Poem Punjabi ਸਤਿਨਾਮ ਕਰਤਾਰ

[Dalvinder Singh Grewal]

ਬਾਬਾ ਨਾਨਕ ਤਾਰਨ ਆਇਆ

ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ

ਹਰ ਪਾਸੇ ਜਦ ਨ੍ਹੇਰਾ ਛਾਇਆ।

ਬਾਬੇ ਨਾਨਕ ਜੱਗ ਰੁਸ਼ਨਾਇਆ।

ਧਾੜਵੀਆਂ ਦਾ ਰਾਜ ਸੀ ਹਿੰਦ ਤੇ

ਜੂਲਾ ਗਲੇ ਗੁਲਾਮੀ ਪਾਇਆ।

ਜ਼ੁਲਮਾਂ ਦੀ ਸੀ ਹੱਦ ਨਾ ਕੋਈ,

ਲੁੱਟ ਲੈਂਦੇ ਉਹ ਸੱਭ ਕਮਾਇਆ।

ਇਜ਼ਤ ਅਸਮਤ ਸਭ ਲੁੱਟ ਲੀਤੀ,

ਭੁੱਖ ਦੁੱਖ ਹਰ ਘਰ, ਨੰਗ ਦਾ ਸਾਇਆ।

ਇਨਸਾਨਾਂ ਜਹੀ ਗੱਲ ਨਾ ਕਿਧਰੇ

ਸ਼ਰਮ ਧਰਮ ਨੂੰ ਗੁੱਠੇ ਲਾਇਆ।

ਬਾਬਾ ਨਾਨਕ ਤਾਰਨ ਆਇਆ

ਝੂਠ ਦਾ ਡੰਕਾ ਵੱਜ ਰਿਹਾ ਸੀ

ਮੂੰਹ ਇਨਸਾਫ ਵੀ ਕੱਜ ਰਿਹਾ ਸੀ

ਜੀਣ ਦਾ ਨਾ ਕੋਈ ਚੱਜ ਰਿਹਾ ਸੀ

ਉਸਨੇ ਜਗ ਨੂੰ ਰਾਹੇ ਪਾਇਆ

ਬਾਬਾ ਨਾਨਕ ਤਾਰਨ ਆਇਆ

ਲੁੱਟਣ ਪੰਡਿਤ ਅਤੇ ਮਲਾਣੇ

ਸੱਚ ਧਰਮ ਨੂੰ ਕੋਈ ਨਾ ਜਾਣੇ

ਚੂੰਡਣ ਜਨਤਾ ਰਾਜੇ ਰਾਣੇ

ਭਰਮਾਂ ਵਿੱਚ ਲੋਕਾਂ ਨੂੰ ਪਾਇਆ

ਜਦ ਕਿਧਰੋਂ ਕੋਈ ਆਸ ਕਿਰਨ ਨਾ

ਚਾਨਣ ਛਿੱਟ ਗੁਰ ਨਾਨਕ ਲਿਆਇਆ।

ਆਕੇ ਸਭ ਦਾ ਦਰਦ ਵੰਡਾਇਆ।

ਬਾਬਾ ਨਾਨਕ ਤਾਰਨ ਆਇਆ

ਆਕੇ ਸੱਚ ਦਾ ਪਾਠ ਪੜ੍ਹਾਇਆ।

ਕਿਰਤ ਕਰਦਿਆਂ ਨਾਮ ਜਪਾਇਆ।

ਪੰਗਤ ਵਿਚ ਬਹਿਣ ਸਿਖਾਇਆ

ਸਭਨਾਂ ਦਾ ਰੱਬ ਇੱਕ ਸਮਝਾਇਆ

ਰਾਜਾ ਰੰਕ ਦਾ ਭੇਦ ਮਿਟਾਇਆ

ਬਾਬਾ ਨਾਨਕ ਤਾਰਨ ਆਇਆ।

 

[Dalvinder Singh Grewal]

ਉਸ ਵਿੱਚ ਮਿਲਕੇ ਸਫਰ ਮੁਕਾਈਏ
ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ

ਉਸ ਰਸਤੇ ਤੇ ਕਦੇ ਨਾਂ ਜਾੲਏ।
ਜਿਸ ਰਸਤੇ ਨਾਂ ਮੰਜ਼ਿਲ ਪਾਈਏ।
ਜਾਣਕਾਰ ਤੋਂ ਜਾਣੋਂ ਪਹਿਲਾਂ
ਕਿਹੜਾ ਚੰਗਾ ਰਾਹ ਅਪਣਾਈਏ।
ਜਿਸ ਨੂੰ ਮਿਲਣਾ ਚੇਤੇ ਰੱਖਣਾ
ਵਾਰ ਵਾਰ ਉਹ ਨਾਂ ਦੁਹਰਾਈਏ।
ਏਧਰ ਓਧਰ ਖਿੱਚਾਂ ਛੱਡਕੇ
ਮੰਜ਼ਿਲ ਵੱਲ ਹੀ ਧਿਆਨ ਲਗਾਈਏ।
ਜੇ ਮਿਲ ਜਾਵੇ ਸੰਗੀ ਚੰਗਾ,
ਉਸ ਨੂੰ ਅਪਣੇ ਨਾਲ ਰਲਾਈਏ।
ਚਲਦੇ ਚਲਦੇ ਰੁਕਣਾ ਨਾਂਹੀ,
ਰਫਤਾ ਰਫਤਾ ਕਦਮ ਵਧਾਈਏ।
ਦਾਈਆ ਪੱਕਾ, ਸੇਧ ਮੰਜ਼ਿਲ ਦੀ,
ਉਸ ਵਿੱਚ ਮਿਲਕੇ ਸਫਰ ਮੁਕਾਈਏ।

 

[Dalvinder Singh Grewal]

ਮੈਂ ਹੋ ਗਈ ਨੂਰੋ ਨੂਰ
ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ
ਮੈਂ ਹੋ ਗਈ ਨੂਰੋ ਨੂਰ, ਸੱਜਣ ਜਦ ਪਾਇਆ।
ਮਨ ਤਨ ਹੋਇਆ ਮਖਮੂਰ, ਸੱਜਣ ਜਦ ਪਾਇਆ।
ਮੈਂ ਮੇਰੀ ਮੁੱਕੀ ਮਨ ਤਨ, ਜਦ ਉਸ ਵਿੱਚ ਸਮਾਇਆ,
ਅੰਮ੍ਰਿਤ ਦੀ ਵਰਸੀ ਭੂਰ, ਸੱਜਣ ਜਦ ਪਾਇਆ।
ਅੰਗ ਅੰਗ ਛਿੜੀਆਂ ਝਰਨਾਟਾਂ ਨੀ, ਜਦ ਉਸ ਗਲ ਲਾਇਆ,
ਨਵਜੀਵਨ ਸੱਜਣ ਹਜੂਰ, ਸੱਜਣ ਜਦ ਪਾਇਆ।
ਹੈ ਉਹ ਹੀ, ਉਹ ਹੀ, ਚੇਤੇ ਵਿਚ, ਹਿਰਦਾ ਰੁਸ਼ਨਾਇਆ,
ਸਭ ਭੁੱਲ ਗਏ ਚੱਜ ਸ਼ਊਰ, ਸੱਜਣ ਜਦ ਪਾਇਆ।
ਮਨ ਚਿੱਤ ਨੇ ਖਾਲੀ ਖਾਲੀ ਨੀ ਸਭ ਸਮਝਾਂ ਮੁੱਕੀਆਂ,
ਇੱਕ ਚਿੱਤ ਵਿੱਚ ਉੱਠਿਆ ਤੂਰ, ਸੱਜਣ ਜਦ ਪਾਇਆ ।
ਮੈਂ ਹੋ ਗਈ ਨੂਰੋ ਨੂਰ, ਸੱਜਣ ਜਦ ਪਾਇਆ।

 

[Dalvinder Singh Grewal]

ਬੇਸ਼ਕੀਮਤੀ ਰੱਬ ਦੀਆਂ ਕਿਰਤਾਂ
ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ
ਬੇਸ਼ਕੀਮਤੀ ਰੱਬ ਦੀਆਂ ਕਿਰਤਾਂ, ਫਿਰ ਵੀ ਚਿੱਤ ਨਾ ਖੜ੍ਹਦਾ।
ਆਪਣੇ ਆਲ-ਦੁਆਲੇ ਭਟਕਾਂ ਅੰਦਰ ਨਹੀਂਓਂ ਵੜਦਾ।
ਆਪਣਾ ਆਪਾ ਕਿਵੇਂ ਪਛਾਣਾਂ? ਰੱਬਾ ਕਿਰਪਾ ਕਰਦੇ,
ਦੱਸਦੇ ਕਿਸ ਕੰਮ ਜੱਗ ਤੇ ਘਲਿਆ, ਕਿਸ ਲਈ ਜੀਵਨ ਘੜਦਾ।
ਜਿਸ ਦਿਨ ਆਪ ਪਛਾਣ ਲਿਆ ਮੈਂ, ਫਿਰ ਮੈਂ ਭਾਲੂ ਤੈਨੂੰ,
ਤੈਨੂੰ ਕੀਕੂੰ ਭਾਲੂੰਗਾ ਜੇ, ਖੁਦ ਸੰਗ ਰਿਹਾ ਮੈਂ ਲੜਦਾ।
ਦੁਨੀਆਂਦਾਰੀ ਨਿਰੀ ਖੁਆਰੀ ਵਿਚੋਂ ਕਦ ਰੱਬ ਮਿਲਦਾ,
ਰਿਹਾ ਗ੍ਰੰਥਾਂ ਦੇ ਵਿੱਚ ਏਹੋ ਸਾਲਾਂ ਤੋਂ ਮੈਂ ਪੜ੍ਹਦਾ ।
ਮੋਹ ਮਾਇਆ ਦੇ ਜਾਲ ਚ ਫਸਿਆ ਜ਼ਰ ਜੋਰੂ ਦਾ ਚੱਕਰ,
ਤੇਰੇ ਵਲ ਨੂੰ ਮੁੜਦਾ ਹਾਂ ਜਦ ਜੱਗ ਅੱਗੇ ਆ ਅੜਦਾ।
ਤੇਰੀ ਮਿਹਰ ਪਵੇ ਤਾਂ ਆਊ ਸ਼ੁਭ ਕਰਮਾਂ ਦੀ ਸੋਝੀ,
ਹੁਣ ਤਾਂ ਦੁਨੀਆਦਾਰੀ ਦੇ ਵਿੱਚ,ਪਉੜੀ ਪਉੜੀ ਚੜ੍ਹਦਾ।

 

[Dalvinder Singh Grewal]

ਅਰਦਾਸ
ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ
ਹੱਥ ਜੋੜ ਕੇ ਮੈਂ ਕਰਾਂ ਅਰਦਾਸ ਵਾਹਿਗੁਰੂ।
ਮੈਨੂੰ ਆਪਣਾ ਬਣਾ ਕੇ ਰੱਖ ਦਾਸ ਵਾਹਿਗੁਰੂ।
ਜੋ ਤੂੰ ਆਖੇ ਉਹੀ ਕਰੀ ਜਾਵਾਂ ਕੰਮ ਚਿੱਤ ਲਾ,
ਸਦਾ ਚਰਨਾਂ ਦੇ ਰੱਖਣਾ ਜੀ ਪਾਸ ਵਾਹਿਗੁਰੂ।
ਸ਼ਦਾ ਖੇੜੇ ਤੇ ਵਿਗਾਸ ਦੀ ਕਰੀ ਜਾਵਾਂ ਗੱਲ
ਭੁਰਾ ਸੋਚਕੇ ਮੈਂ ਹੋਵਾਂ ਨਾਂ ਨਿਰਾਸ ਵਾਹਿਗੁਰੂ।
ਤੇਰੀ ਕੁਦਰਤ ਦਾ ਬਣ ਕੇ ਅਭਿੰਨ ਅੰਗ ਜੀਵਾਂ,
ਹੋਵਾ ਬੰਦਾ ਨਾ ਕੋਈ ਆਮ ਤੇ ਨਾ ਖਾਸ ਵਾਹਿਗੁਰੂ।
ਜੋ ਕਮਾਵਾਂ ਹੋਰਾਂ ਨਾਲ ਮੈਂ ਉਹ ਵੰਡ ਵੰਡ ਖਾਵਾਂ,
ਹੋਵੇ ਚਿੱਤ ਵਿੱਚ ਵੰਡ ਕੇ ਹੁਲਾਸ ਵਾਹਿਗੁਰੂ।
ਹਰ ਇੱਕ ਪਲ ਤੇਰੇ ਹੀ ਧਿਆਨ ਵਿੱਚ ਜੀਵਾਂ,
ਹੋਵੇ ਤੇਰੇ ਵਿੱਚ ਪੱਕਾ ਵਿਸ਼ਵਾਸ਼ ਵਾਹਿਗੁਰੂ।

 

[Dalvinder Singh Grewal]

ਰੁਬਾਈਆਂ
ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ

ਖੰਡੇ ਨੂੰ ਖੜਕਾਣੋ ਪਹਿਲਾਂ ਚਰਚਾ ਬੜੀ ਜ਼ਰੂਰੀ।
ਨਾਲ ਵਿਚਾਰਾਂ ਹੱਲ ਹੋ ਸਕਦੀ ਜੋ ਕੋਈ ਗੱਲ ਅਧੂਰੀ।
ਗੁਰੂ ਨਾਨਕ ਨੇ ਗੋਸ਼ਟੀਆਂ ਕਰ ਜਿਤ ਲਿਆ ਜਗ ਸਾਰਾ,
ਸੋਚ ਵਿਚਾਰਾਂ ਗੋਸ਼ਟੀਆਂ ਰਾਹ, ਹੋ ਸਕਦੀ ਗੱਲ ਪੂਰੀ।

ਵੀਹ ਰੁਪਏ ਖਰਚ ਗੁਰੂ ਨੇ ਲੰਗਰ ਦੀ ਨੀਂਹ ਢਾਲੀ।
ਲਖ ਕਰੋੜਾਂ ਛਕ ਗਏ ਪੱਕਦਾ, ਲੰਗਰ ਤਾਜ਼ਾ ਹਾਲੀ।
ਗੁਰੂ ਘਰਾਂ ਵਿੱਚ ਲੋੜਵੰਦ ਨੂੰ ਸਿੱਖ ਖਲਾ ਖੁਸ਼ ਹੋਵੇ,
ਲੰਗਰ ਖਤਮ ਕਦੇ ਨਾ ਹੋਵੇ ਇਹ ਹੈ ਗੱਲ ਨਿਰਾਲੀ।

ਮਨ ਦੀਆਂ ਛੱਡ ਗੁਰੂ ਦੀ ਮੰਨ ਕੇ ਮਾਰਗ ਪਵੋ ਸੁਵੱਲੇ।
ਇਕ ਓਕਾਰ ਦਾ ਭਾਵ ਸਮਝ ਕੇ, ਸਭ ਸਮਝੋ ਰੱਬ ਘਲੇ।
ਕਾਮ, ਕ੍ਰੋਧ, ਹੰਕਾਰ ਲੋਭ ਛੱਡ, ਮੋਹ ਮਾਇਆ ਨੂੰ ਤਿਆਗੋ,
ਕਰ ਸੁਕਿਰਤ, ਜਪ ਨਾਮ ਤੇ ਵੰਡ ਛਕ ਤੁਰ ਪਉ ਈਸ਼ਰ ਵੱਲੇ।

ਗੁਰੂ ਗ੍ਰੰਥ, ਸੰਗਤ ਤੇ ਪੰਗਤ, ਸੇਵਾ ਸਿਮਰਨ ਸਿਖੋ।
ਇੱਕ ਵਾਹਿਗੁਰੂ ਸਭ ਦਾ ਦਾਤਾ ਆਪਣੇ ਮਨ ਤੇ ਲਿਖੋ।
ਜੀਣ ਸੁਚੱਜਾ ਭਲਾ ਸਭਸ ਦਾ ਦਇਆ ਮੁਹੱਬਤ ਧਾਰੋ,
ਸਤ ਸੰਤੋਖ ਸਬਰ ਚ ਰਹਿ ਕੇ ਆਪਸ ਵਿੱਚ ਵਿਚਾਰੋ।

ਆਪ ਮਿਟਾ ਕੇ ਤੂੰ ਹੀ, ਤੂੰ ਹੀ, ਜਿਸ ਵੇਲੇ ਹੋ ਜਾਵੇ।
ਕੀ ਹੈ? ਕੌਣ ਹੈ? ਕਿੱਥੇ ਹੈ ਉਹ? ਤਾਂ ਹੀ ਸਮਝ ਚ ਆਵੇ,
ਮਨ ਨੂੰ ਜਗ ਤੋਂ ਮੋੜ ਇਸ ਲਈ ਰੱਬ ਵੱਲ ਲਾਉਣਾ ਪੈਣਾ,
ਰਗ ਰਗ ਦੇ ਵਿੱਚ ਨਾਮ ਸਮਾਵੇ ਤਾਂ ਜਾ ਕੇ ਰੱਬ ਪਾਵੇ।

ਸਾਰੀ ਰਚਨਾ ਰੱਬ ਰਚਾਈ, ਉਸਦੇ ਸਭ ਪਿਆਰੇ ।
ਜੋ ਉਸ ਦੇ ਜੀਅ ਨੂੰ ਦੁਖ ਦੇਵੇ, ਰੱਬ ਕਿਉਂ ਸਤਿਕਾਰੇ।
ਸਭ ਨੂੰ ਪਿਆਰ ਕਰੋਗੇ ਉਹ ਵੀ ਨਜ਼ਰ ਸਵੱਲੀ ਪਾਊ,
ਜੋ ਕੁਦਰਤ ਨੂੰ ਕਾਦਰ ਸਮਝੇ ਉਸਦੇ ਪਾਰ ਉਤਾਰੇ।

 

[Dalvinder Singh Grewal]

ਨੂਰਾਨੀ ਲਹਿਰਾਂ
ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ
ਈਸ਼ਵਰ ਦਾ ਜਦ ਨੇੜਾ ਪਾਈਏ, ਉਠਣ ਨੂਰਾਨੀ ਲਹਿਰਾਂ ।
ਤੂੰ ਹੀ, ਤੂੰ ਹੀ, ਦੀ ਧੁਨ ਗਾਈਏ, ਉਠਣ ਨੂਰਾਨੀ ਲਹਿਰਾਂ ।
ਸਾਰੀ ਰਚਨਾ ਵਿੱਚ ਉਹ ਦਿਸੇ, ਗੈਰ ਦਿਸੇ ਨ ਕੋਈ,
ਮੈਂ ਦਾ ਜਦ ਵੀ ਮੂਲ ਮਿਟਾਈਏ, ਉੱਠਣ ਨੂਰਾਨੀ ਲਹਿਰਾਂ।
ਮਾਇਆ ਦੇ ਜਾਲੋਂ ਬਚ ਜਾਈਏ, ਖੁੱਲਾਂ ਦੇ ਵਿੱਚ ਉੱਡੀਏ,
ਰੱਬ ਵਿੱਚ ਪੱਕਾ ਚਿੱਤ ਟਿਕਾਈਏ, ਉਠਣ ਨੂਰਾਨੀ ਲਹਿਰਾਂ ।
ਸ਼ਕਤੀ ਦਾ ਸੰਚਾਰ ਅਚਾਨਕ ਤਨ ਤੇ ਮਨ ਵਿੱਚ ਹੋਵੇ,
ਉਸ ਦੀ ਮਹਿਮਾ ਗਾਉਂਦੇ ਜਾਈਏ ਉੱਠਣ ਨੂਰਾਨੀ ਲਹਿਰਾਂ ।
ਸਮਝੀਏ ਰੱਬ ਦੀ ਖੇਡ ਨਿਰਾਲੀ, ਉਸ ਦੀ ਰਜ਼ਾ ਚ ਰਹੀਏ
ਸਭ ਸੋਚੋਂ ਉਪਰ ਉਠ ਜਾਈਏ ਉੱਠਣ ਨੂਰਾਨੀ ਲਹਿਰਾਂ।

 

[swarn bains]

ਸਮਝੀਏ ਰੱਬ ਦੀ ਖੇਡ ਨਿਰਾਲੀ, ਉਸ ਦੀ ਰਜ਼ਾ ਚ ਰਹੀਏ
ਸਭ ਸੋਚੋਂ ਉਪਰ ਉਠ ਜਾਈਏ ਉੱਠਣ ਨੂਰਾਨੀ ਲਹਿਰਾਂ।
very nice sir

 

[Dalvinder Singh Grewal]

ਸੱਜਣਾ ਸੰਗ ਜੁੜੋ
ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ
ਸੱਜਣਾ ਸੰਗ ਜੁੜੋਗੇ ਮਨ ਰੁਸ਼ਨਾਵੇਗਾ।
ਅੰਦਰ ਬਾਹਰ ਨੂਰ ਨੂਰ ਹੋ ਜਾਵੇਗਾ।
ਉਸ ਵਿੱਚ ਧਿਆਨ ਲਗਾਓਗੇ, ਫਲ ਪਾਓਗੇ,
ਕਿਰਪਾ ਉਸਦੀ ਹੋਵੇ, ਚਾਨਣ ਆਵੇਗਾ।
ਯਾਦ ਕਰੋਗੇ ਜਦ ਵੀ, ਹਾਜ਼ਰ ਹੋ ਜਾਂਦੇ,
ਚਾਹੇਗਾ ਉਹ ਜਦ ਵੀ, ਆਣ ਮਿਲਾਏਗਾ।
ਉਸ ਵਿੱਚ ਮਿਲਣਾ ਅਤੇ ਸਮਾਉਣਾ, ਹੋ ਸਕਦਾ,
ਸੱਚਾ ਸੁੱਚਾ ਜੀਵ ਜੋ ਦਿਲੋਂ ਧਿਆਏਗਾ।
ਕੁਦਰਤ ਦੇ ਹਰ ਜ਼ਰਰੇ ਵਿੱਚ ਉਹ ਵਸਦਾ ਹੈ,
ਜਿਸ ਨੇ ਪਾਉਣਾ ਅੰਦਰ ਤੋਂ ਹੀ ਪਾਏਗਾ।
ਜਦ ਉਸਦੀ ਰਚਨਾ ਨੂੰ ਖੁਸ਼ੀਆਂ ਦੇਵੋਗੇ,
ਖੁਸ਼ ਹੋਵੇਗਾ ਉਹ, ਅੰਮ੍ਰਿਤ ਵਰਸਾਏਗਾ।
ਸੋਚਾਂ ਛੱਡ ਲੋਚਾਂ ਕਰ ਉਸਦੇ ਮਿਲਣ ਦੀਆਂ,
ਜਦੋਂ ਧਿਆਵੇਂਗਾ ਦਿਲ ਲਾ, ਉਹ ਮਿਲ ਜਾਏਗਾ।

 

[Dalvinder Singh Grewal]

ਸੌਂ ਜਾਓ
ਡਾ: ਦਲਵਿੰਦਰ ਸਿੰਘ ਗ੍ਰੇਵਾਲ
ਤਨ ਨੂੰ ਜਦੋਂ ਥਕਾਵਟ ਹੋਵੈ, ਸੌਂ ਜਾਓ ।
ਮਨ ਵਿੱਚ ਜਦੋਂ ਰੁਕਾਵਟ ਹੋਵੇ, ਸੌਂ ਜਾਓ
ਕਦ, ਕਿੱਥੇ ਤੇ ਕੀਕੂੰ ਸੋਣਾ, ਸੋਚੋ ਨਾ,
ਦਿਲ ਵਿੱਚ ਜਦ ਘਬਰਾਹਟ ਹੋਵੇ ਸੌਂ ਜਾਓ।
ਮੁਸ਼ਕਿਲ ਦਾ ਜਦ ਹੱਲ ਕੋਈ ਵੀ ਲੱਭਦਾ ਨਾ,
ਸੌ ਦਾ ਪਹਿੰਟ ਛਿਆਹਟ ਹੋਵੇ ਸੌਂ ਜਾਓ।
ਜਦ ਮੀਟਿੰਗ ਵਿੱਚ ਮਤਾ ਨਾ ਕੋਈ ਚੱਜਦਾ ਹੈ,
ਲੈਕਚਰ ਵਿੱਚ ਮਿਲਾਵਟ ਹੋਵੇ ਸੌਂ ਜਾਓ।
ਸੌਂ ਕੇ ਮਨ ਹਲਕਾ ਹੋ ਜਾਂਦਾ, ਸੱਚੀ ਗੱਲ
ਮਸਲੇ ਦਾ ਹੱਲ ਆਹਟ ਹੋਵੇ ਸੌਂ ਜਾਓ।
ਕਿਸੇ ਸਮਾਗਮ ਅਣਚਾਹੇ ਵਿੱਚ ਜਾ ਬੈਠੌ,
ਵਚਨਾ ਵਿਚ ਕੜਵਾਹਟ ਹੋਵੇ ਸੌਂ ਜਾਓ।
ਜਾਗਣ ਵਾਂਗੂ ਸੌਣਾ ਬੜਾ ਜ਼ਰੂਰੀ ਹੈ,
ਲੈ ਰੱਬ ਦਾ ਨਾਂ ਬਿਨਾ ਰੁਕਾਵਟ, ਸੌਂ ਜਾਓ।

 

[Dalvinder Singh Grewal]

ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ
ਜੀਵਨ ਵਿੱਚ ਜੇ ਚਾਹੁਨੈ ਰੰਗਤ।
ਛਡ ਮਾੜੀ ਕਰ ਚੰਗੀ ਸੰਗਤ।
ਜਿੱਥੇ ਰੱਬ ਦਾ ਨਾਮ ਜਪੀਦਾ.
ਅੁਤਮ ਹੈ ਰੱਬ ਰੰਗੀ ਸੰਗਤ।

 

[Dalvinder Singh Grewal]

ਸ਼ਬਦ ਦਾ ਪਹਿਰਾ।

ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ

ਜਿਸ ਘਰ ਦੇ ਵਿੱਚ ਸ਼ਬਦ ਦਾ ਪਹਿਰਾ।

ਗੁਲਿਸਤਾਨ ਬਣ ਜਾਂਦਾ ਸiਹਰਾ॥

ਸ਼ਬਦਾਂ ਦੀ ਝੁਣਕਾਰ ਨਿਰਾਲੀ,

ਚਿੰਤ ਘਿਰੇ ਦਿਲ ਜਾਂਦੇ ਲਹਰਾ।

ਪੂਰੇ ਗੁਰ ਤੋਂ ਸਿੱਖਿਆ ਪਾਓ।

ਨਕਲੀ ਬਾਬੇ ਦੂਰ ਭਜਾਉ।

ਗੁਰੂ ਗ੍ਰੰਥ ਹੈ ਸਰਬ ਸੰਪੂਰਨ,

ਰੂਹਾਨੀ ਰਾਹ ਇਸ ਚੋਂ ਪਾਓ।

 

[Dalvinder Singh Grewal]

ਤੜਕੇ ਆਪ ਉਠਾਉਂਦਾ

ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ

ਤੜਕੇ ਤੜਕੇ ਆਪ ਉਠਾਉਂਦਾ।

ਮੇਰੇ ਹੱਥ ਵਿਚ ਕਲਮ ਫੜਾਉਂਦਾ।

ਸਾਹਵੇਂ ਬਹਿ ਕੇ ਗੀਤ ਲਿਖਾਉਂਦਾ,

ਆਪੂੰ ਮੈਨੂੰ ਕੁਝ ਨਹੀਂ ਆਉਂਦਾ।

 

[Dalvinder Singh Grewal]

ਜਪ ਰਾਮ ਨਾਮ

ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ

ਨਾ ਹੋਰ ਕਰੀਂ ਕੁਝ ਵੀ ਜਪ ਰਾਮ ਨਾਮ ਬੇਲੀ।

ਸਭ ਫਿਕਰ-ਫੁਕਰ ਲਾਹ ਕੇ, ਘਰ ਕਰ ਆਰਾਮ ਬੇਲੀ।

ਜਗ ਦੇ ਖਲਜਗਣਾ ਨੇ, ਤੈਨੂੰ ਉਲਝਾਇਆ ਹੈ,

ਹੋ ਪਾਸੇ ਕੁਝ ਚਿਰ ਲਈ ਜਪ ਸੁਬਹ ਸ਼ਾਮ ਬੇਲੀ।

ਸਭ ਰੋਗ ਨੇ ਟੁੱਟ ਜਾਣੇ, ਇਕ ਆਸ ਨਵੀ ਜਗਣੀ ,

ਜੀਵਨ ਦੇ ਚੱਕਰ ਚੋਂ ਹੋਣਾ ਵਿਰਾਮ ਹੋਵੇ ਬੇਲੀ।

ਤਨ ਮਨ ਜੇ ਚੰਗਾ ਹੈ ਕੰਮ ਚੰਗੇ ਹੋਵਣਗੇ,

ਜੋ ਸੋਚ ਬੀਮਾਰੂ ਹੈ ਪੰਚਾਂ ਦੀ ਗੁਲਾਮ ਬੇਲੀ।

ਛੱਡ ਬਹੁਤੀਆਂ ਰਾਵਾਂ ਨੂੰ, ਇਕ ਰੱਬ ਦੇ ਨਾਲ ਜੁੜੀਂ,

ਕਿਰਪਾ ਜਦ ਹੋ ਜਾਊਗੀ ਕੰਮ ਰਤਸ ਤਮਾਮ ਬੇਲੀ।

 

[Dalvinder Singh Grewal]

ਸਾਵਾਂ ਮਿਲਿਆ

ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ

ਗੁਣੀ ਗਿਆਨੀ ਦੱਸ ਸਕੇ ਨਾ, ਨਾ ਕੋਈ ਪੱਕਾ ਨਾਵਾਂ ਮਿਲਿਆ।

ਮੰਦਰ, ਮਸਜਿਦ, ਗੁਰੂਦੁਆਰੇ ਤੇਰਾ ਨਾਂ ਸਰਨਾਵਾਂ ਮਿਲਿਆ।

ਜੰਗਲ ਬੇਲੇ, ਪਰਬਤ, ਘੁੰਮੇ ਤੀਰਥ ਵੀ ਸਭ ਗਾਹ ਆਇਆ ਹਾਂ,

ਜੋਗੀ, ਪੀਰਾਂ, ਪੰਡਤਾਂ ਵਿੱਚੋਂ ਨਾ ਤੇਰਾ ਪਰਛਾਵਾ ਮਿਲਿਆ।

ਥੱਕ ਹਾਰ ਕੇ ਜਦ ਘਰ ਬੈਠਾ ਤੇਰੇ ਬਾਰੇ ਸੋਚ ਰਿਹਾ ਸਾਂ,

ਫਿਰ ਅਚਾਨਕ ਅੰਦਰ ਤੋਂ ਹੀ ਬੋਲ ਤੇਰਾ ਪਰਤਾਵਾਂ ਮਿਲਿਆ।

ਨੂਰੋ ਨੂਰ ਹੋਈ ਰੂਹ ਮੇਰੀ ਦਰਸ਼ਨ ਤੇਰੇ ਜਦ ਸੀ ਪਾਏ,

ਨਾਂ ਤੇਰਾ ਦਿਸਿਆ ਹਰ ਪਾਸੇ ਅੱਖਰ ਨਹੀਂ ਭੁਲਾਵਾਂ ਮਿਲਿਆ।

ਇਵੇਂ ਆਪਣੀ ਗੋਦੀ ਰੱਖੀ ਮੈਨੂੰ ਲੋੜ ਨਹੀਂ ਹੁਣ ਕੋਈ

ਸਭ ਇੱਛਾਵਾਂ ਪੂਰਨ ਹੋਈਆਂ ਜਦ ਦਾ ਤੂੰ ਏਂ ਸਾਵਾਂ ਮਿਲਿਆ ।

 

[Dalvinder Singh Grewal]

ਰੂਪ
ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ
ਰੂਪ ਜੋ ਵੀ ਕਿਆਸ ਕੀਤਾ ਹੈ ।
ਉਸਨੇ ਹੀ ਨਿਰਾਸ ਕੀਤਾ ਹੈ।
ਗਲਤੀ ਸੀ ਜੋ ਰੂਪ ਚੋਂ ਲੱਭਦਾ ਸਾਂ,
ਜਦ ਮਹਿਸੂਸ ਹਰ ਸਾਸ ਕੀਤਾ ਹੈ।

 

[Dalvinder Singh Grewal]

ਮੁੱਕ ਗਈ ਟੋਲ

ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ

ਕੱਲ ਵੀ ਮੇਰੇ ਕੋਲ ਉਹ ਹੈਸੀ, ਅੱਜ ਵੀ ਹੈ ਉਹ ਮੇਰੇ ਕੋਲ।

ਕੱਲ ਵੀ ਮੇਰੇ ਕੋਲ ਹੈ ਹੋਣਾ, ਸਦਾ ਮੇਰਾ ਹਮਜੋਲ।

ਉਸ ਨੂੰ ਵੇਖਣ ਵਾਲੀਆਂ ਅੱਖਾਂ ਉਸ ਸੰਗ ਜੁੜ ਕੇ ਖੁੱਲ੍ਹੀਆਂ

ਚਾਰੇ ਪਾਸੇ ਹੁਣ ਉਹ ਦਿਸਦਾ, ਮੁੱਕ ਗਈ ਮੇਰੀ ਸਾਰੀ ਟੋਲ।

 

[Dalvinder Singh Grewal]

ਅੰਦਰ ਦਿਸਿਆ ਨੂਰੋ ਨੂਰ

ਡਾ ਦਲਵਿੰਦਰ ਸਿੰਘ ਗ੍ਰੇਵਾਲ

ਵਸਦਾ ਹੈਂ ਤੂੰ ਮੇਰੇ ਕੋਲ।

ਬਾਹਰ ਰਿਹਾ ਕਿਉਂ ਤੈਨੂੰ ਟੋਲ?

ਅੰਦਰ ਚੱਜ ਨਾਲ ਨਾ ਤੱਕਿਆ,

ਬਾਹਰ ਦਿੱਤੀ ਧਰਤ ਫਰੋਲ।

ਸਮਝ ਪਈ ਤਾਂ ਅੰਦਰ ਜੁੜਿਆ,

ਅੰਦਰ ਦਿਸਿਆ ਨੂਰੋ ਨੂਰ,

ਤੇਰੇ ਹੁਕਮ ਚ ਤੈਨੂੰ ਲੱਭਿਆ

ਹੋਇਆ ਇਹ ਸਭ ਹੈ ਅਨਭੋਲ।

 

[swarn bains]

ਡਾਕਟਰ ਸਾਹਿਬ ਅਸਾਂ ਨੂੰ ਵੀ ਉਹ ਅੱਖਾਂ ਵਖਾ ਦਿਓ ਜਿਨ੍ਹਾ ਨਾਲ ਉਹ ਦਿਸੈ ਬੜਾ ਅਛਾ ਹੈ

 

[Dalvinder Singh Grewal]

Get up early between 1 and 4 AM; meditate on His Name, and you will be connected to Him from inside. Even the peaceful world around will give you an experience, Anubhav, as if you are with Him. For more information please read my article Surat Consciousness in Sikh Philosophy.
ਸੁਰਤਿ (Consciousness)