋਂ ਬਾਹਰ ਨਹੀਂ,
ਮਨ ਸਾਫ ਰਖ, ਚਿਤ ਪ੍ਰੇਮ ਵਸਾ, ਨਾ ਬੁਰਾ ਕਿਸੇ ਨੂੰ ਕਹਿਣਾ ਹੈ ।
ਜੁੜ ਰਹਿਣਾ ਸਿੱਖ, ਮਿਲ ਬਹਿਣਾ ਸਿਖ, ਬਚ ਧਰਮ ਦੀ ਵੰਡੀ ਪਾਈ ਤੋਂ।
ਇਕ ਦਾਤੇ ਦੇ ਸਭ ਜੀ ਜਾਣੀ, ਨਾ ਊਚ ਨੀਚ ਵਿਚ ਪੈਣਾ ਹੈ,
ਹੱਥ ਜੋੜ ਭਲਾ ਮੰਗ ਸਭਨਾਂ ਦਾ, ਨਾ ਵੈਰ ਵਿਰੋਧ ਦੀਆਂ ਗੱਲਾਂ ਕਰ,
ਜੇ ਦਾਤਾ ਇਤਨੇ ਸੁਖ ਦਿੰਦਾ, ਦੁਖ ਮਿਲੇ ਤਾਂ ਉਹ ਵੀ ਸਹਿਣਾ ਹੈ।
ਦਿਨ ਰਾਤ ਇਹੁੋ ਅਰਦਾਸ ਕਰੀਂ, ਪ੍ਰਭ ਜੀ ਸਦ ਚੇਤੇ ਵਿੱਚ ਵਸੇਂ,
ਕਰਿ ਕਿਰਪਾ ਨਾਲ ਮਿਲਾ ਆਪਣੇ, ਆਖਰ ਜੋ ਟਿਕਾਣਾ ਲੈਣਾ ਹੈ।

 

[Dalvinder Singh Grewal]

ਉਹ ਲੋਕ ਬੇਗਾਨੇ ਨਹੀਂ ਹੁੰਦੇ
ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ

ਜੋ ਫਿਕਰ ਤੁਹਾਡਾ ਕਰਦੇ ਨੇ, ਉਹ ਲੋਕ ਬੇਗਾਨੇ ਨਹੀਂ ਹੁੰਦੇ।
ਹਸ ਗੁੱਸਾ ਗਿਲਾ ਜਰਦੇ ਨੇ, ਉਹ ਲੋਕ ਬੇਗਾਨੇ ਨਹੀਂ ਹੁੰਦੇ।
ਜੋ ਤਾਪ ਚੜੇ ਤਾਂ ਹੂੰਗਣ ਉਹ, ਮੱਥੇ ਤੇ ਪੱਟੀਆਂ ਧਰਦੇ ਨੇ,
ਜੋ ਮੁੱਠੀ ਚਾਪੀ ਕਰਦੇ ਨੇ, ਉਹ ਲੋਕ ਬੇਗਾਨੇ ਨਹੀਂ ਹੁੰਦੇ ।
ਜਦ ਲੋੜ ਪਵੇ ਤਾਂ ਖਿਸਕ ਜਾਣ, ਉਨ੍ਹਾਂ ਤੋਂ ਰਹੀਏ ਦੂਰ ਦੂਰ,
ਸਭ ਖੱਟੀ ਹੱਥ ਤੇ ਧਰਦੇ ਨੇ, ਉਹ ਲੋਕ ਬੇਗਾਨੇ ਨਹੀਂ ਹੁੰਦੇ ।
ਜੋ ਪਿਆਰ ਲਈ ਵਾਗੀ ਬਣ ਜਾਂਦੇ, ਘਰ ਬਾਰ ਤੋਂ ਲਾਭੇ ਹੋ ਜਾਂਦੇ
ਕਚਿਆਂ ਤੇ ਝਨਾਵਾਂ ਤਰਦੇ ਨੇ, ਉਹ ਲੋਕ ਬੇਗਾਨੇ ਨਹੀਂ ਹੁੰਦੇ ।
ਜੋ ਲੋੜ ਪਈ ਤਾਂ ਮਦਦ ਕਰਨ, ਜੋ ਜਖਮ ਤੇ ਮਰਹਮ ਲਾਉਂਦੇ ਨੇ
ਜੋ ਦੁੱਖ ਵਿੱਚ ਮੱਦਦ ਕਰਦੇ ਨੇ, ਉਹ ਲੋਕ ਬੇਗਾਨੇ ਨਈਂ0 ਹੁੰਦੇ।
ਦੂਜੇ ਲਈ ਆਪਾ ਵਾਰਨ ਜੋ, ਖੁਦ ਰੁੱਖੀ ਸੁੱਖੀ ਖਾ ਸਾਰਨ,
ਵਤਨਾਂ ਲਈ ਜਿਹੜੇ ਮਰਦੇ ਨੇ, ਉਹ ਲੋਕ ਬੇਗਾਨੇ ਨਹੀਂ ਹੁੰਦੇ।
ਚਾਹੀਦੀ ਅੱਖ ਪਛਾਨਣ ਲਈ, ਰੂਹ ਸੱਚ ਤੇ ਝੂਠ ਨਖੇੜਣ ਲਈ,
ਜੋ ਪਿਆਰ ਚ ਰਾਵੀ ਤਰਦੇ ਨੇ, ਉਹ ਲੋਕ ਬੇਗਾਨੇ ਨਹੀਂ ਹੁੰਦੇ ।
ਤੱਕ ਭੁੱਖਾ ਆਪਣੇ ਮਿੱਤਰਾਂ ਨੂੰ ਆਪਣੀ ਵੀ ਅੱਗੇ ਧਰ ਦਿੰਦੇ
ਜੋ ਸਦਾ ਸੋਚਦੇ ਸਾਥੀ ਦੀ, ਉਹ ਲੋਕ ਬੇਗਾਨੇ ਨਹੀਂ ਹੁੰਦੇ ।
ਜੋ ਮਤਲਬ ਖਾਤਰ ਨੇੜ ਹੋਣ, ਬਚ ਉਨ੍ਹਾਂ ਤੋਂ ਤੂੰ ਗਰੇਵਾਲ
ਇਜ਼ਤਾਂ ਤੇ ਪਾਉਂਦੇ ਪਰਦੇ ਜੋ, ਉਹ ਲੋਕ ਬੇਗਾਨੇ ਨਹੀਂ ਹੁੰਦੇ।

 

[Dalvinder Singh Grewal]

ਵਕਤ ਨਾਲ ਕੋਈ ਭੱਜ ਨਾ ਸਕਦਾ
ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ

ਭੱਜਦੇ ਹੋਏ ਵਕਤ ਨਾਲ ਕੋਈ ਭੱਜ ਨਾ ਸਕਦਾ।
ਢੇਰ ਖਾਣ ਨੂੰ ਹੋਣ ਸਦਾ ਲਈ ਰਜ ਨਾ ਸਕਦਾ।
ਚਾਦਰ ਹੋਵੇ ਛੋਟੀ ਤਾਂ ਤਨ ਕਜ ਨਾ ਸਕਦਾ ।
ਦੋਨੋਂ ਹੱਥੀ ਕਰਨੀ ਪੈਂਦੀ ਮਿਹਨਤ ਦੱਬ ਕੇ,
ਇੱਕ ਹੱਥ ਦੇ ਨਾਲ ਢੋਲ ਤਾਂ ਵੱਜ ਨਹੀਂ ਸਕਦਾ।
ਸਾਥ ਅਜਿਹਾ ਭਾਲ ਜੋ ਹੋਵੇ ਧੁਰ ਦਾ ਸਾਥੀ,
ਅਧਵਾਟੇੋ ਛੱਡ ਜਾਵੇ ਉਸ ਸੰਗ ਸਜ ਨਾ ਸਕਦਾ।
ਅੰਦਰ-ਬਾਹਰ ਇੱਕ ਹੋਵੇ ਭਾਲ ਅਜਿਹਾ,
ਗਿਦੜ ਕਦੇ ਸ਼ੇਰ ਦੇ ਵਾਂਗੂੰ ਗਜ ਨਾ ਸਕਦਾ।

 

[swarn bains]

ਵਕਤ ਚੱਲਦਾ ਚੱਲਦਾ ਚਲੀ ਜਾਂਦਾ
ਪਾਣੀ ਵਗਦਾ ਵਗਦਾ ਵਗੀ ਜਾਂਦਾ
ਸਮਾਂ ਬੀਤਿਆ ਪਾਣੀ ਵਗਿਾਆ ਮੜ ਕੇ ਨਹੀਂ ਆਉਂਦਾ
ਡਾਕਟਰ ਸਾਹਿਬ ਇੰਨੀ ਜਾਣਕਾਰੀ ਕਿਵੇਂ ਹਾਸਲ ਕਰਦੇ ਹੋ
ਮੈਂ ਆਪ ਦਾ ਸ਼ੁਕਰਗੁਜ਼ਾਰ ਹਾੰਂ ਜੋੋ ਥੋੜਾ ਬਹੁਤਾ ਸਾਡੇ ਪੱਲੇ ਵੀ ਪੈ ਜਾਂਦਾ ਹੈ

 

[Dalvinder Singh Grewal]

ਸਵਾਲਾਂ ਦੇ ਘੇਰੇ ਵਿੱਚ ਜੀਵਨ
ਡਾ:ਦਲਵਿੰਦਰ ਸਿੰਘ ਗ੍ਰੇਵਾਲ

ਜਦੋਂ ਸਵਾਲਾਂ ਦੇ ਘੇਰੇ ਵਿੱਚ ਜੀਵਨ ਹੋਵੇ।
ਮਨ ਤੇ ਕਿਉਂ ਨਾ ਚਿੰਤਾਵਾਂ ਦਾ ਆਸਨ ਹੋਵੇ।
ਚੰਦ ਸਿਕਿਆਂ ਦੇ ਦਾਣੇ ਪਾ ਵੋਟਾਂ ਹਥਿਆਵਣ,
ਚੋਣ-ਮਨੋਰਥ ਵਾਅਦੇ ਦਾ ਕਦ ਜ਼ਾਮਨ ਹੋਵੇ।
ਵਢੀ ਠੱਗੀ ਨਾਲ ਜਦੋਂ ਜਿੱਤਣ ਸਰਕਾਰਾਂ,
ਲੋਕਾਂ ਵਿੱਚ ਕਿੰਜ ਵਤਨ ਲਈ ਆਪਣਾਪਨ ਹੋਵੇ।
ਨੇਤਾ ਤੇ ਅਧਿਕਾਰੀ ਜਦ ਘਰ ਭਰਨ ਚ ਲੱਗੇ,
ਭੁੱਖ ਨੰਗ ਤੇ ਬੇਰੁਜ਼ਗਾਰੀ ਕਾਮਨ ਹੋਵੇ ।
ਸੱਚ ਹੱਕ ਇਨਸਾਫ ਜਦੋਂ ਮਤਲਬ ਖੋਹ ਲੈਂਦਾ,
ਲੋਕ ਭਲਾਈ ਦਾ ਦਿਲ ਕੀਕੂੰ ਜ਼ਾਮਨ ਹੋਵੇ।
ਧਰਮਾਂ ਵਿੱਚ ਪਾ ਵੰਡੀ, ਅਪਣੀ ਸਾਖ ਵਧਾਵਣ,
ਵਤਨ ਤੋੜਣ ਦਾ ਇਹ ਵੀ ਤਾਂ ਇੱਕ ਸਾਧਨ ਹੋਵੇ।
ਉਪਰਥਲੀ ਦੇ ਬਣਦੇ ਜਦ ਹਾਲਾਤ ਦੇਸ਼ ਵਿੱਚ,
ਲੋਕ ਰਾਜ ਦਾ ਖਤਰੇ ਦੇ ਵਿੱਚ ਦਾਮਨ ਹੋਵੇ।

 

[Dalvinder Singh Grewal]

ਬਾਬਾ ਨਾਨਕ ਤੇਰੀ ਲੋੜ

ਡਾ:ਦਲਵਿੰਦਰ ਸਿੰਘ ਗ੍ਰੇਵਾਲ

ਬਾਬਾ ਨਾਨਕ ਤੇਰੀ ਹੈ ਅੱਜ ਬੜੀਓ ਲੋੜ।

ਭੁਰ ਚਲੀ ਇਨਸਾਨੀਅਤ ਫਿਰ ਆ ਕੇ ਜੋੜ।

ਦੌਲਤ ਤਾਕਤ ਦੀ ਭੁੱਖ ਹੋ ਗਈ ਹੱਦੋਂ ਬਾਹਰੀ,

ਪਿਆਰ ਮੁਹੱਬਤ ਦੀ ਹੁਣ ਪੈ ਗਈ ਡਾਢੀ ਥੋੜ।

ਦੁੱਖ, ਭੁੱਖ ਤੇ ਮੌਤ ਨੇ ਅੱਜ ਬਣ ਗਏ ਹਥਿਆਰ,

ਜ਼ੁਲਮ ਵਧੇ ਨੇ ਜਿਨਾਂ ਦਾ ਨਾ ਕੋਈ ਤੋੜ।

ਬਾਲਾਂ, ਨਾਰਾਂ, ਬਿਰਧਾਂ ਨੂੰ ਫੁੰਡਣ ਹਤਿਆਰੇ,

ਬੇਰਹਿਮ ਹੋ ਇਨਸਾਨਾਂ ਦੀ ਰੱਤ ਰਹੇ ਨਿਚੋੜ।

ਸਭਨਾ ਜੀਆ ਕਾ ਇਕ ਦਾਤਾ, ਇਹ ਨ ਸਮਝਣ,

ਮਨਾ-ਦਿਲਾਂ ਵਿੱਚ ਪੈ ਗਈ ਹੈ ਅੱਜ ਵੱਡੀ ਖੋੜ।

ਰੱਤ ਪੀਣ ਮਾਣਸ ਦੀ, ਕੀਕੂੰ ਨਿਰਮਲ ਹੋਵਣ,

ਨਾਮ ਖੁਦਾ ਦਾ ਲੈਣ ਬਿਨਾ ਨ ਕੋਈ ਹੋੜ।

ਨਾਮ ਜਗਤ ਦੇ ਕੰਨਾਂ ਵਿੱਚ ਫਿਰ ਪਾਈਂ ਆ ਕੇ,

ਸ਼ਰਧਾ ਸੱਚੇ ਸਤਿਗੁਰ ਵੱਲ ਹੁਣ ਆ ਕੇ ਮੋੜ।

 

[swarn bains]

ਮਾਣਸ ਜਨਮ ਦੁਲੰਭ ਹੈ. ਹੋਏ ਨ ਬਾਰੋ ਬਾਰ. ਫਲ ਪਾਕੇ ਭੋਂਏ ਗਿਰੇ ਬਹੁੜ ਨ ਲਾਗੈ ਡਾਰ ਧੰਨਵਾਦ ਜੀ

 

[Dalvinder Singh Grewal]

Thank you, Bains sahib.

 

[Dalvinder Singh Grewal]

ਜੀਵਣ ਚੱਜ
ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ

ਚਾਰੇ ਪਾਸੇ ਲੱਗੀ ਅੱਗ।
ਚਿੰਤਾ ਦੇ ਵਿੱਚ ਸਾਰਾ ਜਗ ।
ੀਮਹਨਤ ਦਾ ਮੁੱਲ ਜ਼ੀਰੋ ਹੈ,
ਐਸ਼ ਕਰ ਰਹੇ ਚੋਰ ਤੇ ਠੱਗ।
ਸੱਚ ਨੂੰ ਏਥੇ ਪੁੱਛਦਾ ਕੌਣ,
ਗੱਦੀ ਬੈਠੇ ਲਾਈ ਲੱਗ।
ਅਰਬਾਂ ਵਾਲੇ ਚੰਦ ਕੁ ਲੋਕ,
ਭਟਕ ਰਿਹਾ ਭੁਖਿਆਂ ਦਾ ਵੱਗ।
ਵਿਕ ਜਾਂਦੀ ਹੈ ਜਦ ਸਰਕਾਰ,
ਦੇਸ਼ ਵੀ ਦੇਵਣ ਵੇਚ ਨਿਲਾਜ।
ਗ੍ਰੇਵਾਲ ਇਹ ਕਰ ਅਰਦਾਸਾਂ,
ਸਭ ਨੂੰ ਆਵੇ ਜੀਵਨ ਚੱਜ।